ಪೂರ್ಣಿಮಾ ಸುರೇಶ್
ನಾವು ಪ್ರಶ್ನೆಗಳ ಪ್ರಕಾರ ಗಣಿತ
ಗುಣಿತ ಕಲಿತವರು
ಸಮಸ್ಯೆಯ ಲೆಕ್ಕ ಬಿಡಿಸಿ ಅಂಕಗಳ
ಕಂಡವರು
ಅಡುಗೆ ಮನೆಯ ಕುಕ್ಕರ್
ಕೂಗಿದ ಸದ್ದಿಗೇ ಗಲಿಬಿಲಿ;
ಅಂತರಂಗದಲ್ಲಿ
ಒಳದನಿಗೆ ಗೀಚಿಟ್ಟ ಸರಳರೇಖೆಗಳೂ ಗೋಜಲು
ಅಲ್ಲೇ ಮೂಲೆಯಲ್ಲಿ!
ಅಂಗಳದ ರಂಗೋಲಿಗೂ
ಜ್ಯಾಮಿತಿಯ
ಚುಕ್ಕಿ- ಗೆರೆಗಳು;
ಚಿತ್ತಾರದ ಹುಮ್ಮಸ್ಸಿಗೆ
ಕಂಠಪಾಠ ಆಗಲೇಬೇಕು
ಸೂತ್ರ- ಪ್ರಮೇಯಗಳು
ಸಂಭ್ರಮಗಳನ್ನ ಸಿದ್ಧಸೂತ್ರ,
ಪ್ರಮೇಯಗಳಲ್ಲಿ ಕಟ್ಟಿಹಾಕಿದ
ಸೂತ್ರ ಕಗ್ಗಂಟುಗಳು
ಆಗ ಗೆರೆಗಳು ಬೆರಳ
ತುದಿಯಿಂದ ಇಳಿದು..
ಆದರೂ ಆಗೊಮ್ಮೆ ಈಗೊಮ್ಮೆ
ನುರಿತ ಬೆರಳುಗಳ
ಸಂದಿನಲ್ಲಿಳಿವ ವಕ್ರರೇಖೆಗಳು
ಬಣ್ಣಗೆಡಿಸಿಕೊಂಡಾಗ
“ಸುಮ್ಮನಿರಿ ಅಕ್ಕ,
ಇದೇನುಮಹಾ..
ಇಲ್ಲಿ ಕೊಡಿ”
ಹುಡಿಯನ್ನ ಬೆರಳುಗಳ ಕುಡಿಗಳು
ಸೆಳೆದು
ಸರಸರ ಎಳೆಯುತ್ತಾಳೆ…
ಬರೆಯೋ – ಗೆರೆಯೋ,
ತಪ್ಪು- ಸರಿ, ಗಣಿತ – ಕಾಗುಣಿತದ ಚಿಹ್ನೆಗಳೋ ..
ಸಲೀಸಾಗಿ ಬರೆದು
ರಂಗೋಲಿಯಂತೆಯೇ ಅವಳೂ
ನಿರಾಳ ನಗುವಾಗ..
ಇವಳ ಆಯಾಮಗಳ ತೆರೆಯದ
ಆಯಾಮಗಳಲ್ಲಿ ಅರಳುವ
ಛಂದವಿಲ್ಲದ ಚೆಂದ
0 ಪ್ರತಿಕ್ರಿಯೆಗಳು