ಸ್ವಗತ ಸಖ 

ಡಾ. ತಿರುಮಲೇಶ್ 

ಅಂತರ್ಮುಖ ಸ್ವಗತ ಸಂಗಾತವೇ ಪರಮ ಸುಖ
ಅರ್ಪಿಸುವವಳೂ ನಾನೇ
ಆಲಿಸುವವಳೂ ನಾನೇ

ಆಂತರ್ಯೊದೊಳಗಿನ ಅಪಾರ ಸ್ಮರಣೆಗಳು
ಮೆದುಳ ಮುಂಚೂಣಿಯೊಳು
ನಿಂತು ನರ್ತಿಸಿ ಮರೆಯಾಗುವಾಗ
ಮನದೊಳೇಳುವ ತರಂಗಗಳ
ನಾದಾಮೃತ ನನ್ನೊಬ್ಬಳ ಸ್ವತ್ತು

ಅಂಗೈಲಿ ಅಂಗೈ ಬೆರೆಸಿ
ಬೆರಳುಗಳೊಳು ಬೆರಳುಗಳ
ಪೊಸೆದು
ತೋಳ್ತೆಕ್ಕೆಯಲಿ ನನ್ನನಿರಿಸಿ
ಹೆಜ್ಜೆಗುರುತುಗಳನೆಣಿಸುವಂದದಿ
ನನಗವನ ಆನಿಸಿ ಆಶ್ರಯಿಸಿ
ಮುನ್ನಡೆದ ಅಂದಿನ ಯಾನದ
ನೆನಪಿನ ಗಾನ ನನ್ನೊಳಗಿನ
ನರನಾಡಿಗಳೊಳಗೇ ಲೀನ

ಆರಿಗೂ ಕಾಣದು
ಕಾಣ ಬಿಡೆನು
ಜೀವನ ಕಲ್ಯಾಣ ಲೋಕ ಕಲ್ಯಾಣಗಳ ಜಂಜಾಟಗಳೊಳಗೆ
ಎಂದೆಂದೂ ಜಂಟಿಗಳ ಗಂಟುಗಳಲೇ ಬಂದಿಯಿರುವ
ಜೀವ ಒಂಟಿಗೊಂಡ
ಅಮೂಲ್ಯ ಅಸಾಧಾರಣ
ಅಪರೂಪದ ಅವಿಸ್ಮರಣೀಯ
ಕ್ಷಣಗಳ ಅನುಭವಿಸುವುದೇ ಒಂದು ಸುಯೋಗ
ಸತ್ಯ ಸುಂದರ ಸ್ವರ್ಗ
ಅದುವೇ ಸುಖ ಶಾಂತಿ ನೆಮ್ಮದಿಗೆ ರಾಜ ಮಾರ್ಗ….