ಹಂಗಿನರಮನೆ
ನಾ ದಿವಾಕರ
ಸದಾ ಹಂಗಿಸುತ್ತಲೇ ಇರುತ್ತವೆ
ನೆನಪುಗಳು
ಮನದಾಳದ ಭಾವಗಳು
ಅನ್ನದಗುಳಿನ ಪಳೆಯುಳಿಕೆಗಳು ;
ಮುಂದಡಿಯಿಡುವ ಮುನ್ನ
ಹಿಂದಣದ ಕನಸುಗಳ ನೆನೆವಾಗ
ಆಂತರ್ಯದಲಿ ಬಿತ್ತ ಬೀಜಗಳು
ಮೊಳೆಯುತ್ತವೆ ಶುಷ್ಕ
ಗಿಡಗಂಟಿಗಳಂತೆ !
ಅಡಿಗಡಿಗೂ ಪದತಳಕೆ
ಚುಚ್ಚಿದ ಮೊನಚು ಮಾತುಗಳು
ನಾಟುತ್ತವೆ ಆತ್ಮದಾಂತರ್ಯದಲಿ
ವಲ್ಮೀಕಗಳಣುಗಳಲಿ ;
ಬೆತ್ತಲೆಯಲ್ಲವೇ ಬೆಳಕು
ಬೆತ್ತಲೆಯಲ್ಲವೇ ನೆನಪು
ಬಯಲಾಟದ ಬದುಕಿನ
ಚೆಲ್ಲಾಟಗಳು ಪಲ್ಲಟಗೊಳಿಸುತ್ತವೆ
ಹೆಜ್ಜೆಗುರುತುಗಳನು !
ಋಣಾನುಬಂಧಗಳನೆಣಿಸಲು
ಪಿಂಡ ಮಾನದಂಡ ?
ಸಂಬಂಧಗಳ ಸೇತು ಕಡಿದಾಗ
ಎತ್ತ ವಾತ್ಸಲ್ಯದ ಚಿತ್ತ ?
ತೃಣಮಾತ್ರದ ಋಣ
ಪರಮಾಣುವಿನಂತೆ ಸ್ಪೋಟಿಸಿದಾಗ
ಅಸ್ಥಿ ವಿಜೃಂಭಿಸುತ್ತದೆ
ವೈತರಣಿಯ ಹರಿವಿನಲಿ
ಪಯಣಿಸಲಹುದೇ ನೊಂದ ಜೀವ !
ಭುವಿಯ ಕಣದೊಳಂತರ್ಗತವಾದ
ಪಂಜರಕೇತರ ದಾಹ
ಭೌತದೊಳವತರಿಸಿ ವಿಹರಿಸುವ
ಭಾವಗಳಿಗೇನು ಮೋಹ
ಎಲ್ಲವೂ ಮಿಥ್ಯೆ ; ಮಣ್ಣೊಳಗಿನ
ಅಸ್ತಿಗೆನಿತು ಕಾತರ
ಸಂಬಂಧಗಳ ಹೊಸೆದು
ಬೆಸೆದು ಬಂಧಿಸುವ ನಶ್ವರ
ದೇಹಕೆನಿತು ವ್ಯಾಮೋಹ
ಎಲ್ಲವೂ ಅರ್ಧಸತ್ಯ !
ಆತ್ಮದ ಹೊದಿಕೆ
ಕಳಚಿದಾಗ ಆಂತರ್ಯ ಕಂಪಿಸುತ್ತದೆ
ಜಡ್ಡುಗಟ್ಟಿದ ಹೃದಯ
ಪರಿತಪಿಸುತ್ತದೆ ಪ್ರೀತಿ ಅರಸುವ
ಮನಸು ಮಸುಕಾಗುತ್ತದೆ ;
ವರ್ತಮಾನಗಳ ಕನಸುಗಳಿಗೆ
ಭೂತ ಭವಿತವ್ಯಗಳ
ಭ್ರಮೆಯಾವರಿಸಿದಾಗ
ಅಸ್ತಿತ್ವವಿಲ್ಲದ ಅಸ್ಥಿ
ಧಿಗ್ಗನೆದ್ದು ನಡೆಯುತ್ತದೆ
ನೆನಪುಗಳ ಛಾಯೆಯಲಿ !
ಹೆಜ್ಜೆಗಳ ಜಾಡು
ಮಧುವನರಸಿದರೂ
ಬಾಳು ಮಧುವಂಚಿತವೇ ;
ಇರಲಿ ಇಹಪಯಣದಲ್ಲಿರದ
ಮಧು ದೇಹದಲಡಗಿದೆ
ಮೇಹದೊಡನೆ ದಿಂಗತದಂಚಿಗೆ
ಕರೆದೊಯ್ಯಲು ;
ಪಂಚಭೂತಗಳನಪ್ಪಿದ ಜೀವಕೆ
ಅಗುಳಿನ ಹಂಗೇಕೆ
ಆತ್ಮಸಾಕ್ಷಿಗೆ ಪ್ರೀತಿಯೇ ಪ್ರಧಾನ
ಅಂತರಾತ್ಮಕೆ ಏಕೆ
ಪಿಂಡ ಪ್ರಧಾನ !
(ಮಣ್ಣೊಳಗಿನ ಅಸ್ತಿಗೆನಿತು) – ಇಲ್ಲಿ ಅಸ್ಥಿ ಎಂದಾಗಬೇಕಿತ್ತು. ದೋಷಕ್ಕಾಗಿ ವಿಷಾದವಿದೆ ಕ್ಷಮೆ ಇರಲಿ.
ಅಬ್ಬಾ ,,,,,,,,, ಹಂಗಿನ ಅರಮನೆ,,,,, ಸುಂದರ ಭಾವ
ಚೆನ್ನಾಗಿದೆ.
uttam kavana divakar..
olleya kavan