ರಾಜೀವ್ ಚೀರನಹಳ್ಳಿ
ನಲವತ್ತರ ತಳಮಳದಲ್ಲಿ
ಹೊಸ ಗೆಳತಿ ಸಿಕ್ಕಿದ್ದಾಳೆ
ನಿನ್ನೆಯವರೆಗೂ ಆಕೆ
ನನ್ನೊಂದಿಗೇ ಇದ್ದಳು
ನನ್ನೊಟ್ಟಿಗೆ ಬೆಳೆದಳು
ಆದರೆ, ಗೆಳತಿಯಾಗಿರಲಿಲ್ಲವಷ್ಟೇ !
ಆಕೆಯದು-ನನ್ನದು
ದಶಕದ ನಂಟು
ಮೊದಲಿನಿಂದಲೂ ಆಕೆ
ನನ್ನ ಉಸಿರಾಗಿದ್ದಳು;
ಬದುಕಿನ ಭಾಗವೇ ಆಗಿದ್ದಳು
ಆದರೆ,ಗೆಳತಿಯಾಗಿರಲಿಲ್ಲವಷ್ಟೇ
ಏನೆಂದು ಕರೆಯಲಿ ಆಕೆಗೆ ?
ಹತ್ತು ಸಂವತ್ಸರ ಕಾಲ
ಜತನದಿಂದ ಜತೆಗಿದ್ದಳು
ಕೈ ಹಿಡಿದ ಕರುಳ ಬಳ್ಳಿಯೇ ಆಗಿದ್ದಳು
ಆದರೆ, ಗೆಳತಿಯಾಗಿರಲಿಲ್ಲವಷ್ಟೇ !
ಹೊಸ ಸಂಬಂಧಕ್ಕೆ
ಹೆಸರೊಂದು ಹುಡುಕಿ ಸುಸ್ತಾದ ಹೊತ್ತಲ್ಲಿ
ಮೊನ್ನೆಯಾಡಿದ ಆಕೆಯ ಮಾತು ನೆನಪಾಯಿತು
ಯಾವುದೋ ಮಾತಿಗೆ
ಆಕೆ ಹೇಳಿದಳು- “ಅಪ್ಪಾ, ನಿನಗಂತೂ ಬುದ್ದಿ ಇಲ್ಲ’’
ತಕ್ಷಣ ನನ್ನಮ್ಮ ಕೂಗಿದಳು
“ಮಗನೇ, ಅವಳೀಗ ನಿನ್ನ ಮಗಳಲ್ಲ, ಗೆಳತಿ !”
ಆಕೆ ಪ್ರೀತಿ !
ಪ್ರೀತಿಗಿಂತಲೂ ಭಾರವಾದ ಪ್ರೀತಿ
ಬರೀ ಪ್ರೀತಿ ಎಂಬ ಭಾವವಲ್ಲ,
ನನ್ನ ಪಾಲಿನ ಪ್ರೀತಿಯ ಅನುಭಾವ
ಆಕೆಯ ಚಿಕ್ಕಪ್ಪನ ಉಸಿರು
ಇಬ್ಬರು ತಂಗಿ-ತಮ್ಮರ ಹಸಿರು
ನಿನ್ನಯ ತನಕ ಮಗಳು
ಇಂದಿನಿಂದ ಪ್ರೀತಿಯ ಗೆಳತಿ
ನಾಳೆ ಆಕೆ ನನ್ನ ತಾಯಿಯೇ ?
ಇಲ್ಲ- ನಮ್ಮಿಬ್ಬರಿಗೂ ಅಮ್ಮ
ಎನ್ನುತ್ತಿದ್ದಾಳೆ-ನನ್ನ ಜೀವದ ಗೆಳತಿ
ಅವರಮ್ಮ !
ನೀವೂ ಮತ್ತು ನಿಮ್ಮ ನನಸಾದ ಕನಸು..