ವಿದ್ಯಾಶ್ರೀ ಅಡೂರ್
ಹಿತ್ತಿಲಲಿ ಅರಳಿರುವ ಮಲ್ಲಿಗೆಯ ಹೂವೊಂದು
ಸೋತಿಹುದು ಜನಗಡಣ ಕಣ್ಸೆಳೆಯಲು
ಬೆಳಗು ಬೈಗುಗಳಲ್ಲೇ ದಿನಚರಿಯು ಕಳೆದಿಹುದು
ಅರಳುವಿಕೆಗಡರಿಹುದು ಕಾರ್ಮುಗಿಲು
ಗಂಧವಿಲ್ಲದ ಹೂವೊಂದು ಮುಂಬಾಗಿಲಲಿ ಮೆರೆದು
ಗಳಿಸಿಹುದು ಮೂಜಗದ ಜನ ಮನ್ನಣೆ
ಹಿತ್ತಿಲಿನ ಹೂ ಬಳ್ಳಿ ಒಡ್ಡೊಡ್ಡು ಬೆಳೆದಿರಲು
ಹೆದರಿಹುದು ನೋಡುತ್ತಾ ಕತ್ತರಿಯ ಸಾಣೆ
ನೀರು ಗೊಬ್ಬರದಾರೈಕೆ ಮುಂಬಾಗಿಲಿನ ಗಿಡಕೆ
ಹೆಚ್ಚಿಹುದು ಎಗ್ಗೆಗಳು ಹುಚ್ಚುಗಟ್ಟಿ
ಬಿದ್ದ ತರಗೆಲೆಗಳನೆ ತಾನುಂಡು ಹಿತ್ತಿಲಿನ
ಮಲ್ಲೆ ಹೂ ಬಿಟ್ಟಿಹುದು ಪ್ರೀತಿಹುಟ್ಟಿ..
ಅವರವರ ಆಕಾಶ ಅವರವರ ತಲೆಮೇಲೆ
ಬೊಮ್ಮ ಬರೆದಿಹನೆಲ್ಲ ಹಣೆಯಬರಹ
ತನ್ನದಲ್ಲದ ಪಾಲು ಸಿಗಲೊಲ್ಲದೆಂದೆಂದೂ
ಯಾರಿಲ್ಲ ಭುವಿಯಲ್ಲಿ ಒಂದೇ ತರಹ..
0 ಪ್ರತಿಕ್ರಿಯೆಗಳು