-ಚೀ ಜ ರಾಜೀವ

ಪ್ರೀತಿಯ ಜಂಬೆ ಸಾರ್,
​ಅದೊಂದು ದಿನ
ನೀವು ಫೋನಾಯಿಸಿದ್ದಿರಿ…
ಉಭಯ ಕುಶಲೋಪರಿ
ಮುಗಿದ ಬಳಿಕ ಮಾತು
‘ಪ್ರಿಯ ಗಾಂಧಿ’ ಪುಸ್ತಕದೆಡೆಗೆ
ಮಾತು ಹೊರಳಿತು
ನೀವೆಂದಿರಿ:
“ನೀವು ಏನು ಬೇಕಾದರೂ ಬರೆಯಿರಿ,
ಅವರ ಕುರಿತ ಟೀಕೆ-ಟಿಪ್ಪಣಿಯೇ ಆಗಲಿ,
ತಕರಾರು,ನಿರಾಕರಣೆಯೇ ಇರಲಿ…
ಆದರೆ, ‘ಪ್ರೀತಿಯ ಬಾಪು’ ಎಂದಿರುವಿರಲ್ಲಾ,
ಅದು ನನಗೆ ತುಂಬಾ ಇಷ್ಟವಾಯಿತು!”
ಪ್ರೀತಿಯ ಇನ್ನೊಂದು
ಅರ್ಥವೇ ಗಾಂಧಿ!
ಆತ ಕಲಿಸಿದ್ದು ಅದನ್ನೇ ಅಲ್ಲವೇ ?
ಅದೆಂಥಾ
ವ್ಯಾಖ್ಯಾನ ಸರ್ ನಿಮ್ಮದು?

​ಗಾಂಧಿಯನ್ನು ಕೆಲವರು
ನಾಟಕದಲ್ಲಿ ಚಿತ್ರಿಸಿದರು
ಬಹುತೇಕರು ಮಾತನಾಡಿದರು,
ನಮ್ಮಂಥವರು ಬರೆದೆವಷ್ಟೆ…
ಆದರೆ, ನೀವು ಅವರನ್ನು
ಬದುಕಲು ಪ್ರಯತ್ನಿಸಿದಿರಿ!
​ಗಾಂಧಿ ಎಂದರೆ ನಿಮಗೆ
ಯಾವಾಗಲೂ ಸಿದ್ಧಾಂತವಾಗಿರಲಿಲ್ಲ,
‘ಗಾಂಧಿವಾದ’ ಅಂದರೆ ನೀವು ಮಂದಸ್ಮಿತರಾಗುತ್ತಿದ್ದಿರಿ…
ಸರಳತೆ, ಸಜ್ಜನಿಕೆ, ಪ್ರಾಮಾಣಿಕತೆ
ಶಿಸ್ತು, ಮಾನವೀಯತೆ…
ರಂಗದಲ್ಲಿ ಮಾತ್ರವಲ್ಲ
ಬದುಕಲ್ಲಿ ಗಾಂಧಿಯನ್ನು ಜೀವಂತವಾಗಿಟ್ಟಿದ್ದಿರಿ.
ಅದೆಂಥಾ ಸಹಜ ಬದುಕು
ನಿಮ್ಮದು ಸರ್ ?
ನಿಮ್ಮನ್ನು ಮರೆಯುವುದಿಲ್ಲ
ಹೋಗಿ ಬನ್ನಿ