ಪ್ರಸಾದ್‌ ರಕ್ಷಿದಿ

ಕೆಲವು ದಿನಗಳ ಹಿಂದೆ ಕಾಫಿ ವಲಯದ ಒಂದು ಶತಮಾನದ ಸಾಂಸ್ಕೃತಿಕ ಸಂಕಥನವನ್ನು ನಿರೂಪಿಸುವ ಪ್ರಯತ್ನ ಮಾಡಿದ್ದೆ. ‘ಕಳೆದ ಹೋದ ದಿನಗಳು’ಎನ್ನುವ ಶೀರ್ಷಿಕೆಯಲ್ಲಿ ಸಾಮಾಜಿಕ ಜಾಲತಾಣದಲ್ಲಿ ಪ್ರಕಟವಾದ ಈ ಸರಣಿ ನಂತರ ನಾನು ಗೌರಿ. ಕಾಮ್ ನಲ್ಲಿಯೂ ಬಂದಿತ್ತು. ಈ ಸರಣಿಗೆ ಬಂದ ಪ್ರತಿಕ್ರಿಯೆಗಳು. ಅಭಿಪ್ರಾಯಗಳು ನೂರಾರು..

ಈ ಸರಣಿಯ ಮೂಲಕವೇ ನನಗೆ ಪರಿಚಯ‌ ಮತ್ತು ಸಂಪರ್ಕಕ್ಕೆ ಬಂದವರು. ಕನ್ನಡದ ಹೆಸರಾಂತ ಬರಹಗಾರ ಎ.ಆರ್. ಮಣಿಕಾಂತ್. ಅವರಿಗೆ ಸಕಲೇಶಪುರದ ಬಗ್ಗೆ ವಿಶೇಷ ಪ್ರೀತಿ ಮತ್ತು ಒಡನಾಟಗಳಿವೆ ಎಂದು ತಿಳಿದದ್ದು ಆ ಮೂಲಕವೇ.

ನನ್ನ ಬರಹಗಳಲ್ಲಿ ಸಾಂದರ್ಭಿಕವಾಗಿ ಸಕಲೇಶಪುರದ ಗಣಪಯ್ಯ ಸ್ಮಾರಕ ವಿಶೇಷ ಚೇತನ ಮಕ್ಕಳ ಶಾಲೆಯ ಬಗ್ಗೆ ಬರೆದಿದ್ದೆ. ಆ ಶಾಲೆಯ ಮಕ್ಕಳ ಬಗ್ಗೆ ಕಾಳಜಿಯಿಂದ ಎ.ಆರ್.ಮಣಿಕಾಂತ್ ಅವರು ತಮ್ಮ ‘ಅಮ್ಮ ಹೇಳಿದ ಎಂಟು ಸುಳ್ಳುಗಳು’ ಕೃತಿಯ ಒಂದು ನೂರು ಪ್ರತಿಯನ್ನು ಎಲ್ಲ ಮಕ್ಕಳಿಗೂ ತಲುಪುವಂತೆ ಕಳುಹಿಸಿಕೊಟ್ಟರು.

ಇಂದು ಪುಸ್ತಕಗಳನ್ನು ಎಲ್ಲ ವಿಶೇಷ ಚೇತನ ಮಕ್ಕಳಿಗೆ ವಿತರಿಸಲಾಯಿತು. ಈ ಸಂದರ್ಭದಲ್ಲಿ ಶಾಲೆಯ ಆಡಳಿತ ಮಂಡಳಿಯ ಪಾರಸ್ ಮಲ್, ರಜನೀಕಾಂತ್, ವಾಸುದೇವ ಶರ್ಮ, ಪ್ರಾಂಶುಪಾಲ ಲೋಕೇಶ್, ಶಿಕ್ಷಕರಾದ ಈಶ್ವರಪ್ಪ ಹಕಾರಿ, ವೇದಿಕೆಯಲ್ಲಿ ಇದ್ದರು. ಸುಳ್ಯದ ವೈದ್ಯ ಡಾ.ಕೃಷ್ಣ ಮೂರ್ತಿ ಪಾರೆ. ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದರು.