ಗೀತಾ ಜಿ ಹೆಗಡೆ ಕಲ್ಮನೆ
ಬಿಚ್ಚಿ ಬಿಸಾಕಲೆ ತೊಟ್ಟುಡುಗೆ
ಈ ಸೆಖೆಗೆ ಕಂಕುಳು ಬೆವರಿ ಗಬ್ಬುನಾತ
ನಿತ್ಯ ತಲೆ ಮಿಂದರೂ ಬಿಡದು ತುರಿಕೆ
ಮೈ ಮನವೆಲ್ಲ ಸುಸ್ತೋ ಸುಸ್ತು
ಬೇಡಾ ಬೇಡಾ ಈ ಸೆಖೆಗಾಲ.
ಈ ಮಳೆಗಾಲ ಎಲ್ಲಿ ನೋಡಿದರೂ ಗಿಜಿ ಗಿಜಿ
ಹೊರಗೆ ಸುತ್ತಾಡಲು ಹೋಗುವಂತಿಲ್ಲ
ಮನೆಯಲ್ಲಿ ಆಗಾಗ ಕರೆಂಟು ಖೋತಾ
ಇನ್ನು ಮಾಡುವುದೇನು ನೆಟ್ಟಿಲ್ಲದೇ
ಬೇಡಾ ಬೇಡಾ ಮಳೆಗಾಲ.
ಚುಮು ಚುಮು ಚಳಿಗೆ ಕೈ ಕಾಲೆಲ್ಲಾ ಒಡಕು
ಹೊದ್ದು ಮಲಗುವುದು ಎಷ್ಟೊತ್ತು
ಸಂದು ಸಂದು ನೋವು ಚಳಿ ತಡೆಯಲಾಗದೆ
ಬೇಸಿಗೆಯೇ ಬೆಸ್ಟಿತ್ತು ದೇಹದಾರೋಗ್ಯಕ್ಕೆ
ಬೇಡಾ ಬೇಡಾ ಚಳಿಗಾಲ.
ಹೇಗಿದ್ದೀರಿ ನೀವು ಎಂದು ಮಂದಿಯನ್ನು ಕೇಳಿದರೆ
ಒಂದೊಂದು ಕಾಲಕ್ಕೂ ಅಲವತ್ತುಕೊಳ್ಳುವರು
ಆಗ ಅದು ಬೇಡಾ, ಈಗ ಅದೇ ಚಂದ ಇದು ಬೇಡಾ
ಒಟ್ಟಿನಲ್ಲಿ ಮನುಷ್ಯನಿಗೆ ಯಾವುದನ್ನೂ ಸಹಿಸಿಕೊಳ್ಳುವ ತಾಳ್ಮೆ ಇಲ್ಲ.
0 ಪ್ರತಿಕ್ರಿಯೆಗಳು