ಡಾ.ಆರ್.ಜಯಶಂಕರ್ ಅವರು ನಮ್ಮ ನಡುವೆ ಇರುವ ಜನಪರ ಚಿಂತಕರು . ಈ ದೇಶದ ಕೋಟಿ ಕೋಟಿ ನತದೃಷ್ಟ ದೀನ ದಲಿತರ ಬಗ್ಗೆ ಅವರ ಬದುಕಿನ ಬದಲಾವಣೆಯ ಬಗ್ಗೆ ಸದಾ ಚಿಂತಿಸುವ ತರುಣ ಅರ್ಥ ಶಾಸ್ತ್ರಜ್ಞರು .

ಅತ್ಯಂತ ಕಷ್ಟದ ಹಿನ್ನಲೆಯಿಂದ ಬಂದರೂ ತಮ್ಮ ಪರಿಶ್ರಮ ಮತ್ತು ಪ್ರತಿಭೆಯಿಂದ ಮೇಲೇರಿ ಇನ್ನೂ ಅತಂತ್ರ ಸ್ಥಿತಿಯಲ್ಲಿರುವ ಗ್ರಾಮೀಣ ಸಹೋದರರಿಗೆ ಮಾದರಿಯಾದವರು. ಸದಾ ಚಟುವಟಿಕೆಯ , ಉತ್ಸಾಹದ ಬುಗ್ಗೆಯಂತಿರುವ ಜಯಶಂಕರ್ ಅವರ ಕಾರ್ಯ ಕ್ಷೇತ್ರ ವಿಶಾಲವಾದುದು. ಅವರ ಸ್ನೇಹಿತರ ಬಳಗವೂ ದೊಡ್ಡದು . ಮಾನವೀಯ ಮೌಲ್ಯಗಳ ಆರಾಧಕರ ಇವರು ನಮ್ಮ ಯುವ ಜನತೆಯ ಅತ್ಯುತ್ತಮ ನಾಯಕರಲ್ಲಿ ಒಬ್ಬರು.

ಪ್ರಸ್ತುತ ಕೃತಿ ಅವರ ಇತ್ತೀಚಿನ ಥಾಯ್ ಲ್ಯಾಂಡ್ ದೇಶದ ಪ್ರವಾಸಕಥನವಾಗಿದೆ . ಈ ಪ್ರವಾಸಕಥನ ಓಡಿಸಿಕೊಂಡು ಹೋಗುವ ಗುಣವನ್ನು ಹೊಂದಿದ್ದು ಇಲ್ಲಿ ಜಯಶಂಕರ್ ರವರು ಕೇವಲ ಚಿಂತಕರಷ್ಟೇ ಅಲ್ಲ.ಅವರು ಒಳ್ಳೆಯ ಲೇಖಕರೂ ಆಗಿದ್ದಾರೆ ಎಂಬುದನ್ನು ಸಾಬೀತುಪಡಿಸುತ್ತದೆ .ಕೃತಿಯ ಉದ್ದಕ್ಕೂ ಅವರ ಉತ್ಸಾಹ , ತುಂಟತನ , ಲವಲವಿಕೆ ಎದ್ದು ಕಾಣುತ್ತವೆ. ಥಾಯ್ ಲ್ಯಾಂಡ್ ಅನ್ನು ಒಬ್ಬ ಅರ್ಥಶಾಸ್ತ್ರಜ್ಞ ನಾಗಿ ಜಯಶಂಕರ್ ರವರು ಚಿಕಿತ್ಸಕ ದೃಷ್ಟಿಯಿಂದ ನೋಡಿದ್ದಾರೆ . ಆ ದೇಶದ ಲೈಂಗಿಕ ಪ್ರವಾಸೋದ್ಯಮದ ಇವರಿಗೆ ಮಾನವ ಸಮಾಜದ ದುರಂತಕ್ಕೆ ಹಿಡಿದ ಕನ್ನಡಿಯಂತೆ ಕಾಣುತ್ತದೆ . ಅಲ್ಲಿಯ ಮಹಿಳೆಯರ ಅಸಾಹಯಕತೆಗೆ ಇವರ ಹೃದಯ ಮರುಗುತ್ತದೆ. ಶೋಷಣೆಯಿಲ್ಲದ ಸುಂದರ ಸಮಾಜದ ಕನಸನ್ನು ಕಾಣುವ ಇವರಂಥ ಚಿಂತಕರಿಗೆ ಇದು ಸಹಜವೇ ಆಗಿದೆ.

ಇವರ ಜೊತೆ ಪ್ರವಾಸ ಹೋಗಿದ್ದ ಲೇಖಕ ಮಿತ್ರರಾದ ಲಕ್ಷ್ಮೀಪತಿ ಮತ್ತು ಮುನಿವೆಂಕಟಪ್ಪ ನವರ ಪಾತ್ರಗಳು ಈ ಕೃತಿಯಲ್ಲಿ ಜೀವಂತವಾಗಿ ಒಡಮೂಡಿವೆ . ಕೇಶವಮೂರ್ತಿಯವರಂಥಹ ವ್ಯಕ್ತಿಗಳ ಜೀವನದ ರೀತಿನೀತಿಗಳನ್ನು ಕಂಡಾಗ ಮನುಷ್ಯನ ಆತ್ಮವಂಚನೆಯ ಅಭಿವ್ಯಕ್ತಿ ಎಂತಹವರಿಗೂ ಮನದಟ್ಟಾಗುತ್ತದೆ. ಮಾನವೀಯ ಸ್ವಭಾವಗಳನ್ನು ಈ ಮೂಲಕ ಜಯಶಂಕರ್ ರವರು ಸುಂದರವಾಗಿ ಸಂಯಮದಿಂದ ಚಿತ್ರಿಸಿದ್ದಾರೆ . ಅಲ್ಲಿಯ ಆರ್ಥಿಕ ಸಾಮಾಜಿಕ ಪರಿಸ್ಥಿತಿಯನ್ನು ಒಬ್ಬ ವಿದ್ವಾಂಸರಾಗಿ ವಿಶ್ಲೇಷಿಸಿದ್ದಾರೆ .

ಸ್ವಾರಸ್ಯಕರವಾದ ಬರವಣಿಗೆಯುಳ್ಳ ಕುತೂಹಲವನ್ನು ಕೆರಳಿಸುತ್ತಾ ಹೋಗುವ , ಈ ಪ್ರವಾಸ ಕಥನ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಲೆಂದು ಹಾರೈಸುತ್ತೇನೆ . ತಮ್ಮ ಚೊಚ್ಚಲ ಕೃತಿಯ ಸಮರ್ಪಣೆಯ ಈ ಸಂದರ್ಭದಲ್ಲಿ ಜಯಶಂಕರ್ ರವರನ್ನು ಹಾರ್ದಿಕವಾಗಿ ಅಭಿನಂದಿಸುತ್ತೇನೆ .

– ಡಾ. ಸಿದ್ದಲಿಂಗಯ್ಯ