ಲಕ್ಷ್ಮಿ ಕೆ ಬಿ
ಭಾವನೆಗಳ ತೀರದೆಡೆಗೆ
ಭಾವಯಾನ
ಭಾವದಲೆಗಳ ಮೊರೆತದಲಿ
ಮನ ವಿಲೀನ
ಹೋದವೆಲ್ಲಿ ನಿನ್ನ ಒಲವ
ಮಾರುತಗಳು?
ಇಂದು ಆರ್ಭಟಿಸಿವೆ
ಚಂಡಮಾರುತಗಳು
ಸುತ್ತುತ್ತಿವೆ ಸುರು ಸುರುಳಿ
ಸುಂಟರಗಾಳಿಗಳು
ಆವರಿಸಿವೆ ನನ್ನೊಲವ,
ಚಂಡಮಾರುತಗಳು
ನನ್ನೆದೆಯ ಕಡಲಿನಲ್ಲಿ
ಭಾವದಲೆಗಳ ಭರತ
ನಿತ್ಯ ನಿರಂತರ ನೆನಪಿನಲ್ಲಿ
ಒಲವಿನಲೆಯ ಭೋರ್ಗರೆತ
ಆಕ್ರೋಶದ ಅಲೆಗಳ ಅಬ್ಬರ
ಆತಂಕದ ಅಲೆಗಳ ಉಬ್ಬರ
ಕಡಲ ತೀರದ ಕೊರತ
ಮನದಂಗಳದಿ ಭಾವನೆಗಳ ಇರಿತ
ನಿನ್ನುಸಿರು ಸಾರುವ ತಂಗಾಳಿ
ಚಂಡಮಾರುತ ಹೊರುವ ಬಿರುಗಾಳಿ
ಮೇಘರಾಜನ ಆರ್ಭಟ
ಮನ ತತ್ತರಿಸುತ್ತಿರುವುದಂತೂ ದಿಟ
ಕಣ್ಣರಿವಿನಷ್ಟೂ
ಕಡಲ ತೀರ
ಭಾವನೆಗಳ ಹೊಡೆತಕ್ಕೆ
ಒಡಲು ಭಾರ
ಸರಳಿನಂಚಿನ ದೃಶ್ಯ
ಮನವಾಗಿಹುದು ವಶ್ಯ
ಚಂಡಮಾರುತದ ಇಳಿತ
ಮೌನಿ ಮನದ ಮೊರೆತ
0 ಪ್ರತಿಕ್ರಿಯೆಗಳು