ಮತ್ತೆ ದ್ವಿಪದಿಗಳು

– ಬಸವರಾಜ ಸೂಳಿಬಾವಿ

ಲಡಾಯಿ ಪ್ರಕಾಶನ

೧

ನಿನ್ನ ಬಳಿಗೆ ನಾ ಪೌರುಷ ತುಂಬಿಕೊಂಡವನ ಹಾಗೆ ಬಂದಿರಲಿಲ್ಲ

ನೀ ಸೋಲು ಗೆಲುವು ಹುಡುಕುವಾಗ ಪ್ರೇಮದ ತುಟಿ ಲಜ್ಜೆಯಿಂದ ನಡುಗಿದವು

೨

ಬೆಳಗು ಅಂಗಳದಲಿ ಅದೇ ಅರಳಿದ ಹೂ ಕಿತ್ತು ನಿನಗೆ ಮುಡಿಸಿದೆ

ಎಂದೊ ಸತ್ತ ಹಿಟ್ಲರ್ ನನ್ನ ಕೈಯಲ್ಲಿಯೆ ಬದುಕಿ ಬಂದಂತೆನಿಸಿತು

೩

ಕೋಳಿ ಕೂಗಿದಾಗ ಬೀದಿ ಬಾಗಿಲು ಬಾಯಿ ತೆರೆಯಿತು

ಕನಸಿನ ಮೇಲೆ ಕಾಲೂರಿ ಬಂದ ಹೆಜ್ಜೆಸದ್ದು ಬೀದಿ ಆವರಿಸಿತು

೪

ಹೊರಗೆ ಮೌನದ ಫರದೆ ಕಟ್ಟಿಕೊಂಡೆ ಒಳಗಿನ ಸಂತೆ ನೆರೆಯುತಿದೆ

ಗಾಯದ ಪಾದದ ಮೇಲೂ ನಿರಾಕರಿಸಿದುಸಿರಿನಲ್ಲೇ ಮೋಹಗೊಳ್ಳುವ ಪಾತ್ರದ ನೆರಳು

೫

ಬೆಂಕಿ ಇಡುವಾಗ ಆ ಮನಸು ಏನಂದುಕೊಂಡಿತ್ತೊ

ಕೊನೆಗೂ ಪಾದಕ್ಕಂಟಿದ ಬೂದಿ ಅರಿವಿಗೆ ಬರುವುದು

೬

ಈ ಸಂಜೆಯಲಿ ಏನು ಮಾತು

ಆಗಷ್ಟೇ ಹುಟ್ಟಿದ ಚಂದ್ರ ಈಗ ಇಲ್ಲವಾದನು

೭

ಹಗಲ ಹುಡುಗಿ ಬಿಡಿಸಿದ ಚಿತ್ರ ಖಾಲಿ ಇತ್ತು

ಕಪ್ಪು ಬಣ್ಣ ತುಂಬಲು ಇರುಳ ಹುಡುಗಿಗೆ ಅವಕಾಶ ದೊರೆಯಿತು

೮

ನನ್ನ ಬದುಕಿಸುವುದು ರೊಟ್ಟಿಯೇ ಎನಿಸಿತ್ತು

ನಿನ್ನ ಸಂಧಿಸುವ ತನಕ…

 ]]>