ಮೋಜಿನ ಪದಗಳು
ಕೆ ವಿ ತಿರುಮಲೇಶ್
ನುಂಗಣ್ಣರು
ಷರೀಫ ಸಾಬರ ಮನೆಗೆ ಹೋದರೆ
ಬಾಗಿಲು ಉಂಟು ಮನೆಯೇ ಇಲ್ಲ
ಏನಪ ಎಂದರೆ ಮನೆಯನು ಬಾಗಿಲು
ನುಂಗಿತು ಎಂತ
ತಲೆದಿಂಬುಂಟು ಚಾಪೆಯೆ ಇಲ್ಲ
ಏನಪ ಎಂದರೆ ದಿಂಬು ಚಾಪೆಯನು
ನುಂಗಿತು ಎಂತ
ರಾಟೆಯು ಉಂಟು ಬಾವಿಯೆ ಇಲ್ಲ
ಏನಪ ಎಂದರೆ ಬಾವಿನ ರಾಟೆಯು
ನುಂಗಿತು ಎಂತ
ಏಣಿಯು ಉಂಟು ಮರವೇ ಇಲ್ಲ
ಏನಪ ಎಂದರೆ ಏಣಿಯು ಮರವನು
ನುಂಗಿತು ಎಂತ
ಬೆಟ್ಟವು ಉಂಟು ಕಣಿವೆಯೆ ಇಲ್ಲ
ಏನಪ ಎಂದರೆ ಬೆಟ್ಟವು ಕಣಿವೆಯ
ನುಂಗಿತು ಎಂತ
ಆಕಾಶವುಂಟು ಭೂಮಿಯೆ ಇಲ್ಲ
ಏನಪ ಎಂದರೆ ಆಕಾಶ ಭೂಮಿಯ
ನುಂಗಿತು ಎಂತ
ಎಲ್ಲಿ ಷರೀಫರು ಎಂದು ನೋಡಿದರೆ
ಷರೀಫರೆ ಇಲ್ಲ-ಗೋವಿಂದ ಭಟ್ಟರು
ನುಂಗಿದರು ಎಂತ!***
ಅನಂತಮೂರ್ತಿ
ಉಳಿದವರಿಗೆಲ್ಲಾ ಒಂದೇ ಅನಂತಮೂರ್ತಿ
ತಿಳಿದವರಿಗಿಬ್ಬರು ಮೂರ್ತಿ
ಒಬ್ಬರು ಪೂಜಾಮೂರ್ತಿ
ಆತ್ಮೀಯ, ಪ್ರೀತಿಪಾತ್ರ, ಫುಲ್ ಆಫ್ ಮರ್ಸಿ
ಇನ್ನೊಬ್ಬರು ಉತ್ಸವ ಮೂರ್ತಿ
ಸದ್ದುಗದ್ದಲ, ಗಲಾಟೆ, ಫುಲ್ ಆಫ್ ಕಾಂಟ್ರೋವರ್ಸಿ!
ಸಾಹಿತ್ಯ ಸಂಭ್ರಮ
ಮುಗಿಯಿತು ಸಂಭ್ರಮ ಮುಳುಗಿತು ಸಾಹಿತ್ಯ
ನೀವಿನ್ನು ಹೊರಡ್ಡಿ
ಎಂದರು ಗಿರಡ್ಡಿ!
ಅಡಿಗರು
ಅಡಿಗೆಗೆಂದು ಗಡಿಗೆ ತಂದು
ಒಡೆದು ಹಾಕಿದ್ರು
ಅಲುಮಿನಿಯಮಾದ್ರು ಪರವಾಯಿಲ್ಲ
ನಮ್ದಾದ್ರೆ ಸಾಕೆಂದ್ರು!
ಚಂಡೆ ನಮ್ದು ಮದ್ದಳೆ ನಮ್ದೊ?
ಎರಡೂ ನಮ್ದೆ ಹೊಡೀರಿ ಎಂದ್ರು!
ಪಂಪ ಪ್ರಶಸ್ತಿ
ಪಂಪ ಪ್ರಶಸ್ತಿಗೆ ಪಂಪನ ಕರೆದು
ಗೇಟಿನಲ್ಲೇ ತಡೆದ್ರು
ನಾ ಪಂಪ ಕಣ್ರಿ ಎಂದದ್ದಕ್ಕೆ
ಗೊತ್ತು ಕಣ್ರೀ ಆದ್ರೆ ಫೋಟೋ ಐಡಿ ಬೇಕ್ರಿ ಎಂದ್ರು
ಫೋಟೋ ಗೀಟೋ ನಂಗೊತ್ತಿಲ್ಲ
ಏಡಿ ಹಿಡಕೊಂಡ್ ಬರ್ತೀನಂತ
ಹೋದ ಪಂಪ ಬಂದ ಪಂಪ
ಏಡಿ ಹಿಡಕ್ಕೊಂಡು!
ದೇವ್ರು
ರಾಮಚಂದ್ರ ದೇವ
ದೇವ್ರಾಗ್ಲಿಲ್ಲ
ಮಹಾದೇವ ದೇವ್ರು ಹೆಂಗಾದ್ರು ದೇವ್ರು?
ಸಿಂಪ್ಲ್ ಪ್ರಿನ್ಸಿಪ್ಲ್ ಎಂದರು ದೇವ್ರು
ಪ್ರಯೋಗ ಯಾವಾಗ್ಲು ರಿಪೀಟಾಗ್ಬೇಕು:
ದೇವನೂರ ಮಹಾದೇವ ಹಾಂಗಾದ್ರು ದೇವ್ರು!
ಬೊಳುವಾರು ಮಹಮದ್ ಕುಂಞಿ
ಚಂದದ ಹೆಸರು ಬೊಳುವಾರು ಮಹಮದ್ ಕುಂಞಿ
ಹೇಳಕೆ ಬರದೆ ಸೀಮೆಯವರಂತಾರೆ `ಕುಂಯಿ’.
ಕುಂಯಿ ಅಲ್ಲ, ಕುಂಞಿ ಅಂತ
ಎಷ್ಟೇಳಿದರೂ ಮತ್ತದೇ ಕುಂಯಿ.
ಅದಕಂದರು ಕುಂಞಿ: ಅಯ್ಯೋ ಪಾಪ! ಬಿಟ್ಬಿಡಿ ಅವರ್ನ
ಹೇಳಕಾಗ್ದೆ ಕೂಗಾಡ್ತಾರೆ ಕುಂಯೀ ಕುಂಯೀ!
ಯೂ ಆರ್ ಅನಂತಮೂರ್ತಿ
ಕೊನೆ ಕೊನೆಗೆ ಅನಂತಮೂರ್ತಿ ಒಂದು ಬಾಕ್ಸರ್ ಡಮ್ಮಿ ತರ ಆದ್ರು
ಹೋದೋರು ಬಂದೋರು ಕೇಳೋರು : ಯೂ ಆರ್ ಅನಂತಮೂರ್ತಿ?
ಯಸ್ ಎಂದ ತಕ್ಷಣ ಕೊಡೋರು ಪಂಚ್
ಆದರೆ ಅವರ ಸ್ಥಿತಿಸ್ಥಾಪಕ ಗುಣಾನ ಮೆಚ್ಚಲೆ ಬೇಕು
ಒಂದು ಕ್ಷಣದಲ್ಲೇ ಮೊದಲಿನಂತಾಗುತಿದ್ರು!
ವಿ ಆರ್ ಪ್ರತಿಭಾ
ವಿ ಆರ್ ಪ್ರತಿಭಾ ಅಂತ ಎಷ್ಟೇಳಿದರೂ
ಜನ ಕೇರ್ ಮಾಡೋದೇ ಇಲ್ಲ
ಯಾತಕ್ಹೇಳ್ತೀನಿ: ಆತ್ಮ ಗೌರವದ ಕಾಲ
ಇದಲ್ಲ!
Sir superb poems thank you you made my day….
Murali
ಎಷ್ಟು ಚೆನ್ನಾಗಿವೆ! ಎಂಥ ತಾಜಾ ಮೋಜಿನ ಪದಗಳು! ಸರ್ ಇನ್ನೂ ಬರೀರಿ.
ಹ..ಹ್ಹಾ…ತುಂಬಾ ಚೆನ್ನಾಗಿದೆ ಸರ್…!ಮತ್ತೆ ಮತ್ತೆ ಓದಿಕೊಂಡು ಖುಶಿ ಪಡಬಹುದು.( ನೀವು ಹೈದರಾಬಾದಿನಲ್ಲಿ ಇರುವುದಕ್ಕೆ ಬಚಾವು !)
ತುಂಬ ಚೆನ್ನಾಗಿವೆ..
ಮಜಾ ಬಂತು ಸರ್..:)
ನಾಮ ಪದಗಳ ಜೋಡಣೆ ಮೋಜಿನದಾಗಿದೆ. ನಿಜಕ್ಕೂ ಮೋಜಿನದಾಗಿದೆ.
ಅಪರೂಪದ ತಿಳಿಹಾಸ್ಯದ ಕಿರುಗವನಗಳು ….ತು೦ಬಾ ಚೆನ್ನಾಗಿವೆ!
ENTHA MOJINA KAVANAGALU. PUN-DITTU GE SALAM
—
ಕೆ.ವಿ.ಟಿ.
ಕಲಿಸಿದಲ್ಲವಾದರೂ ಬರೆದಿದ್ದೆಲ್ಲಾ ಕನ್ನಡದ ವಿಟ್ಟೆ
ಮೂಸದ ಪುಷ್ಪಗಳ್ಯಾವವಿಲ್ಲ ಈ ಚಿಟ್ಟೆ
ಓದಿ ಮೋಜು ಪಟ್ಟೆ, ಓದದಿರೆ ನೀ ಕೆಟ್ಟೆ
ಇವು ಹೊಟ್ಟೆ ಮೇಲೆ ತೊಟ್ಟ ಪಟ್ಟೆ ಬಟ್ಟೆ
ಬುರುಡೆಗಿವು ಹೊಟ್ಟೇ, ಅಲ್ಲವಯ್ಯ ಬರೀ ಲೊಳಲೊಟ್ಟೆ.
~ಅನಿಲ ತಾಳಿಕೋಟಿ
ವಾಹ್ ! ವಾಹ್ ! ಚಂದದ ಪದಗಳು.
Super relief from serious poetry! 🙂
😀
Bhala pun ide fun ide padyadalli