ರಾಜಾರಾಂ ತಲ್ಲೂರು

ಮುಖಪುಟ ಚಿತ್ರ: ಅಪಾರ

ಇದೊಂಥರಾ ತುದಿಯಿಲ್ಲದವರ ವಿರುದ್ಧ ತಳವಿಲ್ಲದವರ ಸಮರ. ನೋಡೋಕೆ ಸದ್ಯ ಮಜವಾಗಿದೆ. ಆದರೆ ಈ ಕುಶಾಲು ನಾಳೆ ಸಾಮಾಜಿಕ, ಸಾಂವಿಧಾನಿಕ ಸ್ವಾಸ್ಥ್ಯಕ್ಕೆ ಘಾತಿ ತಂದರೆ? ಎಂಬ ಯೋಚನೆ ಬಂದಾಗ ಕಳವಳವಾಗತೊಡಗುತ್ತದೆ. ಎರಡೂ ಕಡೆ ಮಾಡಬಾರದ್ದು ಮಾಡಿಕೊಂಡು, ಆಗಬಾರದ್ದು ಆಗುತ್ತಿದೆ.

ಬಳ್ಳಾರಿ ರಿಪಬ್ಲಿಕ್ಕು, ಅದರ ಆಟ-ಪಾಠಗಳು ನಾಡಿಗೆ ಹೊಸದೇನಲ್ಲ. ಕೂಡ್ಲಿಗಿಯ ಡಿ ವೈ ಎಸ್ಪಿ ಜೊತೆಯ ವೈರವು  ಪರಮೇಶ್ವರ ನಾಯ್ಕರ ಸಚಿವಸ್ಥಾನಕ್ಕೆ ಸಂಚಕಾರ ತರಲೂ ಬಹುದು; ತರದಿರಲೂ ಬಹುದು. ಆದರೆ ಈ ಘಟನೆಯಿಂದ ಆಗಲಿರುವ ಮುಕ್ಕು ಕಳೆದ ಆರು ತಿಂಗಳಿನಿಂದ ರಾಜ್ಯ ಸರ್ಕಾರಕ್ಕೆ  ಬೆನ್ನು ಬೆನ್ನಿಗೆ ತಗಲುತ್ತಿರುವ ಮುಕ್ಕು-ಸುಕ್ಕುಗಳಿಗೆ ಹೋಲಿಸಿದರೆ ಹತ್ತರೊಟ್ಟಿಗೆ ಹನ್ನೊಂದಾಗಿ ನಿಂತೀತು ಅಷ್ಟೇ…. ಈ ಬಗ್ಗೆ ಯಾರಿಗೂ ಅಚ್ಚರಿ ಇಲ್ಲ.

ಈಗ ನಮ್ಮೆದುರಿರುವ ಅಚ್ಚರಿಯ ತುಣುಕು – ಪೊಲೀಸ್ ಅಧಿಕಾರಿ ಅನುಪಮಾ ಶೆಣೈ ಮತ್ತು ಅವರ ಪರ ಫೇಸ್ ಬುಕ್ ರಿಪಬ್ಲಿಕ್ ಎಬ್ಬಿಸುತ್ತಿರುವ ಧ್ವನಿ. ಕರ್ನಾಟಕ ರಾಜ್ಯ ಪೊಲೀಸ್ ಕಾಯಿದೆ – 1963, ನಾಡಿನ ಪೊಲೀಸ್ ಅಧಿಕಾರಿಗಳಿಗೆ, ಅವರು ಅಧಿಕಾರದಲ್ಲಿರುವಾಗ ಹೇಗೆ ವರ್ತಿಸಬೇಕು ಎಂಬ ಬಗ್ಗೆ ವಿವರವಾಗಿ ಹೇಳುತ್ತದೆ. ಅನುಪಮಾ ಅದನ್ನು ಮೊನ್ನೆಯ ತನಕ ಪಾಲಿಸುತ್ತಾ ಬಂದಿದ್ದಾರೆ ಎಂದುಕೊಂಡಿದ್ದೇನೆ.

ಆದರೆ, ಮೊನ್ನೆ ಮಾತ್ರ ಅವರು ರಾಜಕಾರಣಿಯಂತೆ ರಾಜೀನಾಮೆ ಪತ್ರ ಎಸೆದು ಹೊರಟದ್ದು – ಪೊಲೀಸ್ ಕಾಯಿದೆಗೆ ತದ್ವಿರುದ್ಧ ನಡೆ. ಕಾಯಿದೆಯ ಮೂರನೇ ಚಾಪ್ಟರ್ ನಲ್ಲಿ ಪೊಲೀಸ್ ಅಧಿಕಾರಿ ರಾಜೀನಾಮೆ ನೀಡಬಹುದೆ? ನೀಡಬಹುದಾದರೆ ಹೇಗೆ? ಯಾವುದೆಲ್ಲಾ ಸ್ಥಿತಿಯಲ್ಲಿ  ಅವರು ಪೊಲೀಸ್ ಅಧಿಕಾರಿಯಾಗಿಯೇ ಮುಂದುವರಿದಿರುತ್ತಾರೆ ಎಂಬೆಲ್ಲ ನಿಯಮಗಳನ್ನು ವಿವರವಾಗಿ ಹೇಳಲಾಗಿದೆ. ಈ ರೂಲುಗಳನ್ನೆಲ್ಲ ಅನುಪಮಾ ಶೆಣೈ ರಾಜೀನಾಮೆ ನೀಡಿದಂದಿನಿಂದ ಈಚೆಗೆ ಉಲ್ಲಂಘಿಸುತ್ತಾ ಬಂದಿರುವುದು ಈಗ ಬಹಿರಂಗ ಸತ್ಯ.

ಅನುಪಮಾ ಅವರ ಹೆಸರಿನಲ್ಲಿರುವ ಖಾಸಗಿ ಫೇಸ್ ಬುಕ್ ಅಕೌಂಟ್ ಒಂದರ ಮೂಲಕ ಅವರ ಹೋರಾಟದ ಫೂತ್ಕಾರಗಳು ಹೊರಹೊಮ್ಮುತ್ತಿರುವುದು ಕುತೂಹಲಕರವಾಗಿದೆ. ಸಾರ್ವಜನಿಕವಾಗಿ ಒದಗಿರುವ ಕೆಲವು ಫೂತ್ಕಾರಗಳಂತೂ ತೀರಾ ಬಾಲಿಷವಾಗಿದ್ದು, ಪ್ರಾಥಮಿಕ ಶಾಲಾ ಮಕ್ಕಳ ಕಡ್ಡಿ-ಪೆನ್ಸಿಲ್ ಜಗಳದ ಮಟ್ಟದಲ್ಲಿದೆ. ಇದರ ಹಿಂದೆ ಯಾರದಾದರೂ ಸಂಚು ಇದೆಯೇ ಎಂಬುದನ್ನು ಹೇಳಲು ಕಾಲವಿನ್ನೂ ಪಕ್ವವಾಗಿಲ್ಲ.

ತಮಾಷೆ ಎಂದರೆ, ಈ ಎರಡು ರಿಪಬ್ಲಿಕ್ಕುಗಳ ನಡುವಿನ ಕದನದಲ್ಲಿ “ಬ್ರಹನ್ನಳೆ” ಆಗಿ ತಕಥೈ ಕುಣಿಯತೊಡಗಿರುವುದು ಮಾಧ್ಯಮಗಳು! ಅನುಪಮಾ ಅವರ ದೈಹಿಕ ಅನುಪಸ್ಥಿತಿ ಮತ್ತು ವರ್ಚುವಲ್ ಉಪಸ್ಥಿತಿಗಳು – ನಾಳೆ ಅವರದೆನ್ನಲಾದ ಫೇಸ್ ಬುಕ್ ಅಕೌಂಟ್ ಅವರ ಅಧಿಕೃತ ಅಕೌಂಟ್ ಅಲ್ಲ ಎಂಬ ಹಂತ ತಲುಪಿದರೆ, ಆಗ ಈ ಬ್ರಹನ್ನಳೆಯರು ಯಾವ ಸ್ಥಿತಿ ತಲುಪಲಿದ್ದಾರೆ?!!

ಈ ಒಟ್ಟು ಪ್ರಕರಣವನ್ನು ಗಣನೆಗೆ ತೆಗೆದುಕೊಂಡಾಗ ಈವತ್ತಿಗೆ ಅನ್ನಿಸಿದ್ದು ಇಷ್ಟು…

1. ಬಳ್ಳಾರಿ ರಿಪಬ್ಲಿಕ್ ಕೊನೆಗೊಳಿಸುತ್ತೇವೆಂಬ ವಾಗ್ದಾನವನ್ನು ಉಳಿಸಿಕೊಳ್ಳಲು ಈವತ್ತಿನ ಸರ್ಕಾರಕ್ಕೆ ಸಾಧ್ಯ ಆಗಿಲ್ಲ.
2. ಕಾಂಗ್ರೆಸ್ ತನ್ನ ಕಾಲಬುಡಕ್ಕೆ ತಾನೇ ಹೊಡೆದುಕೊಳ್ಳುವ ಕೆಲಸವನ್ನು ಎಂದಿನಂತೆಯೇ ಬಹಳ ಶಿಸ್ತು-ಶೃದ್ಧೆಗಳಿಂದ ನಡೆಸುತ್ತಿದೆ.
3. ಒಬ್ಬ ಸರ್ಕಾರಿ ಅಧಿಕಾರಿ ತಾನು ಇರುವ ಸ್ಥಾನದ ಕಾರಣದಿಂದಾಗಿ ತನಗೆ ಸಿಕ್ಕಿದ ಮಾಹಿತಿಯೊಂದನ್ನು (ಈ ಪ್ರಕರಣದಲ್ಲಿ ಇದೆಯೆನ್ನಲಾದ ಸಿ.ಡಿ.) ತನ್ನ ವೈಯಕ್ತಿಕ ಹಗೆಸಾಧನೆಯಂತಹ ಚಟುವಟಿಕೆಗಳಿಗೆ ಬಳಸಿಕೊಳ್ಳಬಹುದೆ? ಈ ಪ್ರಕರಣದಿಂದಾಗಿ ಇನ್ನು ಅಧಿಕಾರಿಗಳಿಗೂ ತಮ್ಮ ಅಧಿಕಾರದ ಗೌಪ್ಯತೆಯನ್ನು ಕಾಪಾಡುವ ಪ್ರಮಾಣವಚನ ಸ್ವೀಕರಿಸುವ ಅಗತ್ಯ ಬರಬಹುದೆ?
4. ಸಾರ್ವಜನಿಕ/ಗೌಪ್ಯ ಮಾಹಿತಿಗಳು ಸರ್ಕಾರದಲ್ಲಿ; ಅದೂ ಈ ಡಿಜಿಟಲ್ ಯುಗದಲ್ಲಿ ಎಷ್ಟು ಸುರಕ್ಷಿತ?