ನಾಗರಾಜ್ ಹರಪನಹಳ್ಳಿ
-೧-
ತುಂಬ ದಿನಗಳ
ನಂತರ ನೀ ಭಾವಚಿತ್ರ
ಕಳುಹಿಸಿದೆ
ಅದು ಭಾವಗಳ ಬಡಿದೆಬ್ಬಿಸಿತು
-೨-
ತುಂಬಾ ದಿನಗಳ ನಂತರ
ಮಲ್ಲಿಗೆ ಹೂ ಮುಡಿದೆ
ಪ್ರತಿ ಹೂ ನನ್ನ ಮಾತಾಡಿಸಿತು
ಹೂ ಗಂಧ ಮನವ ತುಂಬಿ
ಊರಲ್ಲೆಲ್ಲಾ ಗುಲ್ಲು ಹಬ್ಬಿತು
-೩-
ಮೌನದಲ್ಲಿ ಧ್ಯಾನಿಸುತ್ತಿದ್ದ ನೀ
ಮಾತಾಡಲು ಶುರು ಮಾಡಿದೆ
ಎದೆಯ ತರಂಗಗಳು
ಅರುಣರಾಗ ಮಿಡಿದವು
-೪-
ಕಣ್ಣು ಕಣ್ಣು ಮಾತಾಡುವುದ
ಮರೆತಿದ್ದವು
ಒಂದೇ ಒಂದು ಚಿತ್ರ ಮಾತ್ರದಿಂದ
ಮಾತುಗಳು ಮರುಜನ್ಮ ಪಡೆದವು
-೫-
ಬೇಗಂ ,ನಿನ್ನ ಕಿವಿಗಳ ಅಂಚಿಗೆ
ತೂಗುವ ಗೋಪುರದಂಥ
ಕಿವಿಯೋಲೆ
ಗುಂಬಜ್ ನೆನಪಿಸಿದವು
ಅಲ್ಲಿ ಪ್ರೇಮವೇ ಜೋಕಾಲಿಯಲಿ
ನಲಿದಂತಾಯಿತ
-೬-
ಅದೆಷ್ಟೋ ದಿನಗಳಾದರೂ
ಒಂದೇ ಒಂದು ಕಣ್ಣೋಟ
ಬಂಧವ ಬೆಸೆದವು
ಕಣ್ಣೊಳಗಿನ ಬಿಂಬ ನಮ್ಮವೇ ಆಗಿದ್ದವು
-೭-
ತುಟಿಯಂಚಿನ ಸಿವಿಮಾತು
ನಮ್ಮ ಬೆಸೆದವು,
ಈ ಪ್ರೇಮವ ಕುರಿತು
ಗಿಡಮರದ ಕುಳಿತ
ಹಕ್ಕಿ ಪಕ್ಷಿಗಳು ಆಡಿಕೊಂಡವು
-೮-
ನನಗೆ ಒಂದೇ ದಿಗಿಲು !!!
ನಿನ್ನ ಸೀರೆಯ ಬಣ್ಣ ಮುಗಿಲಿಗೆ ತಾಗಿದೆ; ಅದು ಮೋಡಗಳಿಗೆ ಬಣ್ಣ ಬಳಿದಿದೆ ;
ಮೋಡ ಮಳೆಯಾಗಿ ನಿನ್ನೂರಲ್ಲಿ ಸುರಿದರೆ
ಪ್ರೇಮದ ಗುಲ್ಲು ನಿನ್ನೂರ
ಬೀದಿಗಳ ತಬ್ಬಿದರೆ ???
-೯-
ಇನ್ನೊಂದು ಆತಂಕ
ನಿನ್ನ ಪಾದಗಳ ಗೆಜ್ಜೆಗಳು
ನನ್ನನ್ನೇ ನೆನಪಿಸುತ್ತವೆ ಅಂತೆ
ಅವುಗಳ ಪಿಸುಮಾತು
ಬೀದಿರಂಪ ಮಾಡಿದರೆ ???
-೧೦-
ಒಂದೇ ಒಂದು ಆಶಾವಾದ ;
ಎಲ್ಲಾ ಗುಲ್ಲುಗಳಿಗೆ
ನೀ ನಕ್ಕು ತೇಲಿಸಿ ಬಿಡುವೆ;
ಹೃದಯದಿ ಮನದ ಮಾತ
ಭದ್ರವಾಗಿ ಕಾಪಾಡು
ಅರೆರೆ… ನಾಗರಾಜ್
ಫ್ರೆಶ್ನೆಸ್ ಹಾಗೂ ಲವಲವಿಕೆಯಿಂದ ಕೂಡಿ ಮಂದಹಾಸ ಮೂಡಿಸುತ್ತವೆ.