ಅರುಣ್ ಕುಮಾರ್ ಜಿ
ಯದ್ವಾತದ್ವ ಫೈಟು, ಸುಖಾಸುಮ್ಮನೆ ಬಿಲ್ಡಪ್ಪು, ಮಚ್ಚುಲಾಂಗಿನ ಆರ್ಭಟ ಮತ್ತು ರಕ್ತದ ಕೋಡಿ… ಈ ಸಿದ್ಧಸೂತ್ರಗಳಾಚೆಗೆ ದುನಿಯಾ ಸೂರಿಯ ಕೆಂಡಸಂಪಿಗೆ ಬಿರಿದು ಮುದ ನೀಡಿದೆ. ಹಾಗಂತ ಇಲ್ಲಿ ರಕ್ತವೂ ಇದೆ, ಕ್ರೈಮು, ಥ್ರಿಲ್ಲರು ಸಿನಿಮಾದುದ್ದಕ್ಕೂ ಇದೆ, ನೈಜವಾದ ಫೈಟೂಇದೆ. ಆದರೆ ಅದೆಲ್ಲದರ ನಡುವೆ ತಣ್ಣಗಿನ ಶೈಲಿ, ಕೆಂಡಸಂಪಿಗೆಯ ಚೇತೋಹಾರಿ ಘಮಲು ಮಾತ್ರವೇ ಮನಸಿಗೆ ನಾಟುತ್ತದೆ. ಕಾಯ್ಕಿಣಿಯವರ ಹಾಡುಗಳು ಬಿಟ್ಟೂ ಬಿಡದಂತೆ ಕಾಡುತ್ತವೆ.
ಅಣ್ಣಾಬಾಂಡ್ ಸಿನಿಮಾದ ನಂತರ `ಸೂರಿ ಕತೆ ಮುಗೀತು’ ಅಂದುಕೊಂಡವರಿಗೆ ಉತ್ತರವೇನೋ ಎನ್ನುವಹಾಗಿದೆ ಕೆಂಡಸಂಪಿಗೆ. ಸಾಮಾನ್ಯಕ್ಕೆ ಸೂರಿ ನಿರ್ದೇಶನದ ಸಿನಿಮಾಗಳ ಕಥೆಯನ್ನು ಒಂದೇ ಸಾಲಿನಲ್ಲಿ ವಿವರಿಸೋದು ಕಷ್ಟ. `ಕೆಂಡಸಂಪಿಗೆ’ ಕೂಡಾ ಇದಕ್ಕೆ ಹೊರತಾಗಿಲ್ಲ.
ಮಾಫಿಯಾ ಟೀಂನಿಂದ ಸೀಜ್ ಮಾಡಿದ ದುಡ್ಡಲ್ಲಿ ಒಂದು ಪಾಲು ಸರ್ಕಾರಕ್ಕೆ ತೋರಿಸಿ, ಮಿಕ್ಕ ನಲವತ್ತೂ ಕೋಟಿ ಇಡಿಗಂಟನ್ನು ಸ್ವಾಹ ಮಾಡಲು ಸ್ಕೆಚ್ ಹಾಕುವ ಪೊಲೀಸ್ ಇಲಾಖೆಯ ಹಿರಿಯ ಅಧಿಕಾರಿಗಳು. ಇನ್ನೊಂದು ಕಡೆ ತನ್ನದೇ ಕಂಪನಿಯ ಕ್ಲೀನರ್ ಹುಡುಗ ತನ್ನ ಜೀವ ಕಾಪಾಡಿದ ಅನ್ನೋ ಕಾರಣಕ್ಕೆ ಅವನನ್ನೇ ಪ್ರೀತಿಸುವ ಹುಡುಗಿ, ಅದನ್ನು ತಿಳಿದ ಆಕೆಯ ಮಾಡ್ರನ್ ತಾಯಿ ದುಡ್ಡಿಗಾಗಿ ತಂತ್ರ ಮಾಡಿದ ಪೊಲೀಸ್ ಅಧಿಕಾರಿಯ ಹತ್ತಿರ ಡೀಲ್ ಕೊಡುತ್ತಾಳೆ. ಇಲ್ಲದ ಗಾಂಜಾ ಕೇಸಿಗೆ ಸಿಕ್ಕಿಸಿ ಹುಡುಗನನ್ನು ಜೈಲಿಗೆ ತಳ್ಳೋ ವ್ಯವಸ್ಥೆ ಮಾಡಿಸುತ್ತಾರೆ. ಆದರೆ ಜೈಲಿಗೆ ಕರೆದೊಯ್ಯುತ್ತಿದ್ದ ಎಸ್ಐ ನನ್ನು ಹುಡುಗ ಶೂಟ್ ಮಾಡಿ ತಪ್ಪಿಸಿಕೊಳ್ಳುತ್ತಾನೆ. ಊರು ಬಿಡುವ ಪ್ಲಾನಿನಲ್ಲಿದ್ದ ಅವನೊಟ್ಟಿಗೆ ಹುಡುಗಿಯೂ ಜೊತೆಯಾಗುತ್ತಾಳೆ. ಅಲ್ಲಿಗೆ ಕಥೆ ಊರಿಂದ ಊರು, ಬಸ್ಸು, ಲಾರಿ, ಕಾರು, ಕಡೆಗೆ ಲಾಡ್ಜಿಂದ ಲಾಡ್ಜಿಗಳಿಗೆ ಪ್ರಯಾಣ ಬೆಳೆಸುತ್ತದೆ.
ಇದೆಲ್ಲದರ ಮಧ್ಯೆ ಪ್ರಾಮಾಣಿಕ ಅಧಿಕಾರಿಯ ಕೈಗೆ ಹುಡುಗನ ಕೇಸು ತಗುಲಿಕೊಳ್ಳುತ್ತೆ. ಇನ್ವೆಸ್ಟಿಗೇಷನ್ ಆರಂಭಿಸುವ ಆ ಇನ್ಸ್ಪೆಕ್ಟರ್ ಕಂಡುಹಿಡಿಯುವ ಅಸಲಿ ವಿಚಾರವೆಂದರೆ, ಈ ಹುಡುಗ ಫೈರ್ ಮಾಡಿದ್ದು, ಎಸ್ಐ ಸತ್ತಿದ್ದು ಎಲ್ಲವೂ ಒಂದು ಹೈ ಡ್ರಾಮಾ ಆಗಿರುತ್ತದೆ. ಸತ್ತ ಎಂದು ಸುದ್ದಿಯಾದ ಎಸ್ಐನ ಫೋಟೋದಲ್ಲಿ ಎರಡು ಬೆರಳುಗಳಿರುವುದಿಲ್ಲ. ಹಾಗೆ ಅಂಗ ಊನವಾದವರು ಪೊಲೀಸ್ ಇಲಾಖೆಯಲ್ಲಿರುವಂತಿಲ್ಲ ಎಂಬ ಕ್ಲೂ ಹಿಡಿದು ಹುಡುಕಾಡುವ ಇನ್ಸ್ಪೆಕ್ಟರ್ಗೆ ಎಸ್ಐ ಹೆಸರಲ್ಲಿ ಸತ್ತಂತೆ ನಾಟಕವಾಡಿದವನು ಹಳೇ ರೌಡಿ ಎಂಬ ಸತ್ಯ ಗೊತ್ತಾಗುತ್ತದೆ. ಅಲ್ಲಿಗೆ ಹುಡುಗನನ್ನು ಯಾವುದೋ ಷಡ್ಯಂತ್ರಕ್ಕೆ ಸಿಕ್ಕಿಸಲಾಗಿದೆ ಎನ್ನುವುದನ್ನರಿತ ಇನ್ಸ್ಪೆಕ್ಟರ್ ಆ ಹುಡುಗ ಹುಡುಗಿಯರಿಬ್ಬರನ್ನೂ ಬಚಾವು ಮಾಡಲು ಶತಪ್ರಯತ್ನ ಮಾಡುತ್ತಾನೆ. ಕಡೆಗೆ ಆ ಹುಡುಗ ಹುಡುಗಿ ಬಹುಕುಳಿಯುತ್ತಾರಾ ಅನ್ನೋದೇ ಸಿನಿಮಾದ ಅಂತಿಮ ಸೀಕ್ರೆಟ್.
ಪ್ರತಿ ಫ್ರೇಮಿನಲ್ಲಿಯೂ ಬೆರಗು ಹುಟ್ಟಿಸುವಂಥಾ ಕ್ಯಾಮೆರಾ ಕೈಚಳಕ, ಮುದ ನೀಡುವ ಹಿನ್ನೆಲೆ ಸಂಗೀತವೂ ಸೇರಿದಂತೆ ಕೆಂಡಸಂಪಿಗೆ ಸಂಪೂರ್ಣ ಹೊಸತನದ ತಾಜಾ ಅನುಭೂತಿ ನೀಡುತ್ತದೆ. ಈ ಮೂಲಕ ಬಹಳ ವರ್ಷಗಳ ಹಿಂದೆ ಕಳೆದು ಹೋದಂತಿದ್ದ ಅಸಲೀ ಸೂರಿ ಶೈಲಿ ಮತ್ತೆ ಮರುಕಳಿಸಿದಂತಿದೆ.
Looks like another must-watch is in line!
This season has been extremely good for Kannada movie lovers, what with a lineup like Rangitaranga, Uppi2, Atagara and now this one..Keep them coming and take them everywhere.