“ಎಲ್ಲಿಂದಲೋ ಬಂದವರು” ಸಿನೆಮಾಕ್ಕೆ ಲಂಕೇಶರು ಬರೆದ ಮೂರು ಹಾಡುಗಳು ಕನ್ನಡ ಚಿತ್ರರಂಗದಲ್ಲೇ ಬಲು ಅಪರೂಪದವು. ಅವುಗಳಲ್ಲಿ “ಕೆಂಪಾದವೋ…” ಹಾಡು ಅತ್ಯಂತ ಜನಪ್ರಿಯ. ಅದರ ಜೊತೆಗೇ “ಎಲ್ಲಿದ್ದೆ ಇಲ್ಲೀತಂಕ…” ಮತ್ತು “ಕರಿಯವ್ನ ಗುಡಿ ತಾವ…” ಹಾಡುಗಳನ್ನು ಇಲ್ಲಿ ಕೊಡುತ್ತಿದ್ದೇವೆ. ಪಠ್ಯವಾಗಿ ಅವನ್ನು ಓದಿಕೊಳ್ಳುವಾಗ ಸಿಗುವ ಖುಷಿ ನಿಮ್ಮದೂ ಆಗಲಿ ಎಂದು.
——————————————————–
ಕೆಂಪಾದವೋ ಎಲ್ಲಾ
ಕೆಂಪಾದವೋ
ಹಸುರಿದ್ದ ಗಿಡಮರ
ಬೆಳ್ಳಗಿದ್ದ ಹೂವೆಲ್ಲ
ನೆತ್ತರ ಕುಡಿಧಾಂಗೆ ಕೆಂಪಾದವೋ
ಹುಲ್ಲು ಬಳ್ಳಿಗಳೆಲ್ಲ
ಕೆಂಪಾದವು
ನೂರು ಕಂದಮ್ಮಗಳು
ಕೆಂಪಾದವು
ಜೊತೆಜೊತೆಗೆ ನಡೆದಾಗ
ನೀಲ್ಯಾಗಿ ನಲಿದಂಥ
ಕಾಯುತ್ತ ಕುಂತಾಗ
ಕಪ್ಪಾಗಿ ಕವಿದಂಥ
ನುಡಿನುಡಿದು ಹೋದಾಗ
ಪಚ್ಚಾಯ ತೆನೆಯಂಥ
ಭೂಮಿಯು ಎಲ್ಲಾನೂ
ಕೆಂಪಾದವೋ
ನನಗಾಗ ಕೆಂಪಾದವೋ
ಕೆಂಪಾದವೋ ಎಲ್ಲಾ
ಕೆಂಪಾದವೋ
* * *
ಕರಿಯವ್ನ ಗುಡಿ ತಾವ
ಅರಳ್ಯಾವೆ ಬಿಳಿ ಹೂವು
ಸೀಮೆಯ ಜನ ಕುಣಿದು ನಕ್ಕಾಂಗದ
ತುಂಟ ಹುಡುಗ್ಯಾರಲ್ಲಿ
ನೆವ ಹೇಳಿ ಬರುತಾರೆ
ಹರೆಯದಾ ಬಲೆಯಲ್ಲಿ ಸಿಕ್ಕಾಂಗದ
ಊರಿಂದ ನಾಕ್ ಹೆಜ್ಜೆ
ಹಾಕಿದರೆ ಕಾಣ್ತೈತೆ
ಚೆಂದಾಗಿ ಹರಿತಾಳೆ ಐರಾವತಿ
ಮಳೆಗಾಲ ಬಂದಾಗ
ಮೈಮರೆತು ಹರಿದವಳು
ಬ್ಯಾಸ್ಗ್ಯಾಗೆ ಬಸವಳಿದ ಐರಾವತಿ
ಕರಿಯವ್ನ ಗುಡಿ ತಾವ
ಪಣ ತೊಟ್ಟು ಗೆದ್ದವರು
ಇನ್ನೂ ಬದುಕೇ ಅವರೆ ಸರದಾರರು
ಕಟ್ಟೊಡೆದು ಬಡಿದಾಡಿ
ಉಯ್ಯಾಲೆ ತೂಯ್ದಾಡಿ
ಮನಸಾರೆ ಮೆಚ್ಚಿಸಿದ ಸರದಾರರು
ಅಲ್ಲೊಂದು ಗಿಣಿ ಕೂತು
ಕಥೆಯೊಂದ ಹೇಳೈತೆ
ಕೇಳಾಕೆ ನಾನಿಲ್ಲ ಊರೊಳಗೆ
ಕಥೆ ನಡೆದ ದಿನದಿಂದ
ಕೆಂಪಾಗಿ ಹರಿದವಳೆ
ಕಥೆಗಳಾ ಮಾರಾಣಿ ಐರಾವತಿ
ಕರಿಯವ್ನ ಗುಡಿ ತಾವ
ಅರಳ್ಯಾವೆ ಬಿಳಿ ಹೂವು
ಸೀಮೆಯ ಜನ ಕುಣಿದು ನಕ್ಕಾಂಗದ
ತುಂಟ ಹುಡುಗ್ಯಾರಲ್ಲಿ
ನೆವ ಹೇಳಿ ಬರುತಾರೆ
ಹರೆಯದಾ ಬಲೆಯಲ್ಲಿ ಸಿಕ್ಕಾಂಗದ
* * *
ಎಲ್ಲಿದ್ದೆ ಇಲ್ಲೀತಂಕ
ಎಲ್ಲಿಂದ ಬಂದ್ಯವ್ವ
ನಿನ ಕಂಡು ನಾನ್ಯಾಕೆ ಕರಗಿದೆನೊ
ಸುಡುಗಾಡು ಹೈದನ್ನ
ಕಂಡವಳು ನೀನ್ಯಾಕೆ
ಈಟೊಂದು ತಾಯಾಗಿ ಮರುಗಿದೆಯೊ
ನೂರಾರು ಗಾವುದ
ಬಂದಿದ್ದೆ ಕಾಣವ್ವ
ಬಂದಿಲ್ಲ ಅನಿಸಿತ್ತು ನೋಡಿದರೆ
ಇಲ್ಲೇ ಈ ಮನೆಯಾಗೆ
ಹುಟ್ಟಿದ್ದೆ ಅನಿಸಿತ್ತು
ನಿನ್ನನ್ನ ಆ ಗಳಿಗೆ ನೋಡಿದರೆ
ಎಲ್ಲಿದ್ದೆ ಇಲ್ಲೀತಂಕ
ಎಲ್ಲಿಂದ ಬಂದ್ಯೆವ್ವ
ನಿನ ಕಂಡು ನಾನ್ಯಾಕೆ ಕರಗಿದೆನೊ
ನನಗೆ ಸಂಗೀತ ಕೇಳೋದಕ್ಕೆ ಮಾತ್ರ ಗೊತ್ತು.
ಈ ಗೀತೆಗಳನ್ನ ಓದಿದಾಗ ಹಾಡಿನ melody ಪದಗಳ ತೂಕವನ್ನ ಹಿಂದಿಕ್ಕಿಬಿಡುತ್ತಲ್ಲ ಅನಿಸಿತು.
ಅವಧಿ ಇಂಥ ಅಪರೂಪದ ಕೆಲಸ ಮತ್ತೆ ಮತ್ತೆ ಮಾಡುತ್ತಿರಲಿ.
ಲಂಕೇಶ್ಗೆ ಇದ್ದ ಭಾಷೆಯ ಶಕ್ತಿಯನ್ನು ಈ ಪದ್ಯಗಳು ಮತ್ತೊಮ್ಮೆ “ನಮ್ಮ ಮುಖಕ್ಕೆ ರಾಚುತ್ತವ”. ಕೋಟ್ಸ್ ನಲ್ಲಿ ಕೊಟ್ಟಿದ್ದು ಯಾಕೆಂದರೆ, ಭಾಷೆಯಲ್ಲಿ ದೃಷ್ಯ ಹಾಗು ಭಾವವನ್ನು ಕಾಣುವ ಅಪೂರ್ವವಾದ ಶಕ್ತಿ ಇದ್ದದ್ದು ಲಂಕೇಶ್ ಗೆ ಮಾತ್ರ ಎಂಬ ವಾಸ್ತವವನ್ನು ಕನ್ನಡದ ಸಭ್ಯರು ಇಂದಿಗೂ ಒಪ್ಪಿಕೊಳ್ಳಲು ತಯಾರಿಲ್ಲ. ಆ ರೂಪಕ ಕಾವ್ಯಕ್ಕೆ ಲಂಕೇಶ್ ಯಾಕೆ ಆಷ್ಟು ಅಂಟಿಕೊಂಡಿದ್ದರು ಎನ್ನುವುದನ್ನು ಅವರ ಪ್ರತಿ ಪದ್ಯವೂ ತೋರುತ್ತದೆ, ಈ ಪದ್ಯಗಳೂ ತೋರುತ್ತವೆ. ’ಎಲ್ಲಿಂದಲೋ ಬಂದವರು’ ಸಿನಿಮ ನೋಡದ, ಹಾಡುಗಳನ್ನು ಕೇಳದ ಮಂದಿ ಕೂಡ ಈ ಪದ್ಯಗಳನ್ನು ಓದಿ ದೃಷ್ಯಗಳನ್ನು ಕಟ್ಟಿಕೊಳ್ಳಲು ಕಣ್ಮುಚ್ಚಿದರೆ, ಆ ಸಿನಿಮಾದ ಆ ಸೀನೂಗಳು ಹಾಗೆ ಕಣ್ ಮುಂದೆ ಬರುತ್ತವೆ. ಅದಲ್ಲವೇ ಭಾಷೆಯ, ಕಾವ್ಯದ ಶಕ್ತಿ!
ಈ 3 ಹಾಡೂ ನನ್ನ ಫೇವರಿಟ್. ಅವುಗಳ ಜೊತೆ ತುಂಬಾ ಕಾಲ ಜೀವಿಸಿದ್ದೆ ನಾನು. ಥ್ಯಾಂಕ್ಯೂ ಸರ್, ಇಂಥ ಹಾಡುಗಳನ್ನು ನೆನಪಿಸುವ ಮೂಲಕ ನನ್ನನ್ನು ಮತ್ತೊಂದು ಕಾಲಕ್ಕೆ ಕೊಂಡೊಯ್ದಿದ್ದಕ್ಕೆ.
-ಜೋಗಿ