ಸುಚಿತ್ರಾ ಹೆಗಡೆ
ಬೆಳಕ ಬಸಿದು ಇರುಳಿನ ಅನ್ನ
ಅರಳುವ ಹೊತ್ತು
ಚುಕ್ಕೆಗಳಂಗಡಿ ಸಾಲು
ಹುಣ್ಣಿಮೆ ಸಂತೆಯಲಿ
ನದಿ-ದಂಡೆಯ ಹುಚ್ಚು ಪ್ರೀತಿಗೆ
ತಿಂಗಳಬೆಳಕಿನ ಕಣ್ಣು ಕಿಸಿರಾಗಿತ್ತು
ಕಡಲು ಓಡೋಡಿ ಬಂಡೆಯ ತೊಡೆಯೇರಿ
ಕುಲು ಕುಲು ನಕ್ಕಾಗ
ಚಂದ್ರ ಬಿಸಿಯೇರಿ ಕಡಲ ಸೆಳೆದೊಯ್ದ
ಅಲೆಗಳ ಕುಸುಕುಸು ಕೊಸರಾಟ
ದೂರದಲಿದ್ದ ಹಡಗೇಕೊ ನಿಂತಲ್ಲೇ ಹೊಯ್ದಾಡುತ್ತಿತ್ತು.
ಕ್ಷುದ್ರ ಜಂತುಗಳ ರೇವು ಪಾರ್ಟಿಗೆ
ನಿಶೆಯ ಕಂಡೂ ಕಾಣದ ಕುಮ್ಮಕ್ಕು
ಕಪ್ಪು ಮುಸುಗಿನ ಒಳಗೆ
ಕಾಣದ ಕೈಗಳ ಮಾಯದಾಟ
ರಾತ್ರಿಯ ಪಾಪದ ಕೊಡ
ತುಂಬಿ ತುಳುಕುವ ಸಮಯ
ಬಾನಿನ ಹೊಟ್ಟೆ ಸೀಳಿ ಹೊರ ಬಂದ
ಬಂದ ರವಿ ಕತ್ತಲ ಹುಟ್ಟಡಗಿಸಿದ!
…ಬೆಳಕ ಬಸಿದು ಇರುಳಿನ…
0 ಪ್ರತಿಕ್ರಿಯೆಗಳು