ಲೋಕದ ಸಂತೆ ಅತಿಯಾಯಿತಯ್ಯಾ

The world is too much with us – William Wordsworth
ಅನುವಾದ : ಚಿಂತಾಮಣಿ ಕೊಡ್ಲೆಕೆರೆ

*

ಲೋಕದ ಸಂತೆ ಅತಿಯಾಯಿತಯ್ಯಾ; ಆಗಲೂ ಈಗಲೂ
ಕೂಡುವುದು, ಕಳೆಯುವುದರಲ್ಲೆ ಜನುಮ ದಂಡ!
ನಮ್ಮದೆನಿಸುತ್ತಿಲ್ಲ ಈ ನಿಸರ್ಗದ ಅಂದ
ಬಯಬಯಸಿ ಗಳಿಸಿದ್ದು ಕೆಟ್ಟವರವೊಂದ!

ಉಕ್ಕಿತ್ತು ಕಡಲಿನೆದೆ ಚಂದ್ರನೆದುರು
ಅಬ್ಬರಿಸಿ ಬೀಸಿತ್ತು ಗಾಳಿ ಭೋರ್ಗರೆದು
ಈಗಲೋ – ಮುದುಡಿರುವ ಹೂಗಳಂತಿಹುದು
ಅಪಶ್ರುತಿಯ ಬಾಳು ನಮ್ಮದಾಗಿಹುದು

ದೇವರೇ, ಯಾವುದೂ ನಮ್ಮ ಅಲುಗಾಡಿಸದು
ಇದಕ್ಕಿಂತ ಪೇಗನ್ ಆಗಿಬಿಡಬಹುದು!
ಹಸಿರು ಬಣಿವೆಯ ಮೇಲೆ ನಿಂತು ನಾನು
ನನ್ನ ದುರ್ಗತಿ ದುಗುಡ ಕಳೆದುಕೊಂಡೇನು!

ಕಡಲಿಂದ ಪ್ರೊಟಿಯಸ್ ಬರಬಹುದು ಎದ್ದು
ಕೇಳೀತು ಟ್ರೈಟನ್ ಸುರುಳಿ ಶಂಖದ ಸದ್ದು!