ಬ್ರೇಕಿಂಗ್ ನ್ಯೂಸ್ ಈಗ ತೀರಾ ತೀರಾ ಕಾಮನ್. ಆದರೆ ಷಾಕಿಂಗ್ ನ್ಯೂಸ್ ನಮಗೆ ಗೊತ್ತೇ ಇಲ್ಲ. ಅಂತಹದ್ದರಲ್ಲಿ ಜೋಗಿ ಇನ್ನಿಲ್ಲದ ಶಾಕ್ ನೀಡಿದ್ದಾರೆ. ಜೋಗಿಮನೆ ಬ್ಲಾಗ್ ನ ‘ಡೆಲಿಟ್’ ಬಟನ್ ಒತ್ತಿ ಸೀದಾ ನಡೆದು ಹೋಗಿದ್ದಾರೆ. ಮೀರಾಳನ್ನು ತೊರೆದು ಹೋದ ಆ ಗಿರಿಧರ ಪ್ರಭುವಿನಂತೆ.

ಜೋಗಿಗೂ ಒಂದು ಮನೆಯೇ ಎಂದು ಎಷ್ಟೊಂದು ಜನ ಮೂಗಿನ ಮೇಲೆ ಬೆರಳಿಟ್ಟುಕೊಂಡಿದ್ದರು. ನಿಜ ಅನಿಸಿತೇನೋ ಈ ಜೋಗಿಗೂ. ಯಾರ ಗೊಡವೆ ನನಗೇಕೆ ಎಂಬಂತೆ ಮನೆ ತೊರೆದು ನಿಜ ಜೋಗಿ ಜಂಗಮರಾಗಿ ಹೋಗಿದ್ದಾರೆ.

ಮೊನ್ನೆ ಮೊನ್ನೆ ಅವರು ೧೫ ದಿನ ಇಲ್ಲ ಎಂದಾಗ ‘ಅವಧಿ’ ಗುರ್ ಎಂದಿತ್ತು. ಓದುಗರೂ ಸಹಾ ನಮ್ಮ ದನಿಗೆ ತಮ್ಮ ದನಿ ಸೇರಿಸಿದ್ದರು. ಜೋಗಿ ನಡೆದೇ ಹೋದರು.

ಆ ಮೀರಾಳ ಆರ್ತನಾದ ಇಲ್ಲಿದೆ ಜೋಗಿಗಾಗಿ ಹಂಬಲಿಸುತ್ತಾ-

ತೊರೆದು ಹೋಗದಿರೊ ಜೋಗಿ ಅಡಿಗೆರಗಿದ ಈ ದೀನಳ ಮರೆತು ಸಾಗುವೆ ಏಕೆ ವಿರಾಗಿ

ಪ್ರೇಮ ಹೋಮದ ಪರಿಮಳ ಪಥದಲಿ ಸಲಿಸು ದೀಕ್ಷೆ ಎನಗೆ
ನಿನ್ನ ವಿರಹದಲಿ ಒರೆದು ಹೋಗಲು ಸಿದ್ಧಳಿರುವ ನನಗೆ

ಹೂಡುವೆ ಗಂಧದ ಚಿತೆಯ ನಡುವೆ ನಿಲುವೆ ನಾನೇ
ಉರಿ ಸೋಕಿಸು ಪ್ರಭುವೆ ಚಿತೆಗೆ ಪ್ರೀತಿಯಿಂದ ನೀನೇ

ಉರಿದು ಉಳಿವೆನು ಬೂಧಿಯಲಿ ಲೇಪಿಸಿಕೋ ಅದ ಮೈಗೆ
ಮೀರಾ ಪ್ರಭು ಗಿರಿಧರನೇ ಜ್ಯೋತಿಯು ಜ್ಯೋತಿಯ ಸೇರಲಿ ಹೀಗೆ