ನಾಳೆಯಿಂದ ಒಂದು ವಾರ ಪ್ರತಿದಿನ ಬೆಳಿಗ್ಗೆ 6.30ರಿಂದ 15 ನಿಮಿಷ ನನ್ನದೊಂದು ಪರಿಸರ ಪ್ರವಚನವನ್ನು ‘ಡಿಡಿ ಚಂದನ’ದಲ್ಲಿ ಕೇಳಬಹುದು/ನೋಡಬಹುದು.
ನೀರು, ಮಣ್ಣು, ಗಾಳಿ, ಜೀವಿವೈವಿಧ್ಯ, ಹವಾಗುಣ ಏನುಪೇರು ಇತ್ಯಾದಿ ವಿಷಯಗಳ ಪ್ರಸ್ತಾಪವಿರುತ್ತದೆ. ನಾನೇನೂ ಪ್ರಚಂಡ ಉಪನ್ಯಾಸಕಾರ ಅಲ್ಲ. ವಾಚಾಳಿಯಲ್ಲ, ಟಿವಿ ನನ್ನ ಮಾಧ್ಯಮವೂ ಅಲ್ಲ. ಆದರೂ ಚಾನೆಲ್/ ರೇಡಿಯೊ ಕೇಂದ್ರದವರುು ನನಗಿಷ್ಟವಿಲ್ಲದಿದ್ದರೂ ಕರೆಯುತ್ತವೆ, ಏಕೆಂದರೆ ಇಂಥ ವಿಷಯಗಳಲ್ಲಿ ಭಾವರಂಜಕವಾಗಿ, ಆತ್ಮವಿಶ್ವಾಸದಿಂದ ಕ್ಯಾಮರಾ ಮುಂದೆ ಮಾತಾಡಬಲ್ಲ ಪರಿಣತರ ತೀವ್ರ ಕೊರತೆ ಇದೆ (ಅಂಥ ಪ್ರತಿಭಾವಂತರೆಲ್ಲ ರಾಜಕಾರಣ, ಸಿನೆಮಾ, ಕ್ರೀಡೆ ಅಥವಾ ವಾಸ್ತು- ಜ್ಯೋತಿಷಗಳಂಥ ಮೂಢನಂಬಿಕೆಗಳ ರಂಜನೀಯ ಕ್ಷೇತ್ರಗಳಲ್ಲಿ ಸಿದ್ಧಹಸ್ತರಾಗಿದ್ದಾರೆ).
ನಮ್ಮೆಲ್ಲರ ಬದುಕನ್ನು ಪ್ರಭಾವಿಸುವ ವಿಜ್ಞಾನ- ತಂತ್ರಜ್ಞಾನ, ವೈದ್ಯರಂಗ ಮತ್ತು ಕಾರ್ಪೊರೇಟ್ ಕಬಂಧ ಬಾಹುಗಳ ಬಗ್ಗೆ ಚೆನ್ನಾಗಿ ಮಾತನಾಡಬಲ್ಲ ಸಂವಹನಕಾರರ ತೀವ್ರ ಅಭಾವವಿದೆ. ಕಾಲೇಜಿಗಳ ಮಾಧ್ಯಮ ವಿಭಾಗದವರೂ ಅಂಥ ಪ್ರತಿಭೆಗಳನ್ನು ಪೋಷಿಸುತ್ತಿಲ್ಲ; ಚಾನೆಲ್‍ ಗಳು ಶೋಧಿಸುತ್ತಿಲ್ಲ. ಇಂದಿನ ನಾಳಿನ ಕನ್ನಡ ಮಾಧ್ಯಮಗಳ ಈ ಕೊರತೆಯನ್ನು ತುಂಬಬಲ್ಲ ಯಾರಾದರೂ ಇದ್ದರೆ, ಅವರಿಗೆ ಬೇಕಿದ್ದ ಮಾಹಿತಿಮೂಲಗಳನ್ನು ಸೂಚಿಸಲು ನಾನು ಸಿದ್ಧನಿದ್ದೇನೆ.
-ನಾಗೇಶ್ ಹೆಗಡೆ