ಸೋಮಶೇಖರ ಸಿರಾ

ಹೌದು ನಾವು ಸೋತಿದ್ದೇವೆ
ನೀನು ನಮ್ಮ ಬೆನ್ನ ಹಿಂದೆಯೇ
ಮುಸಿ ಮುಸಿ ನಗುತ್ತಿರಬಹುದು
ಆದರೆ ನಿನ್ನ ಹೃದಯ ಕಠೋರವಾಗುತ್ತಿರುವುದನ್ನು
ನೋಡಿ ನಾವು ಮರುಗುತ್ತಿದ್ದೇವೆ.

ಹೌದು ನಾವು ನಮ್ಮ ಜನರ
ಒಳಗಿನ ರಕ್ತ ಪಿಪಾಸುಗೆ ಸೋತಿದ್ದೇವೆ.
ನೀನು ‘ಅದನ್ನು’ ಹೀರಿ ಗೆದ್ದಿರಬಹುದು

ನೀವು ನಮ್ಮ ಇತಿಹಾಸ ಮರೆತಿರಬಹುದು
ಆದರೆ ನಮಗೆ ಅಲ್ಲಿ ಆದ ಗಾಯ ಇನ್ನೂ ಒಣಗಿಲ್ಲ
ಆದರೂ ನಿನ್ನ ಗಾಯಕ್ಕೆ ಮುಲಾಮು ಸವರಲು ನಿಂತಿದ್ದೇವೆ

ಆ ಕ್ರೂರತೆ ನಿನ್ನೊಳಗಿಲ್ಲ, ನಮ್ಮ ಜನಗಳ ಆ ಪಿರಾನ ಮೀನಿಗೆ ಗಾಳ ಹಾಕಿದೆ ಅಷ್ಟೇ.
ಆದರೆ ನೀನು ಅದರ ಹಲ್ಲುಗಳ ಮರೆತಿರುವೆ.

ಹೌದು ನಾವು ಹೀಗೆ ಸದಾ ಕುಟ್ಟುವ ಕುಟ್ಟಣ್ಣಗಳೇ
ಕುಡಿದು ಅಮಲೇರಿದಾಗ ಸಮಾನತೆಯ ಸೊಲ್ಲೆತ್ತುವವರೇ…….

ಆ ಗಟಾರದಲ್ಲಿ ಬಿದ್ದು ಅವನು ಈಗ ಸತ್ತಿರಬಹುದು
ಆದರೆ ಅವನ ಮಕ್ಕಳಿನ್ನೂ ಬದುಕಿದ್ದಾರೆ.

ನೀನು ಎದೆಯ ಮಧ್ಯ ಕೈಯಿಟ್ಟು ಹಾಡಬಹುದು
ನಾವು ಎದೆಯ ಹೊಕ್ಕು ಹಾಡುತ್ತೇವೆ

ಗುಂಡಿಗೆ ಎದೆ ಕೊಟ್ಟ ನಮಗೆ ಈವ್ಯಾವೂ
ಹೊಸತಲ್ಲ ಗೆಳೆಯ
ಹಳೆಯ ಗೆಳೆಯ

ಗರಿಕೆಯ ಕುಲದವರು ನಾವು
ಸೋತಿರಬಹುದು
ಆದರೆ ಸತ್ತಿಲ್ಲ