ಸತ್ಯ
ಶಮಾ ಜಮಾದಾರ
ಜೋಗತಿಯ ಚೌಡಕಿಗೆ
ಮನದ ಮುಲುಕುಗಳ
ರಾಗ ಗೊತ್ತಂತೆ..
ಫಕೀರನ ಏಕತಾರಿಗೆ
ಬದುಕಿನ ಭವಿಷ್ಯ ಗೊತ್ತಂತೆ
ಎರಡೂ ಇದಿರುಬದಿರಾಗಿ
ಮನಸಿನ ಅಂಗಿ ಕಳಚಲು
ಸತ್ಯ ಬೆತ್ತಲಾಗಿತ್ತು.
ಆ ಜೋಡಿ ಕಂಗಳಲಿ
ಕೊಳ್ಳಿದೆವ್ವ ಕುಣಿಯುತ್ತಿತ್ತು.
ಫಕೀರನ ಖಾಲಿ ಚಮ್ಲಾದಲಿ
ಬರೀ ನಿಟ್ಟುಸಿರಿತ್ತು.
ಜೋಗತಿಯ ಚೌಡಕಿಯ
ಗೆಜ್ಜಿ ಮೌನವಾಗಿತ್ತು.
ಊಳಿಡುವ ಗುಳ್ಳೆ ನರಿ
ಕಣ್ಣು ಮಿಟುಕಿಸಿ ನಕ್ಕಿತ್ತು.
ಮಸಣದಲಿ ಶಾಂತನಿದ್ದೆಯಲ್ಲಿದ್ದ
ಶವ ಎದ್ದು ಕುಳಿತಿತ್ತು..
ತನ್ನ ಘೋರ ಭೂತಕಾಲವನ್ನು
ನೆನೆದು ನಡುಗಿತ್ತು.
0 ಪ್ರತಿಕ್ರಿಯೆಗಳು