ಮಂಜುನಾಥ ವಿ ಎಂ
ದಟ್ಟ ಹಳದಿ ಬಣ್ಣದ
ಸೂರ್ಯಕಾಂತಿ ಹೂಗಳ ಮಡುವಿನಲ್ಲಿ
ಸದ್ದಿಲ್ಲದೆ
ನುಸುಳಿ ಮಲಗಿದೆ
MEN
6625
ನಂಬರಿನ ಬೂದುಬಣ್ಣದ ಸ್ಕೂಟರ್,
ಪರೋಡಿ ಹುಡುಗನಂತೆ ;
ಹುಟ್ಟಿದಾಗಿನಿಂದ ಹಾಡುತ್ತಾ
ದಣಿದು ಗೂಡು ಸೇರಿದ ಹಕ್ಕಿಯಂತೆ .
ಗಾಲಿಯೊಂದು ತಿರುಗುತ್ತಿದೆ ,
ಜಗದಂತೆ ನಿಲ್ಲದೆ;
ಸಾವಿನಂತೆ ಕಾಣದೆ.
ಕಲೆ,ಸಂಸ್ಕೃತಿ ಸಾಹಿತ್ಯವನ್ನರಿಯದ
ಐಟಿಬಿಟಿ ಕೇಂದ್ರಗಳ,
ಅನೀತಿ ಪಾಠಿಕೆಗಳ ಅವ್ಯಾಹತವಾಗಿ
ಓದಿಕೊಳ್ಳುವ,
ಹಾದರವನ್ನು
ತಾಯಿ ರಕ್ತವನ್ನಾಗಿಸುವ ಮಠಗಳ,
ರಾಜಕಾರಣಿಗಳ ಭವ್ಯಕಟ್ಟಡಗಳ;
ಕಾಸಿಗಾಗಿ,
ಹೆಂಡದಾಸೆಗಾಗಿ,
ಮೈಮೇಲಿನ ಬಟ್ಟೆ ಹರಿದು ಹಾಸುವ
ಸರ್ಕಾರಿ ಸಂಸ್ಥೆಗಳ ಮುಂದೆ
ಅಲೆಯದ ಸೌಭಾಗ್ಯ ಅದರದ್ದು.
ಕಾಫಿ,ಭತ್ತದ ಕೊಯ್ಲು ಆರಂಭವಾದಾಗ
ಅದು ಚಲಿಸುವುದು
ಗಾಳಿಯಲೆಯ ಹನಿಗಳ ಮೇಲೆ ,
ಬಹುಸುರುಳಿಗಳಲಿ ಶ್ರೇಷ್ಠ ವರ್ಣಚಿತ್ರದಂತೆ.
ಸ್ವರ್ಗ ಸೀಮೆಯಲಿ
ಸ್ವೇಚ್ಛೆಯಾಗಿ ನಲಿದಾಡುವ,
ಮಿಂಚುಳ್ಳಿಯ ಗಾನಕ್ಕೆ ತಲೆದೂಗುವ
ಅದಕ್ಕೆ ಯೋಧನ ಪ್ರೀತಿಯ ಸಿಟ್ಟು.
ದಿವ್ಯ ಶಾಂತಿಯ ನಡಾವಳಿಗಳಿವೆ.
ಸೈಡ್ ಮಿರರ್ ನಲ್ಲಿ ಕಾಣುವ
ಗೂಡ್ಸ್ ವಾಹನದ ನೆತ್ತಿಯ ಮೇಲೆ ಕುಳಿತ
ಕೂಲಿಕಾರ ರೈತರ ಬದುಕಿನ ಪಯಣ-
ಮುಂದಿನ ಹಾದಿಯ ಸ್ಪಷ್ಟ ಗೆಲುವಿನ ಯಾತನೆ;
ಮೆಲುದನಿಯಲಿ ಮಿಡುಕುವ ಮರಗಳು.
ಬಿರುಕು ಗೋಡೆಗಳಿಂದ
ಗುಬ್ಬಚ್ಚಿಗಳ ಹಿಂಡು ಹಾರುವ,
ಹಿತ್ತಲ ಹೊಂಡದಲ್ಲಿ ಬಾಳೆಮೀನು ಗಾಳಕ್ಕೆ
ಚುಂಬಿಸುವ ಆಕಾಶ ಕಡೆವ ಶಬ್ದ.
ನೆಲದೊಡಲ ಮಕ್ಕಳು ಕಾಯುತ್ತಿವೆ .
ಸದ್ದಿಲ್ಲದೆ
ನುಸುಳಿ ಮಲಗಿದೆ.
MEN…..
6625
ನಂಬರಿನ ಬೂದುಬಣ್ಣದ ಸ್ಕೂಟರ್.
ಗಾಲಿಯೊಂದು ತಿರುಗುತ್ತಿದೆ,
ಜಗದಂತೆ ನಿಲ್ಲದೆ;
ಸಾವಿನಂತೆ ಕಾಣದೆ.
0 ಪ್ರತಿಕ್ರಿಯೆಗಳು