ಏಳು ವರ್ಷದ ಬಾಲಕಿ ಸಿರಿ ಸೊರಬ ಅವರಿಂದ ಆರು ಕಥೆಗಳ ಸುಂದರ ಸಂಕಲನ – ‘ವಿಸ್ಕರ್ಸ್ ಅಂಡ್ ಟೇಲ್ಸ್’

ಕುಮಾರನ್ಸ್ ಶಾಲೆಯ ಎರಡನೇ ತರಗತಿಯ ವಿದ್ಯಾರ್ಥಿನಿ ಸಿರಿ ಸೊರಬ ಅವರು ಆರು ಕಿರು ಕಥೆಗಳನ್ನೊಳಗೊಂಡ ಸುಂದರ ಕಥಾಸಂಕಲನವನ್ನು ರಚಿಸಿದ್ದಾರೆ. ಪ್ರಾಣಿಗಳ ಚೇತೋಹಾರಿ ಜಗತ್ತು, ಕಲ್ಪನೆಯ ಮೋಹಕ ಲೋಕ ಹಾಗೂ ಮಾಯಾಲೋಕದ ಸ್ವಾರಸ್ಯವನ್ನು ಒಳಗೊಂಡಿರುವ ಈ ಕಥೆಗಳು ಬಾಲಸಹಜ ಮುಗ್ಧತೆ, ಅಪಾರ ಕುತೂಹಲ ಮತ್ತು ಸಕಾರಾತ್ಮಕ ಚಿಂತನೆಗಳಿಂದ ಕೂಡಿವೆ.

ಕೇವಲ ಏಳು ವರ್ಷದ ಸಿರಿ ಅವರು ಕಥೆಗಳನ್ನು ಬರೆದಿರುವುದಷ್ಟೇ ಅಲ್ಲದೆ, ಅವುಗಳಿಗೆ ತಾವೇ ಸುಂದರ ಚಿತ್ರಗಳನ್ನೂ ಬಿಡಿಸಿರುವುದು ವಿಶೇಷ.

ಈ ಕಥಾಸಂಕಲನಕ್ಕೆ ‘Whiskers and Tails’ ಎಂದು ಹೆಸರಿಡಲಾಗಿದ್ದು, ಇದರ ಲೋಕಾರ್ಪಣೆ ಸಮಾರಂಭವು ನವೆಂಬರ್ 13ರ ಶುಕ್ರವಾರ ಬೆಳಿಗ್ಗೆ 10.30ರಿಂದ ಮಧ್ಯಾಹ್ನ 1 ಗಂಟೆಯವರೆಗೆ ಬೆಂಗಳೂರಿನ ಬಸವನಗುಡಿಯ ಬಿ.ಪಿ. ವಾಡಿಯಾ ರಸ್ತೆಯಲ್ಲಿರುವ ಇಂಡಿಯನ್ ಇನ್‌ಸ್ಟಿಟ್ಯೂಟ್ ಆಫ್ ವರ್ಲ್ಡ್ ಕಲ್ಚರ್‌ನ ವಾಡಿಯಾ ಸಭಾಂಗಣದಲ್ಲಿ ನಡೆಯಲಿದೆ.

ಈ ಸಂದರ್ಭದಲ್ಲಿ ಸಿರಿಯವರ ಪ್ರೀತಿಯ ಅಜ್ಜ, ದಿವಂಗತ ಪ್ರೊ. ವೇಣುಗೋಪಾಲ ಸೊರಬ ಅವರ 90ನೇ ಜನ್ಮದಿನದ ಅಂಗವಾಗಿ ಅವರಿಗೆ ಗೌರವ ನಮನಗಳನ್ನು ಸಲ್ಲಿಸಲಾಗುವುದು. ಅವರು ಇಂಗ್ಲಿಷ್ ಪ್ರಾಧ್ಯಾಪಕರಾಗಿಯೂ, ದ್ವಿಭಾಷಾ ಸಾಹಿತಿಗಳಾಗಿಯೂ ಸಾಹಿತ್ಯ ಕ್ಷೇತ್ರಕ್ಕೆ ತಮ್ಮದೇ ಆದ ಕೊಡುಗೆ ನೀಡಿದ್ದಾರೆ.

ಏಳು ವರ್ಷದ ಪುಟ್ಟ ಪ್ರತಿಭೆಯ ಸೃಜನಶೀಲ ಪ್ರಯತ್ನಕ್ಕೆ ಹೃತ್ಪೂರ್ವಕ ಅಭಿನಂದನೆಗಳು. ಸಿರಿಯವರ ಸಾಹಿತ್ಯಾಸಕ್ತಿ, ಕಲ್ಪನಾಶಕ್ತಿ ಮತ್ತು ಸೃಜನಶೀಲತೆ ಇನ್ನಷ್ಟು ಎತ್ತರಕ್ಕೆ ಬೆಳೆಯಲಿ. ಅವರ ಮುಂದಿನ ಸಾಹಿತ್ಯ ಪಯಣ ಉಜ್ವಲವಾಗಿರಲಿ ಎಂಬ ಹಾರೈಕೆಗಳು.