ನಾಗರಾಜ ಹರಪನಹಳ್ಳಿ

**

ಸಮುದ್ರ

ಮೊದಲ ಸ್ನಾನ ಮಾಡಿದೆ 

ಥೇಟ್ ನೀ ಮಿಂದು ಬಂದ ಕ್ಷಣದ ಹಾಗೆ

ಇಡೀ ನಗರ ನಿನ್ನೆ ಮೊದಲ ಮಳೆಗೆ ಮಿಂದೆದ್ದಿತು;

ಈಗ

ತೊಳೆದಿಟ್ಟ ಹಣ್ಣಿನಂತೆ ಹೊಳೆಯುತ್ತಿದೆ

ಬಿಸಿಲ ಬೇಗೆ ಝಳಕ್ಕೆ 

ಭೂಮಿ ಬಿಟ್ಟ ನಿಟ್ಟುಸಿರು

ಬೆವರ ಸ್ನಾನ ಮಾಡಿತು; 

ಇನ್ನು ತಡೆಯಲಾಗದು ಎಂದ ಘಳಿಗೆ

ಕಾದು ಕಾದು ಬಯಸಿದ್ದ ಮಳೆ 

ಅಂತೂ ಬಂತು 

ಕಡಲು ಮುಗಿಲು ಒಂದಾದ ಹಾಗೆ 

ಇಳೆಯಲ್ಲಾ ಮಕ್ಕಳ ಕೇಕೆ ತುಂಬಿ ಹೋಗಿದೆ

ಮಳೆಯ ಮಿಂದು 

ನೀ ಹೊಸ ಸೀರೆಯುಟ್ಟು

ನವ ಉಲ್ಲಾಸದಿ ನಡೆದು ಬಂದೆ; 

ಭೂಮಿ ತೃಪ್ತಿಯಿಂದ ಪುಟಿದ್ದೆದ್ದ ಹಾಗೆ

ಚೈತನ್ಯ ಹಸಿರಾಗಿ ಸೆರಗು ಹೊದ್ದು ಮಲಗಿರಲು;

ಕನಸುಗಳು ಮೆರವಣಿಗೆ ಹೊರಟಿವೆ

ದಂಡೆಯಲ್ಲಿ ಕೈ ಕೈ ಹಿಡಿದು ನಡೆದ ಪ್ರೇಮಿಗಳಂತೆ 

ಮುಂಗಾರು ಕುಣಿಯುತ್ತಿದೆ 

ಕಡಲು ಅಬ್ಬರಿಸುತ್ತಿದೆ

ನದಿ ವೈಯಾರದಿ ಮುಗುಳ್ನಗುತ್ತಿದೆ 

ದಂಡೆ ತುಂಬಾ ಮಳೆಯ ಚಿತ್ರ ಹೊದ್ದಿದೆ