‘ನನ್ನೊಳಗಿನ ಹಾಡು ಕ್ಯೂಬಾ’ ಓದಿ 

ಪಾರ್ವತಿ ಎನ್ 

ನಿಮ್ಮೊಳಗಿನ ಹಾಡು

ನನ್ನ ಕಾಡ ಹತ್ತಿದೆ
ಬಾ

ಎಂದು ಕರೆಯಹತ್ತಿದೆ ಕ್ಯೂಬಾ

ಬಾರಿ ಬಾರಿ ಕೈ ಚಾಚಿ ಕರೆದು

ಹಾಡುತ್ತಲೇ ಮನವ ತೆರೆದು

ಕಾಡುತ್ತಲೇ ಕನಸ ಎರೆದು

ಹಲ್ಲು ಕಚ್ಚಿ ಸಹಿಸಿ ಗೆದ್ದದ್ದಕ್ಕೆ

ಹೆಮ್ಮೆಯ ಹಾರ ಕೊರಳ ಅಪ್ಪಬೇಕು

ಬೆಂಕಿಯಲ್ಲಿ ದಹಿಸಿ ಬದುಕಿದ್ದಕ್ಕೆ

ಛಲದ ಹೂಗಳು ಎದೆಯಲ್ಲಿ ಅರಳಿ ತೀರಬೇಕು

ಎಲ್ಲ ದುರಂತಕ್ಕೂ ಕೊನೆಹಾಡಬೇಕು

ಸಾಕಿನ್ನು ಎಂದು ಹೇಳಲೇಬೇಕು

ಎನ್ನುತ್ತಾ ದುಂಬಾಲು ಬಿದ್ದಿದೆ

ಹಾಡುತ್ತಲೇ ಕಾಡುತ್ತಿದೆ

ಸಾಕೆಂದು ಹೇಳೇ ಹುಡುಗಿ

ಎಂದು ಬೆನ್ನು ಬಿದ್ದಿದೆ ಕನಸಾಗಿ

 

 

ಹೆಣ್ಣು ಎಂದರೆ ಕ್ಯೂಬಾ

ಕ್ಯೂಬಾ ಎಂದರೆ ಹೆಣ್ಣು

ಅಗ್ನಿದಿವ್ಯದಲ್ಲಿ  ಬೆಂದುಹೋಗದೆ

ಸೆಟೆದು ನಿಂತು

ಹೊಸ ಹುಟ್ಟು ಪಡೆದು

ನಡೆದಿದೆ

ದಿಟ್ಟವಾಗಿ

ಎಲ್ಲದರೊಟ್ಟಿಗೆ ಮಾಗಿ

ಬೆನ್ನ ಹುರಿಯಾಗಿ

 

ಇದೇ ಹಾಡು

ಇದೇ ಹಾಡು

ಒಮ್ಮೆ ಹಾಡಿಬಿಡು

ಹಗುರಾಗಿಬಿಡು

ಎಂದು

ಕಾಡುತ್ತಲೇ ಇದೆ

ನನ್ನೆದೆಯ ಹಾಡು