ಫ್ರೆಂಚ್ ಕವಿ, ಕಾದಂಬರಿಕಾರ, ನಾಟಕಕರ್ತೃ, ವಿಮರ್ಶಕ ಮತ್ತು ರಾಜಕಾರಣಿ. ಈತನ ಪ್ರಭೆ ಮತ್ತು ಪ್ರಭಾವ ಅಂದಿನಷ್ಟೇ ಇಂದು (2002) ಕೂಡ ಉಜ್ಜ್ವಲ. ಕಾರಣ? ಈ ಸಾಹಿತ್ಯ ಬ್ರಹ್ಮಗಿರಿ ಮತ್ತು ರಾಗಭಾವ ಕಾವೇರಿ ರಚಿಸಿದ 48 ಬೃಹತ್ಸಂಪುಟಗಳು ಜಗತ್ತಿನ 44ಕ್ಕಿಂತಲೂ ಹೆಚ್ಚಿನ ಭಾಷೆಗಳಿಗೆ ಅನುವಾದಿಸಲ್ಪಟ್ಟಿವೆ. The Hunchback of Notredame(1831), Les Miserables(1862), Toilers of the Sea(1866) ಸದಾ ಪ್ರಸ್ತುತ. “ಇದು ಬರಿ-ಬೆಳಗಲ್ಲೋ ಅಣ್ಣಾ!” ಅಲ್ಲವಿದು ಕಾಲ್ಪನಿಕ ಕಥೆ, ಬದಲು, ಮನುಕುಲದ ವ್ಯಥೆ, ಮೌಲ್ಯಗಳ ಗಾಥೆ.
ಕಾನೂನು ಕಟ್ಟಳೆಗಳನ್ನು ಅಮಾನುಷ ಯಾಂತ್ರಿಕ ದಕ್ಷತೆಯಿಂದ ಚಾಲೂಗೊಳಿಸುವ ಸಮಸ್ತ ಸಾಮಾಜಿಕ ಸನ್ನಿವೇಶಗಳಲ್ಲಿಯೂ ನಿಂದನೆ-ಖಂಡನೆ-ಭರ್ತ್ಸನೆ ಸಹಿತವಾದ ಒಂದು ವಿಕೃತ ಮಾನಸಿಕ ಸ್ಥಿತಿ ಉದ್ಭವಿಸುತ್ತದೆ. ನಾಗರಿಕತೆ-ಅಂಚಿನಾಚೆಗಿನ ನರಕಕೂಪಕ್ಕೆ ತಳ್ಳಲ್ಪಟ್ಟವರ ಮೂಕ ವೇದನೆ ಇದು. ಇಂಥವರ ಎದೆಯಾಳದ ದನಿ, ಮನದುಮ್ಮಳದ ಬನಿ. ಮಾನವೀಯತೆಯ ಗಣಿ, ಮತ್ತು ಬಯಕೆ ಹಂಬಲಗಳ ವಾಣಿ ಹ್ಯೂಗೊವಿರಚಿತ ಮಹಾಕಾದಂಬರಿ Les Miserables.

ಅಂತಿಮವಾಗಿ ಜೀವನ ಮೂರು ಸಂಚಾರೀಭಾವಗಳ ಸಂತತ ಕ್ಷೋಭೆ-ಕಾಠಿಣ್ಯ, ದೈನ್ಯ, ಕಾರುಣ್ಯ. ದುರ್ಯೋಧನ-ಕಾಠಿಣ್ಯ, ದ್ರೌಪದೀ-ದೈನ್ಯ, ಶ್ರೀಕೃಷ್ಣ-ಕಾರುಣ್ಯ, ಅಂತೆಯೇ, ಜೇವರ್ಟ್ – ಕಾಠಿಣ್ಯ, ಜೀನ್ ವಾಲ್ ಜೀನ್-ದೈನ್ಯ, ಬಿಷಪ್-ಕಾರುಣ್ಯ (ಹೊದಿಕೆ ಚಿತ್ರ) ನಿದರ್ಶನಗಳು.
Les Miserables ಸುಮಾರು 1200 ಪುಟಗಳ ವಿಸ್ತಾರಾರ್ಣವ. ಇದನ್ನು 320 ಪುಟಗಳ ಕನ್ನಡ-ಅಮೃತಸರೋವರಕ್ಕೆ ಸಾರವಿಳಿಸುವುದರಲ್ಲಿಯೂ ಮೂಲ-ಅನುವಾದಿತಗಳಲ್ಲಿ ವಸ್ತು-ಭಾವ-ಸನ್ನಿವೇಶಗಳ ನಡುವಿನ ಏಕ-ಏಕ ಸಂವಾದಿತ್ವ ಸಾಧಿಸುವುದರಲ್ಲಿಯೂ ಸಮಗ್ರವಾಗಿ ಮೂಲದ ಅಂತಸ್ಸತ್ತ್ವಕ್ಕೆ ಮರುವುಟ್ಟು ಕೊಡುವುದರಲ್ಲಿಯೂ ಎ. ಪಿ. ಸುಬ್ಬಯ್ಯನವರು (1901-77) ಅನನ್ಯ ವೈದುಷ್ಯ, ಅಪಾರ ನಿಷ್ಠೆ ಮತ್ತು ಅಪ್ರತಿಮ ಪ್ರತಿಭೆ ಠೇವಣಿ ಹೂಡಿದ್ದಾರೆ.
ವಿಶ್ವಜ್ಷಾನದ ಸೇವಾಕೇಂದ್ರ
ಅರಿವಿನ ಬೆಳಕನು ಪಸರಿಪ ಚಂದ್ರ
ಪಂಡಿತ ಪಾಮರ ಪ್ರಜ್ಷಾಸಾಂದ್ರ
ಪುಸ್ತಕ ಲೋಕದಲಿದು ದೇವೇಂದ್ರ…
(ಬೆನ್ನುಡಿ )
 
ಅತ್ರಿ ಬುಕ್ ಸೆಂಟರ್
ಬೆಲೆ : ರೂ. 70/-