……

ಚರಿತ್ರೆಯಿಂದ ಪಾಠಗಳನ್ನು ಕಲಿಯದಿದ್ದರೆ, ಚರಿತ್ರೆ ಮತ್ತೆ ಮತ್ತೆ ಮರುಕಳಿಸುತ್ತದೆ.

ಹಾಗೆ ನೋಡಿದರೆ ಇದೇನೂ ಹಳೆಯ ಚರಿತ್ರೆ ಅಲ್ಲ. 2004ರಲ್ಲಿ ವಾಜಪೇಯಿ ಸರಕಾರ “INDIA SHINING”ಎಂಬ ಸೂತ್ರ ಹಿಡಿದು ಚುನಾವಣಾ ಪ್ರಚಾರ ನಡೆಸಿತ್ತು. ಆದರೆ, ದೇಶ ಅದನ್ನು ಒಪ್ಪದೆ ಇದ್ದುದರಿಂದ, NDA  ಸರಕಾರ ಚುನಾವಣೆಯಲ್ಲಿ ಸೋಲಬೇಕಾಯಿತು.

ಸೋಲಿನ ವಿಶ್ಲೇಷಣೆ ಮಾಡಿದ ಅಂದಿನ ಉಪಪ್ರಧಾನಿ ಲಾಲಕೃಷ್ಣ ಆಡ್ವಾಣಿ ಅವರು “ಭಾರತ ಪ್ರಕಾಶಿಸುತ್ತಿದೆ” ಎಂಬ ಆ ಪ್ರಚಾರ ಸತ್ರದ ಕುರಿತು “valid,” but “inappropriate for our election campaign… By making them verbal icons of our election campaign, we gave our political opponents an opportunity to highlight other aspects of India’s contemporary reality… which questioned our claim.”ಎಂದು ಪೋಸ್ಟ್ ಮಾರ್ಟಂ ಮಾಡಿದ್ದರು.

ಈಗ ಹಾಲೀ ಎನ್ ಡಿ ಎ ಸರಕಾರ ಕೂಡ ಅಂತಹದೇ ಒಂದು ಜೂಜಾಟಕ್ಕೆ ಇಳಿದಿದ್ದು, ನವೆಂಬರ್ 8ರಂದು ನೋಟು ರದ್ಧತಿಯ ಪ್ರಕಟಣೆ ಮಾಡುವ ಮೂಲಕ ದೇಶದಲ್ಲಿ ಭ್ರಷ್ಟಾಚಾರ, ಕಪ್ಪುಹಣ ಬುಡಸಮೇತ ನಿರ್ಮೂಲಗೊಂಡಿದೆ ಎಂದು ಹೇಳಿಕೊಂಡಿದೆ. ಇದರ ಸತ್ಯಾಸತ್ಯತೆ, ಪರಿಣಾಮಗಳ ಬಗ್ಗೆ ಚರ್ಚೆ ನಡೆಯುತ್ತಿದೆ, ದೇಶ ಅದರ ಪರಿಣಾಮಗಳನ್ನು ಅನುಭವಿಸುತ್ತಲೂ ಇದೆ. ಈ ಎಲ್ಲ ಗದ್ದಲಗಳ ನಡುವೆ ಒಂದು ವಿಶೇಷ ಗಮನಿಸಿದ್ದೀರಾ?

ಸ್ವಾತಂತ್ರ್ಯದ ಬಳಿಕ  60 ವರ್ಷಗಳುದ್ದಕ್ಕೂ ದೇಶದ ಎಲ್ಲ ಭ್ರಷ್ಟಾಚಾರ, ಕಪ್ಪುಹಣಗಳ “ಮುಳ್ಳಿನ ಕಿರೀಟ”ವನ್ನು ಧರಿಸಿ, ಅದರ ಭಾರವನ್ನು ಹೊತ್ತು ಏದುಸಿರು ಬಿಡುತ್ತಿದ್ದ ಕಾಂಗ್ರೆಸ್ ಪಕ್ಷ ಈಗ ನರೇಂದ್ರ ಮೋದಿ ಶುದ್ಧೀಕರಿಸಿರುವ ಗಂಗೆಯಲ್ಲಿ ಮುಳುಗೆದ್ದು ಪಾವನಗೊಂಡಿದೆ; ಅದರ ತಲೆಯ ಮೇಲಿದ್ದ ಮುಳ್ಳಿನ ಕಿರೀಟ ಈಗ ಸ್ವತಃ ಎನ್ ಡಿ ಎ ಯ ತಲೆಯೇರಿ ಕುಳಿತಿದೆ. ಕಾಂಗ್ರೆಸ್ಸಿನ ಆಡಳಿತ ಕಾಲದ ಎಲ್ಲ ಕಪ್ಪುಹಣ ಬಯಲಿಗೆ ಬಂದ ಮೇಲೆ ಇನ್ನು ನವೆಂಬರ್ ಎಂಟರಿಂದ ಈಚೆಗೆ ದೇಶದಲ್ಲಿ ಹುಟ್ಟುವ ಪ್ರತಿಯೊಂದು ಕಪ್ಪು ರೂಪಾಯಿಯ ಮೇಲೂ ಮೋದಿ ಸರಕಾರದ ಹೆಸರು ಬೀಳುವುದು ಅನಿವಾರ್ಯ ಆಗಲಿದೆ.

ಕಪ್ಪುಹಣ ಎಂದರೆ ಅದು ಎಲ್ಲೋ ಯಾವತ್ತೋ ಉಂಟಾಗಿ ಶೇಖರಣೆ ಆದದ್ದಲ್ಲ. ಪ್ರತಿದಿನ ಕಪ್ಪು ಹಣ ಹುಟ್ಟುತ್ತಿರುತ್ತದೆ. ದಿನಕ್ಕೊಂದು ಲಕ್ಷ ವ್ಯಾಪಾರ ಮಾಡುವ ಒಬ್ಬ ವ್ಯಾಪಾರಿ ಅದರಲ್ಲಿ ತೊಂಬತ್ತು ಸಾವಿರಕ್ಕೆ ತೆರಿಗೆ ಕಟ್ಟಿ, ಹತ್ತು ಸಾವಿರಕ್ಕೆ ತೆರಿಗೆ ತಪ್ಪಿಸಿದರೂ,  ಈಗ 50 ದಿನಗಳಲ್ಲಿ  ಐದು ಲಕ್ಷ ರೂಪಾಯಿಗಳ ಕಪ್ಪುಹಣ ಸಂಗ್ರಹಿಸಿರುತ್ತಾನೆ.

ನರೇಂದ್ರ ಮೋದಿಯವರು ನವೆಂಬರ್ 8 ರ ನೋಟು ರದ್ಧತಿಯ ಪ್ರಕಟಣೆಯ ಬಳಿಕ, ಕಪ್ಪು ಹಣ ಮತ್ತೆ ಹುಟ್ಟದಂತೆ, ಹಲವು ಪೂರಕ ಕ್ರಮಗಳನ್ನು ತೆಗೆದುಕೊಳ್ಳಬೇಕಾಗಿತ್ತು. ಆದರೆ, ಈಗ ಉಂಟಾಗಿರುವ ವಿಷಮ ಪರಿಸ್ಥಿತಿಯನ್ನು ನಿಭಾಯಿಸುವುದರಲ್ಲೇ ಅವರ ತಂಡದ ಸಂಪೂರ್ಣ ಚೈತನ್ಯ ವಿನಿಯೋಗ ಆಗುತ್ತಿದೆ. 10-20 ಸಾವಿರ ರೂಪಾಯಿಗಳಿಗಿಂತ ಹೆಚ್ಚಿನ ಪ್ರಮಾಣದ ವ್ಯವಹಾರಗಳನ್ನು ಕಡ್ಡಾಯವಾಗಿ ನಗದು ರೂಪದಲ್ಲಿ ಮಾಡುವಂತಿಲ್ಲ,  ಒಂದು ನಿರ್ದಿಷ್ಟ ಮೊತ್ತಕ್ಕಿಂತ ಹೆಚ್ಚು ನಗದು ಹೊಂದಿರುವುದು ಅಪರಾಧ ಎಂಬಂತಹ ಪೂರಕ ನಿಯಮಗಳು ಬರದೆ ಇದ್ದಲ್ಲಿ, ನವೆಂಬರ್ 8ರ ತೀರ್ಮಾನ ನೀರಿನಲ್ಲಿಟ್ಟ ಹೋಮ ಮಾತ್ರ. ಇನ್ನಾರು ತಿಂಗಳ ಒಳಗೆ ದೇಶದಲ್ಲಿ ಹಿಂದೆ ಇದ್ದಷ್ಟೇ ಕಪ್ಪುಹಣ ಹುಟ್ಟಿಕೊಳ್ಳಲಿದೆ.

ಹೀಗೆ ಹುಟ್ಟಿಕೊಂಡ ಪ್ರತೀ ಹೊಸ ಕಪ್ಪು ರೂಪಾಯಿಗೂ ನರೇಂದ್ರ ಮೋದಿಯವರ ಸರಕಾರವೇ ಉತ್ತರದಾಯಿ ಆಗಬೇಕಾಗುತ್ತದೆ. ಹಾಗಾಗಿ, ಮುಂದಿನ ಚುನಾವಣೆಯ ವೇಳೆಗೆ ಕಾಂಗ್ರೆಸ್ಸಿಗೆ ಕೂಡ ಮೋದಿ ಸರಕಾರವನ್ನು ಕಪ್ಪುಹಣದ ಹೆಸರಿನಲ್ಲಿ ಹಣಿಯುವ ಅವಕಾಶ ಸಿಗಲಿದೆ.

ಈವತ್ತು ವೀರಾವೇಶದಲ್ಲಿ ಆಡಿದ ಮಾತುಗಳು, ಎಚ್ಚರ ತಪ್ಪಿದರೆ ಮುಂದಿನ ಚುನಾವಣೆಯ ವೇಳೆ ಎನ್ ಡಿ ಎ ಸರಕಾರಕ್ಕೆ ನುಂಗಲಾಗದ ಉಗುಳುಗಳಾಗಿ ಕಾಡಲಿವೆ. ಮಿಂದು ಪವಿತ್ರಗೊಂಡು ಕುಳಿತಿರುವ ಕಾಂಗ್ರೆಸ್ಸಿಗೆ ಮತ್ತಿತರ ವಿರೋಧ ಪಕ್ಷಗಳಿಗೆ ಕುಳಿತಲ್ಲಿಗೇ ಹರಿತವಾದ ಆಯುಧಗಳು ಸಿಗಲಿವೆ.