-ದಾಕ್ಷಾಯಣಿ ನಾಗರಾಜ ಮಸೂತಿ
 
ಈಗೀಗ
ನನ್ನದೇ ಭಾವಗಳಿಗೆ,
ತರತರದ ಮುಖವಾಡಗಳ
ಪ್ರಯೋಗ ಮಾಡುತ್ತೇನೆ;
ನೋವಿನ ಗೀರುಗಳು
ಕಾಣದಂತಿರಲು,
ನಗುವಿನ ಬಣ್ಣ ಹಚ್ಚುತ್ತೇನೆ
ನಿನಗೆ ತೋರದಿರಲು,,,,,
ಯಾವುದೋ ಸವಿನೆನಪಿಗೆ
ಕೆಂಪಾದ ಕೆನ್ನೆಯ ರಂಗನು
ಅಳಿಸಲು ಯತ್ನಿಸುತ್ತೇನೆ;
ನಿನಗೆ ಮುಜುಗರವಾಗದಿರಲೆಂದು,,,
ಯಾವುದೋ ಸೆಳೆತಕೆ
ಕರಗಿ,ನೀರಾದ ಒಲವನು
ನನ್ನದೆಂಬಂತೆ ಅಪ್ಪಿ ಮುದ್ದಾಡುತ್ತೇನೆ
ಮರುಕ್ಷಣವೇ;
ತಲ್ಲಣಿಸಿ,ಬಲವಂತದಿಂದ

ದೂರ ತಳ್ಳಿ ತಿರಸ್ಕರಿಸುತ್ತೇನೆ
ನನ್ನದೇ ಭಾವಗಳನು,,,,
ಕಹಿಸತ್ಯವ ಎದುರಿಸಲಾರದೆ
ಮರುಳಗಾಡಿನಲಿ
ಮೃಗತೃಷ್ಣಾದ
ಬೆನ್ನತ್ತಿ ಓಡುತ್ತೇನೆ,,,
ದಣಿದು ದಣಿದು
ಕಂಗಾಲಾಗುತ್ತೇನೆ,
ನನ್ನದೇ ಭಾವಗಳಿಗೆ
ಹೆದರಿ,, ನಡುಗುತ್ತೇನೆ,,
ನನ್ನೊಳಗಿನ ನನ್ನದೊಂದಿಗೆ
ನಿತ್ಯದ ತಿಕ್ಕಾಟ,,,,,ಹೋರಾಟ