ಡಾ. ಪಿ. ಮನೋಹರ ಉಪಾಧ್ಯ

ಈ ವರ್ಷ ಜನವರಿಯಲ್ಲಿ ನಾನು ಓದಿದ ಬೆಂಗಳೂರಿನ ಪಶು ವೈದ್ಯ ಕಾಲೇಜಿನಲ್ಲಿ ಮಿತ್ರ ಡಾ .ಗಣೇಶ .ಎಂ . ಹೆಗಡೆ ನೀಲೇಸರರ ಎರಡು ಪುಸ್ತಕಗಳ ಬಿಡುಗಡೆ ಸಮಾರಂಭವಿತ್ತು. ಅನಿವಾರ್ಯವಾಗಿ ಹೋಗಲಾಗದ ಕಾರಣ, ಬಿಡುಗಡೆಯ ಮರುದಿನವೇ ಫೋನಾಯಿಸಿ ” ಮೊದಾಲು ಎರಡೂ ಪುಸ್ತಕ ಕಳುಹಿಸಿ ಮಾರಾಯ್ರೇ ” ಎಂದೆ. ಒಂದನೇ ಪುಸ್ತಕ – “ಭೂಮಿ ಬುಕ್ಸ್ ಪ್ರಕಾಶನದಲ್ಲಿ “ಡೇರಿ ಡಾಕ್ಟರ್ ಹೋರಿ ಮಾಸ್ಟರ್ “; ಎರಡನೆಯದು ಶಿರಸಿ ಓಣಿಕೇರಿಯ ಕೃಷಿ – ಋಷಿ ಬೆಂಗಳಿ ವೆಂಕಟೇಶರ “ಸುಸ್ಥಿರ ಕೃಷಿಗೆ ಹತ್ತಾರು ಹಾದಿ” , ಇದು ಕೃಷಿ ಮಾಧ್ಯಮ ಕೇಂದ್ರ, ಧಾರವಾಡದ ಪ್ರಕಟಣೆ. ಪುಸ್ತಕ ಬಂದ ಕೂಡಲೇ ” ಡೇರಿ ಡಾಕ್ಟರ್ —–“ನ ಎರಡು ಅಧ್ಯಾಯ ಮುಗಿಸಿ ಹೆಗ್ದೇರಿಗೆ ಫೋನ್ ಮಾಡಲೇಬೇಕಾಯ್ತು . ಎಲ್ಲಾ 20 ಅಧ್ಯಾಯಗಳೂ ಎರಡೇ ದಿನದಲ್ಲಿ ಮುಗಿದು ಹೋಯ್ತು. ಅಬ್ಬಾ! ಅಂತೂ ದೊರಕಿತಲ್ಲ, ಕನ್ನಡಕ್ಕೊಬ್ಬ ” ಜೇಮ್ಸ್ ಹೆರಿಯಟ್! “.

ಅಂದ ಹಾಗೆ ನಿಮಗೆ ತಿಳಿದಿರಬಹುದು, ಇಂಗ್ಲೆಂಡಿನ ಪಶುವೈದ್ಯ ಜೇಮ್ಸ್ ಹೆರಿಯಟ್ ನ ಬಗ್ಗೆ. ಒಬ್ಬ ಹಸು-ಹಂದಿ-ಕುದುರೆ – ಕೋಳಿ -ಆಡು- ಕುರಿ- ನಾಯಿ – ಬೆಕ್ಕು ಎಲ್ಲವನ್ನೂ ಚಿಕಿತ್ಸೆ ಮಾಡುವ ಸಾಮಾನ್ಯ ಪಶುವೈದ್ಯನೊಬ್ಬ ತನ್ನ ಚಿತ್ರ-ವಿಚಿತ್ರ ಅನುಭವಗಳನ್ನೆಲ್ಲ ದಾಖಲಿಸಿ ಅನೇಕ ಪುಸ್ತಕಗಳನ್ನು ಬರೆದದ್ದು, ಅವುಗಳ ಬಗ್ಗೆ ಚಲನಚಿತ್ರ – ಧಾರಾವಾಹಿಗಳಾಗಿ ಪ್ರಪಂಚದ ಕೋಟಿ ಕೋಟಿ ಮನೆ – ಮನಗಳನ್ನು ತಲುಪಿದ್ದು ಇತಿಹಾಸ. ಅಂತಹದೇ ಅನುಭವಗಳು ದಿನನಿತ್ಯದಲ್ಲಿ ಹೆಗಡೆ ಅಥವಾ ನನ್ನಂತಹ ಪಶು ವೈದ್ಯರುಗಳಿಗೆ ಮಾಮೂಲಿ ಎನಿಸಿದರೂ, ಹೆರಿಯಟ್ ದಾಖಲಿಸಿದ ಕ್ರಮ ಅನನ್ಯ, ಅಧ್ಭುತ .

ಹೆರಿಯಟ್ ಪುಸ್ತಕಗಳಲ್ಲಿ ಬರುವ ನೂರಾರು ಅನುಭವ ಕಥನಗಳಲ್ಲಿ ಆಯ್ದ 20 ಪ್ರಸಂಗಗಳನ್ನು ಹೆಗಡೆಯವರೇ ಪಶುವೈದ್ಯರಾಗಿ, ಅಲ್ಲಿ ಬರುವ ಪ್ರಾಣಿ ಹಾಗೂ ಇತರೆ ಪಾತ್ರಗಳೆಲ್ಲವೂ ಅವರ ಸುತ್ತುಮುತ್ತಲಿನವುಗಳೇ ಆಗಿ ಪುಸ್ತಕಗಳಲ್ಲಿ ಓಡಾಡಿಕೊಡಿದ್ದಾರೆ .

ಅಧ್ಯಾಯಗಳೇ ಹಾಗೆ. ಯಾವುದನ್ನೂ ಮೊದಲು ಓದಬಹುದು, ನಂತರವೂ. ಮಾರ್ಜಾಲ ನ್ಯಾಯದ ಜಲಜಮ್ಮ ಅಧಿಕಾರ ಚಲಾಯಿಸುವುದು; ಜೀವಂತ ಇರುವಾಗಲೇ ಡಾಕ್ಟ್ರನ್ನೇ ಫೋಟೋ ಫ್ರೇಮ್ ಹಾಕಿಸಿ ಆರಾಧಿಸುವ ಮಾಲಿನಿ ಶರ್ಮ; ನಾಯಿಯೇ ಜೀವವಾಗಿದ್ದ ರೌಡಿ ವಾಸು; ಕ್ರಿಸ್ಮಸ್ ಶುಭದಿನ ಬೆಳ್ಳಂಬೆಳಗ್ಗೆ ಆಡಿನ ಬಾಯಿಂದ ಹೊರಬಂದ ಚಡ್ಡಿ ; ಟೀವಿಗೂ ಬೇಕಾದ ಡಾಕ್ಟರ್ ; ವೈರಿ ಸತ್ಯಪಾಲನ ಹೆಂಡತಿ ಡಾಕ್ಟ್ರಿಗೆ ಪ್ರಿಯವಾದದ್ದು; ಗೋ ಡಾಕ್ಟ್ರ ಸೂಜಿಯಿಂದ ಬ್ರುಸೆಲ್ಲಾ ಅಂಟಿಸಿಕೊಂಡ ನಾಥಪ್ಪ ಗೋ ಡಾಕ್ಟ್ರ ಸೂಜಿಯಿಂದಲೇ ಗುಣವಾದದ್ದು; ಸೋಮಯ್ಯನೆಂಬ ಜಂಭದ ಕೋಳಿಗೆ ಕದಂ ಡಾಕ್ಟ್ರ ಮಸಾಲೆ ಮದ್ದು; ಆದರ್ಶಗಳ ಬೆನ್ನು ಹತ್ತಿ ಡೈರಿ ಸ್ಥಾಪಿಸಿ ಕೈ ಸುಟ್ಟುಕೊಂಡ ಕಿರೀಟಿ ; ಡಾಕ್ಟ್ರ ಕೈಗುಣ ಬಲಪಡಿಸಿದ ಬಕೆಟ್ ಒದೆಯುವ ಕರು;

ಬ್ರುಸೆಲ್ಲಾ ಕಾಯಿಲೆ ಹಿಡಿಸಿಕೊಂಡ ಡಾಕ್ಟ್ರು ಮತ್ತು ಮೆಂಟಲ್ ಲೀನಾ ಮಧ್ಯೆ ಕಿಚಿ ಕಿಚಿ; ಉಪ್ಪಿನಕಾಯಿ ಅಂಗಡಿಯ ಬೆಕ್ಕಿನ ಹೊಟ್ಟೆಯಲ್ಲಿ ಸಿಕ್ಕ ಕೂದಲುಂಡೆ ; ಜೀವ ಉಳಿಸಿದ ಗಂಟಿಯೇ ಜೀವ ಹೋಗುವಂತೆ ಜಾಡಿಸಿ ಒದ್ದದ್ದು; ಸಾರ್ವಜನಿಕವಾಗಿ ಮರ್ಯಾದೆ ತೆಗೆದ ಹಂಪಣ್ಣನಿಗೆ ಸವಾಲಾಗಿ ನಿಲ್ಲಬಹುದಾಗಿದ್ದ ಪೂಜಾರ್ರು ; ಕುದುರೆ ಶೋನಲ್ಲಿ ಸ್ಟ್ರಿಕ್ಟ್ ಆಗಿ ಮಾರ್ಕು ಹಾಕಿದ ಡಾಕ್ಟ್ರಿಗೆ ಕತ್ತೆಗಳ ತಿರಸ್ಕಾರ; ಕಸಾಯಿ ಖಾನೆಗೆ ಒಪ್ಪಿಸಿದ ವೀಣೆ ಹಸು ಓಡಿ ವಾಪಾಸು ಬಂದು ಧಾಕಪ್ಪನನ್ನು ಸೇರಿಕೊಂಡದ್ದು – ಹೀಗೆ ನವರಸ ಪಾಕದ ಜೀವಂತ ಸಂದರ್ಭಗಳಲ್ಲಿ ಓದುಗ ಒಂದೋ ಡಾಕ್ಟರ್ ಆಗುತ್ತಾನೆ; ಇಲ್ಲವೇ ಪ್ರಾಣಿಯ ಮಾಲಕನಾಗುತ್ತಾನೆ. ಇತರೆ ಪಾತ್ರಗಳೂ ಆಗಬಹುದು ; ಪ್ರಾಣಿಯಾಗಿಯೂ ಅನುಭವಿಸಬಹುದು. ಈ ಪುಸ್ತಕ ಓದುವವನಿಗೆ ಕೃಷಿ – ಗೋ ಸಂಪತ್ತು ಇರಲೇಬೇಕೆಂದಿಲ್ಲ. ಅವೆಲ್ಲವೂ ಇದೆಯೆಂಬ ಭ್ರಮೆಯನ್ನು ಆವರಿಸಿ ಎಲ್ಲಾ ಪ್ರಸಂಗಗಳಲ್ಲಿ ನಮ್ಮ ಪಾತ್ರಗಳನ್ನು ನಾವೇ ಕಂಡುಕೊಳ್ಳುತ್ತೇವೆ .

ಕಳೆದ 25 ವರ್ಷಗಳ ನನ್ನ ಪ್ರಾಕ್ಟೀಸಿನಲ್ಲಿ ಅರಿವಿದ್ದೋ- ಅರಿವಿಲ್ಲದೆಯೋ ಆಗಾಗ ಹೆರಿಯಟ್ ನ ನೆನಪಾಗುತ್ತಿದ್ದರೂ ಈ ಪುಸ್ತಕ ಓದಿದ ನಂತರ ” ಹೌದಲ್ಲ, ನನ್ನಲ್ಲೂ ಒಬ್ಬ ಹೆರಿಯಟ್ ಇದ್ದಾನೆ” ಎಂಬಷ್ಟರ ಮಟ್ಟಿಗೆ ನನಗೇ ನನ್ನ ಬಗ್ಗೆ ಹೆಮ್ಮೆ. ಹೆಗಡೆಯವರ ಭಾವಾನುವಾದವೇ ಹಾಗೆ, ಅವರು ಈ ಮೊದಲು ಮೂಲ ಕನ್ನಡಿಗರೇ ಅದ, ಗುಜರಾತಿ ಪಶು ವೈದ್ಯ, ಡಾ . ಹೆರಂಜಾಲರ ಆತ್ಮ ಕಥೆಯನ್ನು 2006ರಲ್ಲಿ ಇಂಗ್ಲೀಷ್ ನಿಂದ ಕನ್ನಡಕ್ಕೆ ಅನುವಾದಿಸಿದ್ದರು . ಅವರ ಭಾವಾನುವಾದ ಎಷ್ಟು ಸಮೃದ್ಧ ವಾಗಿತ್ತೆಂದರೆ ಮೂಲ ಲೇಖಕ ಹೆರಂಜಾಲರೇ ನನ್ನ ಬಳಿ ಒಮ್ಮೆ ” ಆ ಪುಸ್ತಕ ಮರಾಠಿ , ಗುಜರಾತಿ, ಹಿಂದಿ ಇತರೆ ಭಾಷೆಗಳಿಗೆ ತರ್ಜುಮೆಯಾಗಿದ್ದರೂ, ಹೆಗ್ಡೇರು ಬರೆದ ಹಾಗೆ ಈ ಹಿಂದೆ ಯಾರೂ ಬರೆದಿಲ್ಲ ” ಎಂದಿದ್ದರು . ಆ ” ಓರ್ವ ಪಶು ವೈದ್ಯನ ಅಪೂರ್ವ ಅನುಭವಗಳು ” ಪುಸ್ತಕ ಓದಿದ ನಂತರ ನಾನು ಹೆಗ್ಡೇರಿಗೆ ಫ್ಯಾನ್ ಆಗಿಬಿಟ್ಟೆ.

ನಾನು ಓದಿ ಪುಸ್ತಕ ಕೆಳಗಿಟ್ಟ ಕೂಡಲೇ ನನ್ನ ಹೆಂಡತಿಯೂ ಒಂದೇ ದಿನದಲ್ಲಿ ಓದಿ ಮುಗಿಸಿ, ತೆಗೆದ ಬಾಯಿಗೆ ” ಪಶುವೈದ್ಯ ವೃತ್ತಿಗೆ ಮಕ್ಕಳನ್ನು ಸೇರಿಸಬೇಕೋ ಬೇಡವೋ ಎನ್ನುವ ತಂದೆ ತಾಯಂದಿರೂ, ಅವರ ಮಕ್ಕಳೂ ಓದಲೇಬೇಕಾದ್ದು” ಎಂದು ವಗಾಯಿಸಿಬಿಟ್ಟಳು . ಪಶುವೈದ್ಯ ವೃತ್ತಿಯಲ್ಲಿ ಪ್ರಾಣಿಯೇ ಕೇಂದ್ರ ಬಿಂದು. ಮಾಲೀಕ, ವೈದ್ಯರು ಜೊತೆಗೆ ನೆರವಾಗುವವರು; ವೃತ್ತಿಯಲ್ಲಿ ಹಣವನ್ನೇನೋ ಯಥೇಚ್ಚವಾಗಿ ಸಂಪಾದಿಸಲಾಗದೇ ಇರಬಹುದು – ” ವೈವಿಧ್ಯವೇ ಸಮೃ ಧ್ಧಿ” ಎಂಬ ಪರಮ ಸತ್ಯ ಈ ಹೊತ್ತಿಗೆಯಲ್ಲಿ ಸ್ಪಷ್ಟವಾಗಿಯೇ ಬಂದಿದೆ.

ಪುಸ್ತಕ ಪ್ರಕಟಣೆಗೆ ಪ್ರೇರೇಪಿಸಿದ ಪತ್ರಕರ್ತ ನಾಗೇಶ್ ಹೆಗಡೆಯವರದ್ದೇ ಮುಖ ಪುಟ ವಿನ್ಯಾಸ; ಚಿತ್ರಕಲೆಯ ವಿದ್ಯಾರ್ಥಿನಿ ಶ್ವೇತಾ ಆಡುಕಲಾ ಅವರ ಆಕರ್ಷಕ ರೇಖಾ ಚಿತ್ರಗಳು – ಒಟ್ಟೂ ಸಮಗ್ರತೆಯನ್ನು ಎತ್ತಿ ತೋರಿಸುತ್ತವೆ .ಭೂಮಿ ಬುಕ್ಸ್ ನವರಿಗೆ ಕೃತಜ್ಞತೆಗಳು . ಪುಸ್ತಕದಲ್ಲಿ ಡಾ .ಗಣೇಶ ಎಂ ನೀಲೇಸರರ ದೂರವಾಣಿ, ಇ ಮೈಲ್ ವಿವರಗಳಿವೆ . ಓದಿ ಇಷ್ಟವಾದರೆ ಅವರಿಗೆ ಒಂದು ಥ್ಯಾಂಕ್ಸ್ ಹೇಳಿ . .