ಕು ಸ ಮಧುಸೂದನ ರಂಗೇನಹಳ್ಳಿ
ಮುಚ್ಚಿದ ಕಣ್ಣುಗಳು
ಶತಮಾನಗಳ ಕನಸುಗಳು
ತೆರೆದಿಟ್ಟ ಬಯಲು
ಇಲ್ಲದ ಗೋಡೆಗಳ ಕಟ್ಟಿ
ನಟಿಸುತಿಹರು ಎಡವಿದಂತೆ.
ಕಪೋಲಕಲ್ಪಿತ ಕತೆಗಳ ತುಂಬಿಟ್ಟ
ಪಠ್ಯಪುಸ್ತಕಗಳ ಉರುಹೊಡೆದು
ಹೊಟ್ಟೆ ಉಬ್ಬರಿಸಿ
ಬೆವರ ಬಸಿದರು ಜಿಮ್ಮುಗಳ ಬಿಮ್ಮಿನಲಿ
ರೆಟ್ಟೆ ಬಲ ಅರಿಯದ
ಪೀಳಿಗೆಯೊಂದ ಸೃಷ್ಠಿಸಿದ ತಪ್ಪಿಗೆ
ಇದ್ದ ಅಂಗೈಯಗಲ ನೆಲಕೆ
ಬದುಗಳ ಹಾಕಿ ಕೊಟ್ಟಿದ್ದಾಯಿತು.
ಉತ್ತುಕೊಳ್ಳಿ ನಿಮಗಿಷ್ಟಬಂದದ್ದೆಂದು.
ಹೇಳಿದ ಮಾತೇ ತಪ್ಪಾಯಿತೊ
ಕೇಳಿದ ಕಿವಿಗಳಿಗೆ ಅಪಾರ್ಥವಾಗಿತ್ತೊ
ಬಿತ್ತಿಬೆಳೆದಿದ್ದೆಲ್ಲ ಕಳೆಯೇ
ಬೆಳೆದವರಿಗೆ ಬೆಳೆದೆವೆನ್ನುವ ಭ್ರಮೆಯಾದರೆ
ಉಳಿದವರಿಗೆ ಕಳೆಯ ನಡುವೆ ಬೆಳೆಯ ಹುಡುಕುವ ಕೇಮೆ!
0 ಪ್ರತಿಕ್ರಿಯೆಗಳು