ಆಸೆಗಳು..
ವಿಜಯಕುಮಾರ್ ನೆರ್ವೇಕರ್
ಚಂದ್ರಮನ ಮೇಲೊಂದು
ತುಂಡು ಜಾಗವಕೊಂಡು
ಚಂದದಾ ಮನೆಮಾಡಿ
ನಿನ್ನನಿರಿಸುವ ಆಸೆ!
ತಿಳಿ ನೀಲಿ ಆಗಸದಿ
ಹೊಳೆವ ಚುಕ್ಕಿಯ ಹೆಕ್ಕಿ
ಮೂಗುತಿಯನು ಮಾಡಿ
ನಿನಗೆ ತೊಡಿಸುವ ಆಸೆ!
ಚಲಿಸೊ ಮೋಡವ ತಡೆದು
ಒಲಿಸಿ ಕೆಳಗಿಳಿಸಿ
ನಿನ್ನ ಹೆಸರನು ಬರೆದು
ತೇಲಿಬಿಡುವ ಆಸೆ!
ಹಾರೊ ಹಕ್ಕಿಯ ಬೇಡಿ
ರೆಕ್ಕೆ ಬಾಡಿಗೆ ಪಡೆದು
ನಿನ್ನಯ ಜೊತೆಗೂಡಿ
ಹಾರಿ ಹೋಗುವ ಆಸೆ!
ಮಳೆಯ ಬಲೆಯನು ಹೆಣೆದು
ತಂಗಾಳಿ ಸೆರೆ ಹಿಡಿದು
ಮುಂಗುರುಳ ಬಳಿ ತಂದು
ಹರಿ ಬಿಡುವ ಆಸೆ!
ಹಾಲ್ಗಡಲ ಅಲೆ ಕಡೆದು
ಬಿಳಿ ನೊರೆಯ ಕೆನೆ ತೆಗೆದು
ನಿನ ಕೆನ್ನೆ ಗುಳಿಯೊಳಗೆ
ಬಚ್ಚಿಡುವ ಆಸೆ!
ವಾವ್!
ಚಂದದ ಕಲ್ಪನೆ
ಧನ್ಯವಾದಗಳು
ಚೆನ್ನಾಗಿದೆ ವಿಜಯ…
ಧನ್ಯವಾದಗಳು ದಾದು
ಅದ್ಬುತ ಸಾಲುಗಳು ,
ಧನ್ಯವಾದಗಳು