ಶ್ರೀವಿಭಾವನ 

೧

ಕೊನೆಯಿಲ್ಲದ
ದಾರಿ
ದಾರಿಗುಂಟ ಆಗ್ಗಾಗ್ಗೆ ನನ್ನ ದಾಟಿ
ಮುನ್ನುಗ್ಗುವ
ಒಂದಿಷ್ಟು ಅಪರಿಚಿತ  ಮುಖಗಳನ್ನು
ಬಿಟ್ಟರೆ,
ಮತ್ತೇನು ಇಲ್ಲ
ಕಣ್ಣು ಹಾಯಿಸಿದಷ್ಟು  ದೂರ
ಶೂನ್ಯವನ್ನೇ ಹೊದ್ದುಕೊಂಡಂತಿರುವ
ನೆಲ.

೨

ನನಗೋ ಈ ದಾರಿ ಹೊಸದು
ಎತ್ತ ದೃಷ್ಟಿ ಹಾಯಿಸಿದರೂ
ಬರಿ ಖಾಲಿ ನೋಟಗಳೇ.
ಆಗ್ಗಾಗ್ಗೆ
ಹಿಂದಿಕ್ಕಿ
ಅವಸರದಲ್ಲಿ
ಹೆಜ್ಜೆ  ಇಡುತ್ತಾ
ಅದೆಲ್ಲಿಗೋ
ಧಾವಂತದಲ್ಲಿ  ಸಾಗುತ್ತಿರುವ
ಜನರನ್ನಾದರೂ
ಕೇಳಬೇಕಿತ್ತು
ನಿಮಗಾದರೂ
ಈ ದಾರಿಯ
ಪರಿಚಯವಿದೆಯೇ  ಎಂದು  

೩

ಅನುಭೂತಿಯೋ …
ಅನಿವಾರ್ಯತೆಯೋ….
ಒಂದಿಷ್ಟು ದಾರಿಗಳನ್ನು
ಕ್ರಮಿಸಲೇಬೇಕಿದೆ
ವಿಳಾಸ ಗೊತ್ತಿಲ್ಲದಿದ್ದರೂ
ದಾರಿಯೇ ಕೊನೆಯಾಗುತ್ತದೆ
ತಲುಪಬೇಕಾದ ಊರಲ್ಲಿ
ನಡುವೆ ಅದೇನೋ ತಾಕಲಾಟಗಳು,
ಭ್ರಮೆಗಳು, ಮತ್ತು  ಭಯ!

೪
ಕಾಯ್ದ ನೆಲದ ಬಿಸಿಗೆ
ಎದೆಯ ಬೇಗುದಿಯೇ  ಸರಿ ಜೋಡಿ
ಎಲ್ಲವನ್ನೂ  ಹಗುರಾಗಿಸಿಕೊಂಡು
ಹೆಜ್ಜೆ  ಇಡಲೇ ಬೇಕಿದೆ…
ಗೊತ್ತಿಲ್ಲದ ಊರಿನಡೆಗಿನ
ಪಯಣಕ್ಕಾಗಿ