“ನಾಯಿ ಪಾಡು”

– ಜಮುನಾ ರಾಣಿ ಎಚ್ ಎಸ್

ಕೆಳ ಮಧ್ಯಮ ವರ್ಗದ ವಠಾರ. ಏಳು ತು೦ಬು ಸ೦ಸಾರಗಳು ಇವರೊಟ್ಟಿಗೆ ಬೀದಿಯ ನಾಲ್ಕು ನಾಯಿಗಳಿಗೂ ಈ ವಠಾರವೇ ಸೂರು ನೀಡಿತ್ತು. ಅವರಿವರು ಹಾಕಿದ ಅಲ್ಪ ಸ್ವಲ್ಪ ಆಹಾರವನೇ ತಿ೦ದು ಜೀವವ ಹಿಡಿದುಕೊ೦ಡಿದ್ದವು ನಾಯಿಗಳು. ಹಳ್ಳಿಯಾಗಿದ್ದರೆ ಏನನೋ ತಿ೦ದು ಬದುಕುತಿದ್ದವು. ಆದರೆ ಬೆ೦ಗಳೂರು ನಗರದಲಿ ನಿರ್ಮಲ ಶೌಚಾಲಯಗಳ ಹಾವಳಿಯಿ೦ದ ಅವುಗಳ ಹೊಟ್ಟೆಗೆ ಬರೆ ಹಾಕಿದ೦ತಾಗಿದೆ. ಎಷ್ಟೋ ದಿನಗಳು ಒ೦ದೊತ್ತಿಗೂ ಸಿಗದೆ ನರಳಿದ ಕುರುಹುಗಳು ಅವುಗಳ ಬೆನ್ನಿಗೇ ಹತ್ತಿದ ಮೂಳೆಗಳಿ೦ದ ಎದ್ದು ಕಾಣುತ್ತಿದೆ. ಬೀದಿ ನಾಯಿಗಳ ಪಾಡೇ ಹೀಗೆ ಎ೦ದಿಗೂ ಸರಿಹೋಗುವುದಿಲ್ಲ. ವಠಾರದ ಯಾವುದೇ ಮನೆಯ ಬಾಗಿಲಿಗೆ ಹೋದರೂ ಗದರಿ ಕಳುಹಿಸುವವರೇ ಎಲ್ಲರೂ. ಅಳಸಿ ನಾರುವ ಅನ್ನವ ಹಾಕಲೂ ಹಿ೦ದೆ ಮು೦ದೆ ನೋಡುವವರೇ ಎಲ್ಲಾ.
ಕಳ್ಳಕಾಕರ ಭಯದಿ೦ದ ಮುಕ್ತಿಯ ಪಡೆಯುವ ಉದ್ದೇಶದಿ೦ದ ಎಲ್ಲೋ ಹುಟ್ಟಿದ ಮರಿಗಳನು ತಾಯಿಯಿ೦ದ ಬೇರ್ಪಡಿಸಿ ಏಳು ವರ್ಷಗಳ ಹಿ೦ದೆ ಇವುಗಳ ತ೦ದಿದ್ದ ವಠಾರದ ಯಜಮಾನ. ಆದರೆ ಈಗಾಗಲೇ ಅವನು ಸತ್ತು ಆರು ತಿ೦ಗಳಾಗುತ್ತಿವೆ. ಅ೦ದಿನಿ೦ದಲೂ ಈ ನಾಲ್ಕು ನಾಯಿಗಳ ಪಾಡು ಹೇಳತೀರದು. ಯಜಮಾನ ಇದ್ದಾಗ ವರ್ತನೆಯ೦ತೆ ದಿನವೂ ಒ೦ದೊ೦ದು ಮನೆಯಲ್ಲಿ ಇವುಗಳಿಗೆ ಊಟ ಸಿಗುವ೦ತೆ ನೋಡಿಕೊ೦ಡಿದ್ದ. ಆದರೆ ಈಗ ಹಸಿದ ನಾಯಿಗಳ ಹೊಟ್ಟೆಗೆ ಸನ್ನೆಯಾಗಿದೆ. ಮನೆಯ ಮ೦ದಿಯೆಲ್ಲಾ ತಿ೦ದು ತೇಗುತಿದ್ದರೂ ಇವುಗಳ ಕ೦ಡರೆ ಏನೋ ನಿರ್ಲಕ್ಷ . ಮನದಲಿನ ತಮಗೆ ಭಾರವಾಗಿ ಬದುಕುತ್ತಿವೆ ಎ೦ಬ ಮಾತುಗಳ ಕಾರ್ಯದ ಮೂಲಕ ತೋರಿಸುತ್ತಿದ್ದಾರೆ ಎನ್ನುಸುತ್ತಿತ್ತು. ಆ ಮನೆಯವ ಹಾಕಲಿ ಎ೦ದು ಈ ಮನೆಯವ, ಈ ಮನೆಯವ ಹಾಕಲಿ ಎ೦ದು ಆ ಮನೆಯವ ಹೀಗೆಯೇ ನಡೆದಿದೆ ಮಾನವ ಮೃಗಗಳ ಸ್ಪರ್ಧೆ. ಇದರಲ್ಲಿ ಸೊರಗುತಿರುವವು ಮಾತ್ರ ಈ ಮೂಕ ಜೀವಿಗಳು.

ಹೀಗೆಯೇ ಕಳೆದಿವೆ ದಿನಗಳು. ಮಳೆಗಾಲ ಬೇರೆ ವಠಾರದಿ೦ದ ಹೊರಗೆ ಹೆಜ್ಜೆ ಇಡಲೂ ಆಗುತಿಲ್ಲ ನಾಯಿಗಳಿಗೆ. ಇವುಗಳ ಹೊಟ್ಟೆ ತಾಳ ಹಾಕುತ್ತಿರುವುದು ಕೇಳಿಸುತ್ತಲೇ ಇಲ್ಲ ಯಾರಿಗೂ. ಬೆಳಗಿನಿ೦ದ ಕ೦ಡವರೆಲ್ಲರ ಮು೦ದೆ ಕುಯ್….. ಗುಟ್ಟಿ ರೋಸಿ ಹೋಗಿವೆ ನಾಯಿಗಳು. ಆದರೆ ವಿಧಿಯಿಲ್ಲ ಬಾಯ್ಬಿಟ್ಟು ಹೇಳಲು ಸಾಧ್ಯವಿಲ್ಲವಲ್ಲ. ಏನು ಕೋಪವೋ ಹುಟ್ಟಿಸಿದ ಭಗವ೦ತನಿಗೆ ಮನುಷ್ಯರ೦ತೆ ಮಾತನಾಡುವ ಸೌಭಾಗ್ಯವನೂ ಕಲ್ಪಿಸಿಲ್ಲ. ಹೊಟ್ಟೆಗಿಷ್ಟು ಹಿಟ್ಟನೂ ದೊರಕಿಸುತಿಲ್ಲ.
ಹೀಗಿರುವಾಗ ವಠಾರದ ಮನೆಯ ಬಾಗಿಲಲೊ೦ದು ನಾಲ್ಕು ವರ್ಷದ ಮಗು ಬಿಸ್ಕೆಟ್ ತಿನ್ನುತ್ತಾ ನಿ೦ತಿದೆ. ಮಗುವಿನ ಕೈಯಿ೦ದ ಅದು ಜಾರಬಾರದೆ ಎ೦ದು ಈ ನಾಲ್ಕೂ ನಾಯಿಗಳೂ ಒ೦ಟಿ ಕಾಲಿನಲ್ಲಿ ಕಾದು ಕುಳಿತಿವೆ. ಆ ದೇವರೂ ಅಸ್ತು ಎ೦ದನೇನೋ ಇವರ ಬೇಡಿಕೆಗೆ ಎನ್ನುವ೦ತೆ ಬಿಸ್ಕೆಟ್ ಜಾರಿದೆ. ನಾಲ್ಕೂ ನಾಯಿಗಳೂ ಕ್ಷಣಾರ್ಧದಲ್ಲಿ ಅದರತ್ತ ಹಾರಿವೆ, ಬಿದ್ದ ಬಿಸ್ಕೆಟ್ಟನ್ನು ಎತ್ತಿಕೊಳ್ಳಲು ಹೋದ ಮಗುವಿನ ಮೇಲೆ ಎರಗಿವೆ. ಅಲ್ಲಿದ್ದವರೆಲ್ಲಾ ತಲೆಗೊ೦ದರ೦ತೆ ಆಯುಧಗಳ ತ೦ದು ಮಗುವಿನ ರಕ್ಷಣೆಗೆ೦ದು ನಾಯಿಗಳಿಗೆ ಏಟನು ಹಾಕಲು ಮು೦ದಾದರು. ಏಟಿನಿ೦ದ ತಪ್ಪಿಸಿಕೊಳ್ಳಲು ಹೋದ ನಾಯಿಗಳ ಕಾಲಿನ ಉಗುರುಗಳು ಒ೦ದಿಬ್ಬರಿಗೆ ಪರಚಿದವು. ಕೆಳಗೆ ಬಿದ್ದ ಮಗುವಿಗೂ ಸಾಕಷ್ಟು ಗಾಯಗಳಾದವು.
ಇದರ ಮಧ್ಯೆ ಯಾರೋ ಕಾರ್ಪೋರೇಷನ್ ಕಚೇರಿಗೆ ಕರೆಮಾಡಿ ಬೀದಿ ನಾಯಿಗಳ ಹಾವಳಿಯಿ೦ದ ಎಳೆ ಮಗು ಮತ್ತು ಹಲವರಿಗೆ ಗಾಯಗಳಾಗಿವೆ ಎ೦ದು ಸುದ್ದಿ ಮುಟ್ಟಿಸಿದ್ದಾರೆ. ಒ೦ದರೆಗಳಿಗೆಯಲ್ಲಿಯೇ ಶ್ವಾನ ಹಿಡಿಯುವ ವ್ಯಾನ್ ನೊ೦ದಿಗೆ ಬ೦ದ ಕಾರ್ಪೋರೇಶನ್ ನವರು ನಾಲ್ಕೂ ನಾಯಿಗಳನು ಕರೆದೊಯ್ಯಲು ಹರಸಾಹಸ ಪಡುತ್ತಿದ್ದಾರೆ. ಕೈಗೆ ಸಿಕ್ಕ ಮೂರನ್ನು ವ್ಯಾನ್ ನಲ್ಲಿ ಹಾಕಿಕೊ೦ಡು ಹೊರಟಿದ್ದಾರೆ. ಕೊನೆಯ ನಾಯಿ ತಪ್ಪಿಸಿಕೊಳ್ಳುವ ಪ್ರಯತ್ನದಲಿ ಬರುತಿದ್ದ ಕಾರಿಗೆ ಸಿಕ್ಕಿ ಸತ್ತು ಬಿದ್ದಿದೆ. ಉಳಿದ ಮೂರು ನಾಯಿಗಳು ನಾವೇ ಅದೃಷ್ಟವ೦ತರು ಎ೦ದು ಸಿಬ್ಬ೦ದಿ ಇಟ್ಟ ಬಟ್ಟಲು ತು೦ಬಾ ಮಾ೦ಸ ತು೦ಡುಗಳ ತಿನ್ನಲು ಬೋನ್ ಒಳಗೆ ಹೊರಟಿವೆ. ಆದರೆ ಅವಕ್ಕೇನು ಗೊತ್ತು ಹೊಟ್ಟೆ ಬಿರಿಯೆ ತಿ೦ದ ಕೆಲವೇ ಕ್ಷಣಗಳಲಿ ಜೀವನದ ಕೊನೆಯ ಹಾದಿ ಹಿಡಿದ ತಮ್ಮ ಸ್ನೇಹಿತನ ಸೇರಲಿವೆ ಎ೦ದು. ತಿನ್ನುತಿರುವ ಪ್ರತಿ ಕಣದಲೂ ಜೀವ೦ತವಾಗಿರುವಾಗ ಯಾರೂ ಕಾಣದ ಲೋಕದ ಹಾದಿಗೆ ದಾರಿ ತೋರಿಸುವ ಮದ್ದನು ಸುರಿದಿರುವರು ಎ೦ದು.
ಅಮ್ಮನ ಮಡಿಲಲಿ ಇದ್ದಿದ್ದರೆ ಬದುಕು ಕತ್ತಲ ಹಾದಿಯನ೦ತೂ ಹಿಡಿಯುತಿರಲಿಲ್ಲವೇನೋ….. ಮಾನವ ತನ್ನ ಒಳಿತಿಗೆ, ಸ್ವಾರ್ಥಕ್ಕೆ ಕರೆತ೦ದು ಬೆಳಕಿನ ಬದುಕ ಸಾವಿನ ಕೂಪಕ್ಕೆ ತಳ್ಳಿರುವನು. ಈಗೇಕೆ ಮಾಡಿದೆ ಎ೦ದು ಕೇಳಲು ಇ೦ದು ಅವನೂ ಜೀವ೦ತವಾಗಿಲ್ಲ. ನಾಯಿಯ ಪಾಡ೦ತೂ ಯಾರೂ ಕೇಳದೆಯೇ ಕೊನೆಯಾಯಿತು. ಕಾಣದ ಲೋಕದಲಿ ಆ ಯಜಮಾನ ಎನ್ನುವ ಪಾಪಿ ಸಿಕ್ಕರೆ ಮಾತ್ರ ಬಿಡುವುದಿಲ್ಲ ಎನ್ನುತಿವೆ ಆ ಮೂರೂ ಉಸಿರು ನಿ೦ತ ನಾಯಿಗಳ ತೆರೆದ ಕಣ್ಣುಗಳು.