ರಾಜೇಶ್ವರಿ ಚನ್ನಂಗೋಡ್ 

ಮುಂದಿನ ಸಿಮೆಂಟು ಕಟ್ಟಡದ ಮೈಮೇಲೆ
ಮಳೆಹನಿಗಳು ರಂಗೋಲಿಯಾಗತೊಡಗಿದಂತೆ
ನಿನ್ನೆ ರಾತ್ರಿ ಸರಿದು ಹೋದ
ಮಾತೆಲ್ಲ ಬಂದೆರಗುತ್ತದೆ

ಯಾವ ಯಾಮ? ಎರಡು? ಮೂರು?
ಯಾಮಗಳ ಗಡಿಗಳೆಡೆಯ ಕಂದರಗಳಲ್ಲಿ
ನೀನು ಕಾಣೆಯಾಗುತ್ತೀ
ಮುರಳಿಯ ಸ್ವರವೆಲ್ಲ ಮಳೆಯಾಗುತ್ತಿದೆ.

ನಾನು ಮಳೆಯ ಹನಿಹನಿಯಲ್ಲೂ
ಹಾಡು ಹುಡುಕುತ್ತೇನೆ
ಹಪಹಪಿ, ವಿರಹ, ಪರಿತಾಪಗಳಂಥಾ ಪದಗಳು
ಚೂರೇಚೂರು ತೆರೆದು ನಿಲ್ಲುತ್ತವೆ

ನಿನ್ನ ಧ್ವನಿರಹಿತ ಮಾತುಗಳಲ್ಲಿದ್ದ
ಬಂಧನದಲ್ಲಿ ನಾನು ಮುಲುಗುತ್ತೇನೆ
ಯಾಕೆ ಬರಬೇಕಿಂಥಾ ಮಳೆ?

ಹನಿಸಿ ಹೋಗಾಯ್ತು, ಬೆಳಕು ಮೂಡಾಯ್ತು
ನೀನು? ಯಾವುದೋ ಬೆಟ್ಟದ ಹಸಿರಲ್ಲಿ
ಏನೋ ಹುಡುಕಿ, ಸಿಗದೆ
ಕಂಗಾಲಾಗಿ ಕುಳಿತಿರಬಹುದಾದ
ನೀನು?