ಅನಂತ್ ಶಾಂಡ್ರೇಯ

ನಾನು ಈಗ ಹೇಳ ಹೊರಟಿರುವುದು, ಡೇರ್ ಡೆವಿಲ್ ಮುಸ್ತಫಾ ಸಿನಿಮಾ ಬಗ್ಗೆ ಅಲ್ಲ, ತೇಜಸ್ವಿಯವರ ಕಟ್ ಔಟ್ ಮುಂದೆ ನಿಂತಿರುವ ಕಾರಿನ ಬಗ್ಗೆ ಈ ಕಾರಿಗೊಂದು ಕಥೆ ಇದೆ, ನಿಮ್ಮಲ್ಲಿ ಯಾರಾದರೂ ಊಹೆ ಮಾಡಿದ್ದರೆ ನಿಜ ಇದು ತೇಜಸ್ವಿಯವರ ಕಾರು!!! 2003 ರ ಮಾಡೇಲ್ಲಿನ ಈ ಓಪಲ್ ಆಸ್ಟ್ರಾ ಕಾರು ತೇಜಸ್ವಿಯವರ ಓಡಾಟದ ಸಂಗಾತಿಯಾಗಿತ್ತು. ಬೆಳ್ಳಿ ಬಣ್ಣದ,9999 ಎಂಬ ಫ್ಯಾನ್ಸಿ ನಂಬರ್ ಇರುವ ಈ ಕಾರನ್ನು 2003 ರಲ್ಲಿ ತೇಜಸ್ವಿ ಖರೀದಿ ಮಾಡಿದ್ದರು, ತೇಜಸ್ವಿಯವರಿಗೆ ಫ್ಯಾನ್ಸಿ ನಂಬರ್ ಪ್ಲೇಟ್ ನ ಹುಚ್ಚಿತ್ತೆ? ಈ ನಂಬರ್ ಪಡೆಯಲು ಎಷ್ಟು ದುಡ್ಡು ಕೊಟ್ಟರು ಎಂದೆಲ್ಲ ಕೇಳಬೇಡಿ ಅವರೇನೂ ಬಯಸಿ ಈ ನಂಬರ್ ಪಡೆದಿರಲಿಲ್ಲ, ತೇಜಸ್ವಿಯವರ ಆತ್ಮೀಯ ಗೆಳೆಯರೂ, ಆಗ ಸಾರಿಗೆ ಇಲಾಖೆಯ ಕಮಿಷನರ್ ಆಗಿದ್ದ ಐ ಎ ಎಸ್ ಅಧಿಕಾರಿ ಐ ಎಂ ವಿಠ್ಠಲಮೂರ್ತಿಯವರು ಈ ನಂಬರ್ ಕೊಡಿಸಿದ್ದರಂತೆ.

ಈಗಲೂ ಸುಸ್ಥಿತಿಯಲ್ಲಿರುವ ಈ ಕಾರು ಸದ್ಯಕ್ಕೆ ತೇಜಸ್ವಿಯವರಿಗೆ ಆಪ್ತರಾಗಿದ್ದ, ಹಂಪಿ ಕನ್ನಡ ವಿಶ್ವವಿದ್ಯಾಲಯದ ಡಾ. ಕೆ ಸಿ ಶಿವಾರೆಡ್ಡಿಯವರ ಬಳಿ ಇದೆ. ಶಿವಾರೆಡ್ಡಿಯವರಿಗೆ ತೇಜಸ್ವಿಯವರ ಮೇಲೆ ಎಷ್ಟು ಅಭಿಮಾನವಿತ್ತೋ ಅಷ್ಟೇ ಅಭಿಮಾನದಿಂದ ಈ ಕಾರನ್ನು ಜೋಪಾನವಾಗಿ, ಇಟ್ಟುಕೊಂಡಿದ್ದಾರೆ, ತೇಜಸ್ವಿಯವರು ಬಳಸುತ್ತಿದ್ದ ಈ ಕಾರಿನ ಕೀ ಚೈನ್ ಅನ್ನೆ ಈಗಲೂ ಬಳಸುತ್ತಿದ್ದಾರೆ. ಈ ಕಾರು ನೋಡಿದಾಗ ಮುಟ್ಟಿದಾಗ ತೇಜಸ್ವಿಯವರನ್ನೇ ಸ್ಪರ್ಶ ಮಾಡಿದಷ್ಟು ಸಂತೋಷವಾಯ್ತು.