ಸದಾಶಿವ್ ಸೊರಟೂರು

ನಾಳೆ ಅವನಿಗೊಂದು ಕವಿತೆ ಓದಲಿಕ್ಕಿದೆ
ಎಂತದ್ದೊ ಗಡಿಬಿಡಿ
ಇಳಿದಿದ್ದಾನೆ ರಸ್ತೆಗೆ
ಹೊಕ್ಕುತ್ತಾನೆ ಸಿಕ್ಕ ಸಿಕ್ಕ ಅಂಗಡಿಗಳಲಿ
ಅವನೊಂದು ತುರ್ತಾಗಿ
ಕೋಟು ಕೊಳ್ಳಬೇಕು..
ಕವಿ ಅಂದ ಮೇಲೆ ಇರಬಾರದೇ ಒಂದಾದರೂ?
ಎರಡೂ ಜೇಬಿರುವ
ಎದೆ ಮೇಲೆ ಗುಲಾಬಿ ಇಟ್ಟುಕೊಳ್ಳಲು ಜಾಗವಿರುವ
ಹೆಗಲ ಮೇಲೆ ಹಾಕಿಕೊಳ್ಳುವ
ಬ್ಯಾಗಿನ ಭಾರ ಸಹಿಸುವ
ತುಸು ಬಾಳಿಕೆಯ ಕೋಟುವಿಗಾಗಿ
ಅಲೆಯುತ್ತಾನೆ..

ಬಣ್ಣ ಇಷ್ಟವಾಗುತ್ತದೆ ಸೈಜು ಹೊಂದುವುದಿಲ್ಲ
ಸೈಜು ಸರಿ ಇದೆ ಬಣ್ಣ ಸೇರುತ್ತಿಲ್ಲ
ಎರಡೂ ಸರಿ ಇದೆ
ಬೆಲೆಯೇನು ಕಡಿಮೆಯಲ್ಲ

ಕೊನೆಗೆ ಮೂಲೆಯ ಅಂಗಡಿಯೊಂದರಲ್ಲಿ
ಸಿಕ್ಕಿ ಬೀಳುತ್ತದೆ ಇವನಿಗೊಂದು
ಕೋಟು
ಮೂರಾಲ್ಕು ಬಾರಿ ಹಾಕಿ ಹಾಕಿ
ಕನ್ನಡಿಯ ಮುಂದೆ ಹಲ್ಲುಗಿರಿಯುತ್ತಾನೆ
ಕವಿತೆ ಓದುವ ಶೈಲಿಯಲ್ಲಿಯೇ ನಿಲ್ಲುತ್ತಾನೆ
ವಾಲುತ್ತಾನೆ ಬಾಗುತ್ತಾನೆ
ತಾಲೀಮು ಮುಗಿಸುತ್ತಾನೆ..

ಮನೆಗೆ ಬಂದು ಕೋಟಿಗೆ ಒಪ್ಪುವ
ಅಂಗಿ ಹುಡುಕಿ ಇಸ್ತ್ರಿ
ತೀಡುತ್ತಾನೆ
ಟೈ ಕಟ್ಟಬಹುದೆ?
ಅರೆ ಯಾರಾದರೂ ಟೈ ಕಟ್ಟುತ್ತಾರೆಯೆ
ಕವಿತೆ ಓದುವಾಗ?
ಕಟ್ಟಬಾರದೇಕೆ? ಪದಗಳನ್ನು ಕಟ್ಟುವವನಿಗೆ
ಟೈ ಒಂದು ಬಾರವೇ?

ಉಫ್.. ಎಲ್ಲಾ ಸಿದ್ದ
ನಿದ್ದೆ ಎಳೆಯುತಿದೆ, ಪಾಪ ಎಷ್ಟೊಂದು
ಅಲೆದಿದ್ದಾನೆ, ಇಸ್ತ್ರಿ ತೀಡಿದ್ದಾನೆ
ಥಟ್ಟನೆ ನೆನಪಾಗುತ್ತದೆ
ಯಾವ ಕವಿತೆ ಓದುವುದು?

ಕವಿತೆ ಖಜಾನೆ ತೆರೆಯುತ್ತಾನೆ
ಒಂದೊಂದು ಕವಿತೆಯನ್ನು ಕೋಟಿನ
ಪಕ್ಕ ಇಟ್ಟು-ಇಟ್ಟು ನೋಡುತ್ತಾನೆ
ಕೋಟು ಹೊಳೆಯುತ್ತದೆ, ಕವಿತೆ ನಗುತ್ತದೆ..

ಕವಿತೆಯೇನು ಕೋಟೆ? ಬೀದಿ ತುಂಬಾ ಸತಾಯಿಸಲು
ಬರೆದರಾಯಿತು
ದಿನಸಿ ಚೀಟಿಯ ಹಿಂದೆ ಕೂತಲ್ಲೇ‌ ಬರೆದ
ಹತ್ತೆಂಟು ಸಾಲುಗಳ..
ಕವಿತೆ ಸುಲಭ; ಕೋಟು ಕಷ್ಟ..

ಮರುದಿನ ಗೋಷ್ಠಿಯಲ್ಲಿ ಅಧ್ಯಕ್ಷರು
ಅವನ ಕೋಟು ಮೆಚ್ಚಿದರು
ಮನೆಗೆ ಬಂದು ಕೋಟು ಎತ್ತಿಟ್ಟ
ಕವಿತೆಯನು ದಾರಿಯಲಿ ಮರೆತುಬಿಟ್ಟ..

ಈಗ ಅವನಿಗೊಂದು ಹೆಸರಿದೆ
ಬಿರುದು ಬಾವಲಿಗಳಿವೆ
ಆ ಕೋಟು ಇದೆ ಮತ್ತೆರಡು ಕೋಟುಗಳೂ
ಬಂದಿವೆ;
ದಾರಿಯಲ್ಲಿ ಬಿದ್ದು ಹೋದ ಅರ್ಧಜೀವದ
ಕವಿತೆ
ಯಾರದೊ ಬೆರಳು ಹಿಡಿದು
ಹೊರಟು ಹೋಗಿದೆ..