ಎಲ್ ಸಿ ನಾಗರಾಜ

ಫೇಸ್ ಬುಕ್ ನಲ್ಲಿ ಕೆಲವು ಪೋಸ್ಟುಗಳನ್ನ ಓದುತ್ತ ನನಗೆ ಹೀಗನಿಸಿತು

ಒಕ್ಕಲಿಗರು ಕುವೆಂಪು ಬಗ್ಗೆ ಯಾವುದೇ ಪೋಸ್ಟುಗಳನ್ನ ಹಾಕಬಾರದು , ಒಂದು ಪಕ್ಷ ಹಾಕಿದರೆ ಅವರು ಸ್ವಜಾತಿ ಪ್ರೇಮದಿಂದಲೇ ಹಾಕುತ್ತಿರಬಹುದು ; ಒಕ್ಕಲಿಗರು ಕುವೆಂಪು ಅವರು ಹುಟ್ಟಿದ ಕುಪ್ಪಳ್ಳಿಯ ಮನೆಗೆ ಹೋಗಲೇಬಾರದು. ಯಾಕೆಂದರೆ ಅವರು ಸ್ವಜಾತಿ ಪ್ರೇಮದಿಂದ ಹೋಗುತ್ತಿರಬಹುದು.ಇದರಿಂದ ಕುವೆಂಪು ಅವರು ಪ್ರತಿಪಾದಿಸಿದ ವಿಶ್ವಮಾನವತ್ವ ಎಷ್ಟೋ ಸಲ ಕೊಲೆಯಾಗಿಬಿಡಬಹುದು ಹೀಗೆ ಅನಿಸಲು ಕಾರಣ ಏನಾದರೂ ಇರಲಿ ಒಂದು ಸಮಸ್ಯೆಯಿದೆ , ಅದನ್ನ ವಿಂಗಡಿಸಿ ಹೇಳಬೇಕಾದ ಅಂದರೆ distinguish ಮಾಡಿ ಹೇಳಲೇಬೇಕಾದ ತುರ್ತು ಇದೆ.

ಒಬ್ಬರು ಲ್ಯಾಂಡ್ ಡೆವಲಪರ್ ಆಗಾಗ ನನ್ನ ಹುಡುಕಿಕೊಂಡು ಬರುತ್ತಿದ್ದರು , ಈ ಹಿಂದೆ ಅವರು ನನಗೆ ಸಹಜವಾಗಿ ಪರಿಚಯವಾದವರಲ್ಲ . ಕ್ರಮೇಣ ಅವರ ಗೊಣಗುಗಳು , ಅವರು ನಂಬಿಕೊಂಡಿದ್ದ ವಿಚಾರಗಳು ನನಗೆ ಜಿಗುಪ್ಸೆ ತರತೊಡಗಿದವು . ಅವರ ಗ್ಲಾಸಿಗೆ ಡ್ರಿಂಕ್ಸ್ ಸುರಿಯುತ್ತ ಹೇಳಿದೆ : ‘ ನೀವು ಕನ್ನಡ ಸಾಹಿತ್ಯ ಓದಲು ಶುರು ಮಾಡಿ , ನಿಮ್ಮ ಸುಮಾರು ಹತಾಷೆಗಳು , ಸಮಾಜದ ಬಗೆಗಿನ ಪೂರ್ವಾಗ್ರಹಗಳು ನಿಮ್ಮನ್ನ ಬಿಟ್ಟು ಹೋಗುತ್ತವೆ .

ಹೀಗೆ ನನ್ನ ಹುಡುಕಿಕೊಂಡು ಬರುತ್ತಿದ್ದ ಅವರು ಒಕ್ಕಲಿಗ ಜನಾಂಗಕ್ಕೆ ಸೇರಿದವರು. ಒಂದು ವಾರ ಕಳೆದು ಬಂದ ಅವರ ಲಗ್ಷುರಿ ಕಾರಿನ ತುಂಬಾ ಲಂಕೇಶ್ , ತೇಜಸ್ವಿ , ಅನಂತಮೂರ್ತಿ , ಮಾಸ್ತಿ ‌, ದೇವನೂರು ಮಹದೇವ , ಕುವೆಂಪು ಅವರ ಪುಸ್ತಕಗಳು ಕಂಡವು; ಇದಾಗಿ 4 ವರ್ಷ ಕಳೆದಿದೆ , ಈ ನಡುವೆ ಅವರು ಬರುವುದು ಕೂಡ ಕಡಿಮೆಯಾಗಿತ್ತು. ಬಹುಷಃ ಅವರು ಇನ್ನು ಮುಂದೆ ಬರಲಾರರು ಅನಿಸಿ ಮರೆತುಬಿಟ್ಡಿದ್ದೆ

ಆದರೆ ಒಂದು ದಿನ ಹೊತ್ತಲ್ಲದ ಹೊತ್ತಲ್ಲಿ ಫೋನ್ ಮಾಡಿ ‘ ಬರ್ತಿದೀನಿ ‘ ಎಂದರು ; ಕಂಪ್ಯೂಟರಿನಲ್ಲಿ ಕೆಲಸ ಮಾಡುತ್ತ ಕುಂತಿದ್ದ ನಾನು ‘ ಬನ್ನಿ ‘ ಎಂದೆ  ಬಂದು ಗ್ಲಾಸಿಗೆ ಡ್ರಿಂಕ್ಸ್ ಸುರಿಯುತ್ತ ‘ ನಿಮ್ಮನ್ನ ನೋಡಲೇಬೇಕು ಅನಿಸಿತು , ಬಂದುಬಿಟ್ಟೆ ‘ ಎಂದರು ಅವರ ಮಾತಿನಲ್ಲಿ ಮೊದಲಿನಂತೆ ವ್ಯಗ್ರತೆಯಾಗಲೀ , ಉಡಾಫೆ , ಅಸಹನೆ ಇದ್ದಂತೆ ಕಾಣಲಿಲ್ಲ .ಮೊದಲಿನ ವಾಚಾಳಿತನ ಕೂಡ ಕಾಣಲಿಲ್ಲ. ‘ಮಾಸ್ತಿಯವರ ಕತೆಗಳು ಚನ್ನಾಗಿರುತ್ತವೆ , ಒಡಲಾಳ ಕಾದಂಬರಿಯಲ್ಲಿ ಕೋಳಿ ಕಳೆದುಕೊಳ್ಳುವ ಸಾಕವ್ವ ನನಗೆ ಕಣ್ಣೀರು ತರಿಸಿದಳು . . . ‘ ಹೀಗೆ ಹೇಳುತ್ತಲೇ ಇದ್ದರು. ಡಾ.ಅನಂತಮೂರ್ತಿಯವರು Critical insider ಎಂಬುದೊಂದು ಪರಿಕಲ್ಪನೆ / ನುಡಿಗಟ್ಟು ಬಳಸುತ್ತಾರೆ . ನನಗಿದು practical ಆಗಿ ಕಾಣ್ತಿದೆ .

ಜಾತಿ ಈಗ ಒಂದು affinity ಯಾಗಿ ಮಾತ್ರ ಉಳಿದಿದೆ  ನಮ್ಮ ಕರ್ತವ್ಯ ಜಾತಿಗಳ ಒಳಗೆ Critical insider ಆಗಿರುವುದು. ಆದ್ದರಿಂದ ಸಂಘ ಪರಿವಾರದ ಗರ್ಭಗುಡಿಯಲ್ಲಿರುವ ಒಕ್ಕಲಿಗರಿಗಿಂತ ಕುಪ್ಪಳ್ಳಿಯ ಕುವೆಂಪು ಅವರ ಮನೆಗೆ ಹೋಗಿಬರುವ , ಅವರನ್ನಷ್ಟೇ ಅಲ್ಲ ಕನ್ನಡದ ಎಲ್ಲ ಲೇಖಕರನ್ನ ಓದುವ ಒಕ್ಕಲಿಗರು ಪ್ರಿಯರಾಗುತ್ತಾರೆ. ಇಂಜನಿಯರಿಂಗ್ ಓದುವಾಗ ನನಗೆ ಕಾರ್ಪೆಂಟ್ರಿ ಕ್ಲಾಸ್ ನಲ್ಲಿ ಒಬ್ಬರು Instructor ಇದ್ದರು , ನನಗೆ ತಿಳಿದಂತೆ ಅವರು ದಲಿತ ಸಮುದಾಯಕ್ಕೆ ಸೇರಿದವರು . ಒಂದು ದಿನ ನಾನು ಪ್ಲಂಬಿಂಗ್ ಕಲಿಯುತ್ತಿದ್ದಾಗ , ಹತ್ತಿರ ಬಂದ ಅವರು ಹೇಳಿದರು ” ಗಂಟುಗಳನ್ನ ಮಾತ್ರ ಪ್ಲಂಬಿಂಗ್ ಮಾಡು  ಸುಮ್ಮನೆ ಎಲ್ಲವನ್ನೂ ತೋಬಡ ಹೊಡೆದು ಬಿಸಾಡಬೇಡ

ಇದು ಒಂದು ವಾಕ್ಯ ಸಾಕು, ಫೇಸ್ ಬುಕ್ಕಿನ ಕೆಲವು‌ ಪೋಸ್ಟ್ ಗಳನ್ನ ನೋಡಿದಾಗ ನನಗೆ ಈ ವಾಕ್ಯ ನೆನಪಾಯಿತು ಕುಪ್ಪಳ್ಳಿಗೆ ನಾನಿನ್ನೂ ಹೋಗಿಲ್ಲ  ಹೋಗಿ ಬರಲು ನನಗೆ ಮುಜುಗರವೂ ಇಲ್ಲ  ನಾನು ತೋಪಡಾ ಹೊಡೆದು ಬಿಸಾಡುವ ಪೈಕಿಯವನಲ್ಲ