ದೂರ ತೀರದ ಕರೆ
ಸರೋಜಿನಿ ಪಡಸಲಗಿ
ದೂರದಲ್ಲೊಂದು ತೀರ ಕರೆಯುತಿರುವಂತಿದೆ
ಎಂಥದೀ ಥಳುಕು ಯಾವುದೀ ಬೆಳಕು
ಮಿಂಚಿನಾ ಗೆರೆಯೊಂದು ಇರುಳ ಸೀಳುವಂತಿದೆ
ಮನದಲೊಂದು ಚಡಪಡಿಕೆ ಅರಿವಲೊಂದು ಕಳವಳಿಕೆ
ಎದೆಯ ಆಳ ತುಂಬಾ ತುಡಿಯುತಿರುವ ಬಯಕೆ
ಕೈ ಬೀಸಿ ಕರೆವ ತೀರ ಸೇರಲೊಂದು ಕನವರಿಕೆ
ತಡೆಯಲಾರದಾ ಭಾರಕೆ ಜೀವ ತುಂಬ ನರಳಿಕೆ
ಅರಿಯದ ತೀರದ ಕಾಣದಿಹ ದಾರಿ
ಹೆಜ್ಜೆ ಗುರುತೊಂದು ಇರದ ಬೆರಗ ಮೂಡಿಸೋ ದಾರಿ
ಭೋರ್ಗರೆವ ಕಡಲ ದಾಟುವುದದಾವ ಪರಿ
ಸೇರಲಾರೆನೇನೊ ತೀರಾ ಹೇಳು ಒಂದು ಬಾರಿ
ಚಿತ್ತ ತುಂಬ ತುಂಬಿದ ಕತ್ತಲದಿ ನುಸುಳಿ
ಅಲ್ಲಿ ಅರಳಿದೆ ಮತ್ತೆ ಹೊಸ ಆಸೆ ಹೊರಳಿ
ಈಜಲೋ ಹಾರಲೋ ಬೇಕೆ ನಿನಗೆ ಸುಳಿವು
ನಿನ್ನ ಆಶೆಯಾ ದೀಪ ನೀಡಲಾರದೆ ಹೊಳವು
Beautiful!