ಮೂವರು ಗೆಳೆಯರು ಬಹಳ ದಿನದ ನಂತರ ಭೇಟಿಯಾದರು. ಅವರಿಗೆ, ಹಂಚಿಕೊಂಡು ತಿನ್ನಲೂ ಆಗದಷ್ಟು ಚಿಕ್ಕ ಹಲ್ವಾ ತುಂಡು ಸಿಕ್ಕಿತು. ಈ ರಾತ್ರಿ ಯಾರಿಗೆ ವಿಶೇಷವಾದ ಕನಸು ಬೀಳುವುದೋ ಅವರು ಇದನ್ನು ತಿನ್ನುವುದೆಂದು ನಿರ್ಧರಿಸಿ ಅವರು ಆ ಹಲ್ವಾ ತುಂಡನ್ನು ಡಬ್ಬದಲ್ಲಿಟ್ಟು ಮಲಗಿದರು.

ಮಾರನೆ ಬೆಳಗು ಮೂವರೂ ತಮ್ಮ ತಮ್ಮ ಕನಸಿನ ಬಗ್ಗೆ ಹೇಳಿಕೊಂಡರು. ಒಬ್ಬನೆಂದ: “ನನ್ನ ಕನಸಿನಲ್ಲಿ ದೇವರು ಬಂದಿದ್ದ. ನನ್ನನ್ನು ಹೂದೋಟಕ್ಕೆ ಕರೆದುಕೊಂಡು ಹೋಗಿ ಎಷ್ಟೆಲ್ಲಾ ಸೊಗಸುಗಳನ್ನು ತೋರಿಸಿದ.”

ಮತ್ತೊಬ್ಬ: “ನನ್ನ ಕನಸಲ್ಲೂ ದೇವರು ಬಂದಿದ್ದ. ಆದ್ರೆ ನಾನೇ ಅವನನ್ನು ಹೂದೋಟಕ್ಕೆ ಕರೆದುಕೊಂಡು ಹೋಗಿ ಬಗೆಬಗೆಯ ಸೊಗಸನ್ನು ತೋರಿಸಿದೆ.”

ಈಗ ಮೂರನೆಯವನ ಸರದಿ. ಆತ ಹೇಳಿದ: “ನನ್ನ ಕನಸಲ್ಲೂ ದೇವರು ಬಂದಿದ್ದ. ಆದರೆ ನಾವು ಹೂದೋಟಕ್ಕೇನೂ ಹೋಗಲಿಲ್ಲ. ದೇವರು ನನಗೆ “ಎದುರಲ್ಲೇ ಹಲ್ವಾ ತುಂಡು ಇಟ್ಟುಕೊಂಡು ಕನಸು ಕಾಣ್ತಾ ಇದ್ದಿಯಲ್ಲೊ ದಡ್ಡಾ, ಮೊದಲು ಆ ಹಲ್ವಾ ತಿನ್ನು” ಅಂದ. ದೇವರೇ ಹೇಳಿದ ಮೇಲೆ ಆಗದು ಅನ್ನೋಕ್ಕಾಗುತ್ತಾ? ಹಲ್ವಾ ತಿಂದುಬಿಟ್ಟೆ” ಅಂದ.

ಉಳಿದಿಬ್ಬರೂ ಡಬ್ಬದ ಮುಚ್ಚಳ ತೆಗೆದು ನೋಡಿದರು. ಹಲ್ವಾ ತುಂಡು ಇರಲಿಲ್ಲ.