ಡಾ. ಪ್ರೀತಿ ಕೆ ಎ
ನಿನ್ನ ಒಲವ ದೀಪವೊಂದು
ಸದಾ ಉರಿದಿದೆ
ಬದುಕು ಪೂರ್ತಿ ನನ್ನನ್ನು
ಬಿಡದೆ ಪೊರೆದಿದೆ
ಪ್ರೀತಿ, ಪ್ರಣಯ, ಪ್ರೇಮ, ಕಾಮಗಳಾಚೆಯೂ
ನಮ್ಮಿಬ್ಬರನ್ನು ಬಂಧಿಸಿಟ್ಟಿದೆ
ಮನಸ ಹಕ್ಕಿ ಎಲ್ಲೋ ಹಾರದಂತೆ
ನನ್ನ ತಡೆದಿದೆ
ಸುಂಯ್ಯನೆಂದು ಬೀಸಿದ ಹೊಸ ಗಾಳಿಗೆ
ಚೂರೂ ಬಳುಕದೆ
ಧೋ ಎಂದು ಸುರಿದ ಮಳೆಗೆ
ಒಂದಿನಿತೂ ಅಳುಕದೆ
ಬತ್ತಿಯೆಂದೂ ಕಿರಿದಾಗದೆ
ತೈಲವೆಂದೂ ಸೋರಗೊಡದೆ
ದೀಪ ಬೆಳಕು ಚೆಲ್ಲಿದೆ
ನಿನ್ನೊಲವ ಗಂಧವೊಂದು ಹಬ್ಬಿ ನಿಂತಿದೆ
ನನ್ನ ನಿನ್ನ ಕೈಗಳೆರಡೂ
ಒಂದಕ್ಕೊಂದು ಬೆಸೆದು ನಿಂತು
ದೀಪವೆಂದೂ ಆರದಂತೆ
ತಬ್ಬಿ ಹಿಡಿದಿದೆ
ಚೆಂದ ಒಲವು
ಅದು ಆರದ ದೀಪ