ದೇವನೂರು ಫೋಟೋ ಕಥೆಗೆ ಪೂರ್ಣ ವಿರಾಮ

ಶಂಕರ ಹಲಗತ್ತಿ

ಪ್ರಿಯರೆ,
ದೇವನೂರವರ ಫೋಟೊ ಕಥೆಯ ಎಳೆಗಳೆಲ್ಲವನ್ನು ‘ಅವಧಿ’ಯಲ್ಲಿ ಬಂದಿದ್ದನ್ನು ಓದಿದೆ. ತಡವಾಗಿ ಓದಿ ಪ್ರತಿಕ್ರಿಯಿಸುವುದಕ್ಕೆ ಕ್ಷಮೆ ಇರಲಿ. ‘ಅವಧಿ’ಯಲ್ಲಿ ಈ ಕಥೆಗೆ ಪ್ರತಿಕ್ರಿಯಿಸಿದವರಿಗೆಲ್ಲ ಈ ನನ್ನ ಭಾವನೆಗಳನ್ನು ತಲುಪಿಸುವಂತೆ ಮಾಡಿ. ಯಾಕೆಂದರೆ ನೆಟ್ದಲ್ಲಿ ನುಡಿ ತೆರೆದುಕೊಳ್ಳುತ್ತಿಲ್ಲ. ಅದಕ್ಕಾಗಿ ಫೈಲ್ ಮಾಡಿ ಕಳಿಸುತ್ತಿದ್ದೇನೆ.
ಮೊದಲಿಗೆ ಇಂಥದೊಂದು ವಿಚಾರಕ್ಕೆ ಕರ್ನಾಟಕ ವಿದ್ಯಾವರ್ಧಕ ಸಂಘವನ್ನು ಅವಧಿಯೊಳಗೆ ಸುದ್ದಿ ಮಾಡಿದ ಹಿರಿಯ ಮಿತ್ರ ಜಿ ಎನ್ ಮೋಹನ್ ಗೆ ಅಭಿನಂದಿಸುವೆ. ಕೆಲವರು ಸಂಘದ ಬಗ್ಗೆ ಹಗುರವಾಗಿ ಅಗೌರವ ಪದಗಳನ್ನು ಬಳಸಿ ಪ್ರತಿಕ್ರಿಯಿಸಿದ್ದು ಖೇದಕರ.

ಕರ್ನಾಟಕ ವಿದ್ಯಾವರ್ಧಕ ಸಂಘಕ್ಕೆ ಈಗ 124ರ ಸಂಭ್ರಮ. ತುಂಬಾ ಸುದೀರ್ಘವಾದ ನಡಿಗೆ. ಅದರ ನಡಿಗೆಯಲ್ಲಿ ಹಲವಾರು ತಪ್ಪೆಜ್ಜೆಗಳು ಆಗಿರಲಿಕ್ಕೆ ಸಾಕು. ಅದರಲ್ಲಿ ದೇವನೂರ ಮಹದೇವರ ಫೋಟೊವೂ ಒಂದು ಎಂದು ಭಾವಿಸಿರಿ. ಈ ಫೋಟೊದ ಬಗ್ಗೆ ತುಂಬಾ ಚರ್ಚೆಗಳು ನಮ್ಮ ಮಧ್ಯೆಯೂ ಆಗಿವೆ. ಹಲವಾರು ಈ ಫೋಟೊವನ್ನು ನೋಡಿದವರು ರಾಮಲು ಫೋಟೊ ಇಲ್ಲಿ ಏಕೆ ಹಾಕಿದಿರಿ ಎಂದವರೇ ಹೆಚ್ಚು. ನನಗೆ ಮೊದಲಿನಿಂದಲೂ ಕಾಡುತ್ತಿತ್ತು. ಈ ಕುರಿತಂತೆ ದೇವನೂರರನ್ನು ಬಲ್ಲ ನಾಗಮ್ಮನವರ ಜೊತೆಯೂ ಚರ್ಚಿಸಿದ್ದೆ. ಇದು ದೇವನೂರರ ಫೋಟಾನಾ! ಎಂದು. ಹೌದು ಎಂದಿದ್ದರು. ದೇವನೂರರವರ ವಿಚಾರ ಸಂಕಿರಣ ಕಾಲಕ್ಕೆ ಬಹಳಷ್ಟು ಸಾಹಿತಿಗಳು ಈ ಫೋಟೊವನ್ನು ನೋಡಿದವರಿದ್ದಾರೆ. ಹರೆಯದ ದೇವನೂರರ ಫೋಟೊ ಇರಬೇಕು. ಅಪರೂಪದ ಫೋಟೊ ಇದು ಎಂದು ಭಾವಿಸಿದವರೇ ಹೆಚ್ಚು.
ರೂಪಕ್ಕ ಫೋನ್ ಮಾಡಿ ‘ಅವಧಿ’ಯೊಳಗೆ ಜಿ ಎನ್ ಮೋಹನ್ ದೇವನೂರರದೆಂದು ಹಾಕಲಾದ ಸಂಘದಲ್ಲಿಯ ಫೋಟೊ ತೆಗೆದು ಹಾಕಿ ಯಾರು ಹೇಳಿ ಎಂದು ಕ್ವಿಜ್ ಏರ್ಪಡಿಸಿ ಸುದ್ದಿಮಾಡಿದ್ದು ತಿಳಿಸಿ, ಅದರ ಬಗ್ಗೆ ದೇವನೂರರನ್ನು ಕೇಳಿದ್ದು, ಅವರು ನಿರಾಕರಿಸಿದ್ದು, ನಂತರ ಹಲಗತ್ತಿಯವರಿಗೆ ಅದನ್ನು ತಕ್ಷಣ ತೆಗೆಸಲು ಹೇಳಿದ್ದು, ಮತ್ತೆ ಮತ್ತೆ ಫೋಟೊ ತೆರವು ಗೊಳಿಸಿದ ಬಗ್ಗೆ ಕೇಳಿ, ಅದು ಫೋಟೊ ಎಲ್ಲಿಂದ ಬಂದಿತು ಎಂಬುದರ ಬಗ್ಗೆ ಪತ್ತೆ ಮಾಡಿ ಹೇಳಿ ಎಂದು ರೂಪಕ್ಕ ನನಗೆ ಪತ್ತೇದಾರಿ ಕೆಲಸ ಹಚ್ಚಿದಳು. ನಾನು ಹೂಂ ಅಂದೆನೇ ವಿನಹ ಪತ್ತೆ ಕಾರ್ಯಕ್ಕೆ ಕೈ ಹಾಕಿರಲಿಲ್ಲ. ಏಕೆಂದರೆ ಆಗಲೇ ಅದು ದೇವನೂರರ ಫೋಟೊ ಅಲ್ಲ ಎಂದು ಗೊತ್ತಾದ ಕೂಡಲೇ ತೆಗೆದು ಇಡಲಾಗಿತ್ತು. ಅಲ್ಲದೇ ವಿಚಾರ ಸಂಕಿರಣದಲ್ಲಿ ದೇವನೂರರ ಫೋಟೊವೊಂದನ್ನು ಆಯ್ಕೆ ಮಾಡಿ ಸಿದ್ದಗೊಳಿಸಲು ಸೂಚಿಸಲಾಗಿತ್ತು. ಆದರೆ ಇಂದು ರೂಪಕ್ಕ ಕಳಿಸಿದ ಮೇಲ್ ತೆರೆದು ನೋಡಿದಾಗ ಒಂದಿಷ್ಟು ಗಾಬರಿ ಆಯಿತು. ಅಯ್ಯೊ! ಇಷ್ಟೊಂದು ಚರ್ಚೆ ಆಗಿದೆಯೆ ಎನಿಸಿ ಇದಕ್ಕೆ ಪ್ರತಿಕ್ರಿಯಿಸಲೇ ಬೇಕು, ಮತ್ತು ದೇವನೂರರ ಫೋಟೊ ಕಥೆಗೆ ಪೂರ್ಣವಿರಾಮ ನೀಡಬೇಕು ಎನಿಸಿ ಈ ಮಾಹಿತಿ ಮತ್ತು ಪ್ರತಿಕ್ರಿಯೆ ನೀಡುತ್ತಿದ್ದೇನೆ.

ಸಂಘದಲ್ಲಿ ಯಾವುದೇ ಫೋಟೊ ಹಾಕಬೇಕಾದರೆ ಒಂದು ಕ್ರಮವನ್ನು ಅನುಸರಿಸುತ್ತಾ ಬಂದಿದೆ. ಸಂಘದಲ್ಲಿ ಫೋಟೊ ಹಾಕುವ ಕುರಿತು ಯಾರಾದರು ತಿಳಿಸಿದ್ದರೆ ಅಥವಾ ಆಡಳಿತ ಮಂಡಳಿಯ ಯಾರಾದರು ಪ್ರಸ್ತಾಪಿಸಿದರೆ ಅದು ಮೊದಲು ಸಂಘದ ಕಾರ್ಯಕಾರಿ ಸಮಿತಿಯಲ್ಲಿ ಪ್ರಸ್ತಾಪಕ್ಕೆ ಬರುತ್ತದೆ. ಅವರ ಕುರಿತು ಚರ್ಚೆ ಆಗುತ್ತದೆ. ಫೋಟೊ ಹಾಕಲು ಯೋಗ್ಯ ಎಂದು ಸಭೆ ನಿರ್ಧರಿಸಿದ ನಂತರ ಅವರ ಫೋಟೊ ಪಡೆದುಕೊಳ್ಳುವ ಕಾರ್ಯ ನಡೆಯುತ್ತದೆ. ಬಹಳಷ್ಟು ಸಂದರ್ಭದಲ್ಲಿ ಸಾಲಿ ಫೋಟೊ ಸ್ಟುಡಿಯೋ ಇಲ್ಲವೆ ಮನೋಹರ ಗ್ರಂಥಮಾಲಾದಿಂದ(ಇವರು ಕರ್ನಾಟಕದ ಬಹುತೇಕ ಎಲ್ಲ ಸಾಹಿತಿಗಳ ಫೋಟೊಗಳ ಸಂಗ್ರಹ ಮಾಡಿದ್ದು ಎಲ್ಲರಿಗೂ ತಿಳಿದ ಸಂಗತಿ) ಸಾಹಿತಿಗಳ ಫೋಟೊಗಳನ್ನು ಪಡೆದದ್ದು ಹೆಚ್ಚು. ಸ್ಥಳಿಯರಾಗಿದ್ದು ಅವರು ಜೀವಂತವಿದ್ದಲ್ಲಿ ಅವರಿಂದ ಫೋಟೊ ಪ್ರತಿಯನ್ನು ಪಡೆದು ಹಾಕುತ್ತಾ ಬಂದಿದೆ.

ದೇವನೂರ ಮಹದೇವರ ಫೋಟೊ ಹಾಕಲು ನಿರ್ಧಾರ ತೆಗೆದುಕೊಂಡಿದ್ದು 27-5-2010ರಂದು ನಡೆದ ಕಾರ್ಯಕಾರಿ ಸಮಿತಿ ಸಭೆಯಲಿ. ಅಧ್ಯಕ್ಷ ಪಾಟೀಲ ಪುಟ್ಟಪ್ಪನವರು ಸೂಚಿಸಿದ ಹತ್ತು ಹೆಸರುಗಳಲ್ಲಿ ಇವರದು ಒಂದಾಗಿತ್ತು. ದೇವನೂರರ ಜೊತೆ ದ.ಬ. ಕುಲಕರ್ಣಿ, ಕೃಷ್ಣಕುಮಾರ ಕಲ್ಲೂರ, ವ್ಯಾಸರಾಯ ಬಲ್ಲಾಳ, ಕೊಡಗಿನ ಗೌರಮ್ಮ, ಎಂ.ಕೆ. ಇಂದಿರಾ, ತ್ರಿವೇಣಿ, ಆರ್ಯಾಂಬ ಬಟ್ಟಾಭಿ, ಪ್ರೇಮಾ ಭಟ್,  ಸೆಗೋ ಕುಲಕರ್ಣಿ ಯಶವಂತ ಚಿತ್ತಾಲ, ಮಾಲತಿ ಪಟ್ಟಣಶೆಟ್ಟಿಯವರ ಹೆಸರುಗಳನ್ನು ಅಧ್ಯಕ್ಷರು ಸೂಚಿಸಿದ್ದರು. ಅದನ್ನು ಕಾರ್ಯಕಾರಿ ಸಮಿತಿ ಒಪ್ಪಿ ಫೋಟೊ ಹಾಕಲು ನಿರ್ಧರಿಸಿ, ಇವರೆಲ್ಲರ ಫೋಟೊಗಳ ಪ್ರತಿಗಳನ್ನು ಮನೋಹರ ಗ್ರಂಥಮಾಲೆಯಿಂದ ಪಡೆದುಕೊಂಡು ಸಾಲಿಯವರಲ್ಲಿ ದೊಡ್ಡದು ಮಾಡಿಸಿ ಫೋಟೊ ಸಿದ್ದಗೊಳಿಸಿ ಹಾಕಲಾಯಿತು. ಈಗ ಸಂಘದಲ್ಲಿ ಹಾಕಲಾಗಿರುವ ಎಲ್ಲ ಫೋಟೊಗಳಲ್ಲಿಯ ವ್ಯಕ್ತಿಗಳ ಕಿರು ಪರಿಚಯ ದೊರೆಯುವಂತೆ ಐದು ಗ್ರಂಥಗಳಲ್ಲಿ ಪ್ರಕಟಿಸುವ ಯೋಜನೆ ಹಮ್ಮಿಕೊಂಡು, ಮೊದಲು ಸಂಗೀತ, ಜಾನಪದ, ನೃತ್ಯ, ಚಿತ್ರಕಲೆಯಲ್ಲಿಯ ಸಾಧಕರ ಪರಿಚಯಿಸುವ ‘ಸಾಂಸ್ಕೃತಿಕ ಧ್ರುವ ತಾರೆಗಳು’ ಕೃತಿಯನ್ನು ಪ್ರಕಟಿಸಿದೆ. ಉಳಿದಂತೆ ಉಳಿದವರನ್ನು ಪರಿಚಯಿಸುವ ಕೃತಿಗಳನ್ನು ಹೊರತರುವ ಪ್ರಯತ್ನ ನಡೆದಿದೆ.
ಮತ್ತೊಮ್ಮೆ ಸಂಘದ ಅಚಾತುರ್ಯವಾಗಿ ಆದ ತಪ್ಪನ್ನು ಸರಿಪಡಿಸಲು ಅವಕಾಶ ಕಲ್ಪಿಸಿದ ‘ಅವಧಿ’ ಗೆ ಪ್ರೀತಿಯ ವಂದನೆಗಳು.
 
ಶಂಕರ ಹಲಗತ್ತಿ
ಪ್ರಧಾನ ಕಾರ್ಯದರ್ಶಿ
ಕರ್ನಾಟಕ ವಿದ್ಯಾವರ್ಧಕ ಸಂಘ