ಶ್ರೀದೇವಿ ಕೆರೆಮನೆ
YOU CANNOT PUT A FENCE
AROUND THE PLANET EARTH
….. Marina de Bellangenta
ಎಷ್ಟೆಂದು ನನ್ನ ಕಟ್ಟಿಹಾಕಲು ನೋಡುತ್ತೀರಿ?
ಎಲ್ಲೆಲ್ಲಿ ನನ್ನ ಕಟ್ಟಿಡಲು ಬಯಸುತ್ತೀರಿ?
ಸ್ವಚ್ಛಂದವಾಗಿ ಭೋರ್ಗರೆಯುವ ನನ್ನ
ಬೆಳ್ನೊರೆಯ ಜೊತೆ ಚಿನ್ನಾಟವಾಡುತ್ತಲೇ
ಬಂಧಿಸುವ ಮನಸ್ಸಾದರೂ ನಿಮಗೇಕೆ?
ಅಭಿವೃದ್ಧಿಯ ಹೆಸರು ಹೇಳಿ
ಹಣ ಹೊಡೆಯುವ ಹುನ್ನಾರಕೆ
ನನ್ನ ತೀರವೇ ನಿಮಗೆ
ಮೊಗೆ ಮೊಗೆದು ಒಡಲ
ತುಂಬಿಸುವ ಖಜಾನೆಯಾಗಬೇಕೆ?
ಚಂದಗೊಳಿಸುವ ನಯವಾದ ಮಾತಿಗೆ
ಹೊಳೆವ ಮರಳ ರಾಶಿಯೂ ಮರುಳಾಗಿ
ಬಗೆ ಬಗೆದು ಎದೆ ಸೀಳಿ
ನಿಮ್ಮ ರಾವಣನ ಹೊಟ್ಟೆಗಿಷ್ಟು
ಅರೆಕಾಸಿನ ಮಜ್ಜಿಗೆ ಸುರಿಯ ಬೇಕೆ?
ಒಂದು ಅಲೆಗೇ ಬಿದ್ದು ಹೋಗುವ
ನನ್ನೊಡಲ ಬಂಡೆಗಲ್ಲಿಂದಲೇ ಗೋಡೆ ಕಟ್ಟಿ
ನನ್ನ ಕಟ್ಟಿಟ್ಟೆ ಎಂದು ಹಮ್ಮು ತೋರುವ
ನಿಮ್ಮ ಮುಗ್ಧತೆಗೆ ನನಗೆ ನಗು ಬರುತ್ತಿಲ್ಲ
ಅಳಲು ಒಡಲ ತುಂಬಾ ಇರುವ
ಉಪ್ಪು ನೀರು ಒಪ್ಪುತ್ತಿಲ್ಲ…
ಕಟ್ಟಿ ಬಿಡಿ, ಎಷ್ಟಾಗುತ್ತದೋ ಅಷ್ಟು
ನಾನೊಮ್ಮೆ ಮೈ ಮುರಿದೆದ್ದು ಆಕಳಿಸಿದರೆ
ಗಡಗಡನೆ ನಡುಗಿ ತರಗೆಲೆಯಂತೆ
ಬಿದ್ದು ಹೋಗುವ ಬಿದಿರು ತಡಿಕೆಯನ್ನು
ಎಂದೆಂದೂ ನನ್ನ ಸುತ್ತಲೂ ಬೇಲಿ
ನಿರ್ಮಿಸಲಾಗದು ಎಂಬ ಪರಿಜ್ಙಾನದೊಂದಿಗೆ.
ಚೆಂದ ಮೆಡಮ್
ತುಂಬಾ ಸುಂದರ ಹಾಗೂ ಮಾರ್ಮಿಕ ಕವನ