ಜಮುನಾ ರಾಣಿ ಎಚ್ ಎಸ್

ಅ೦ದು ಸ೦ಕ್ರಾತಿಯ ಗಾಳಿಪಟ ಹಾರಿಸುವ ದಿನ. ಬಣ್ಣ ಬಣ್ಣದ ವಿವಿಧ ಆಕೃತಿಗಳ ಗಾಳಿಪಟಗಳನು ಮೇಲೇರಿಸುವಲ್ಲಿ ಎಲ್ಲರ ಗಮನ ಸೂತ್ರವ ಹಿಡಿದ ದಾರಗಳ ಮೇಲೆಯೇ ನೆಟ್ಟಿತ್ತು. ಇನ್ನೇನು ಚಳಿಗಾಲ ಮುಗಿಯುವ ಹ೦ತದಲ್ಲಿರುವಾಗ ಎದ್ದೇಳುವ ದೂಳಿನ ಗಾಳಿಗೂ ಕಣ್ಗಳನು ಮುಚ್ಚಲು ಬಯಸದ ಸ್ಪರ್ಧಿಗಳು ನಾ ಮು೦ದು ತಾ ಮು೦ದು ಎ೦ದು ಉರಿಯುವ ಸೂರ್ಯನನು ತಲುಪಲು ಬಿಟ್ಟ೦ತಿದ್ದವು ಲೆಕ್ಕವಿಲ್ಲದಷ್ಟು ಬಾಲ೦ಗೋಚಿಗಳೊಡನೆ ಹಾರುತಿದ್ದ ಕಾಗದದ ಹಕ್ಕಿಗಳು. ಬೆಳಗಿನಿ೦ದ ಮೈದಾನದಲ್ಲಿ ಆಡುತಿದ್ದ ವಯಸ್ಸಿನ ಅ೦ತರವಿಲ್ಲದೆ ನಲಿಯುತಿದ್ದ ಸ್ಪರ್ಧಿಗಳಲ್ಲಿನ ಉತ್ಸಾಹವು ಮಧ್ಯಾಹ್ನದ ಮುಗಿಲ ಮಾರಿ ನೆತ್ತಿಗೇರಿದ್ದರೂ ತಾಪ ತಟ್ಟಿ ಕು೦ದಿಲ್ಲ. ಇನ್ನೂ ಮು೦ಜಾವಿನ ಮ೦ದಹಾಸ ಯಾರ ಮುಖದಲ್ಲೂ ಮಾಸಿಲ್ಲ. ಕಾರ್ಟೂನ್ ಕ್ಯಾರೆಕ್ಟರ್ಸ್, ರಾವಣನಿಗೆ ಕಟ್ಟಿದ ತಲೆಗಳು, ಗ೦ಡುಬೇರು೦ಡ, ಸೀರೆ ಉಟ್ಟು ಮೂಗುತಿ ಅ೦ಚಲಿ ನಾಚುವ ಹುಡುಗಿ, ಆನೆ, ಮಹಿಷಾಸುರ ಮರ್ದಿನಿ, ತಾಜ್ ಮಹಲ್, ಇವುಗಳ ಮಧ್ಯೆ ಕೆ೦ಪುಬಣ್ಣದ ಎರಡು ಹೃದಯಗಳಲಿ ಒ೦ದಕ್ಕೆ ಚಾಕುವಿನಿ೦ದ ಇರಿದ೦ತೆ ಮಾಡಿದ್ದ ಗಾಳಿಪಟ ಕಳೆಗು೦ದಿತ್ತು.

ನೂರಾರು ಗಾಳಿಪಟಗಳ ನೋಡಲು ಸಾವಿರಾರು ಜನರು ಸೇರಿದ್ದರು. ಎಲ್ಲರೂ ಸ್ಪರ್ಧಿಗಳಿಗೆ ಹುರಿದು೦ಬಿಸುವುದರಲಿ ಮಗ್ನರು. ಸ್ಪರ್ಧಾಳುಗಳಲಿ ಗೆಲ್ಲುವುದೊ೦ದೇ ಈಗ ಉಳಿದಿರುವ ಮ೦ತ್ರ. ಜನಜ೦ಗುಳಿಯಲಿ ನಿ೦ತಿದ್ದ ಸ್ಪರ್ಧಿಗಳ ಗೆಳೆಯರು, ಸ೦ಬ೦ಧಿಕರು ತಮ್ಮ ಬಣ್ಣದ ಹಕ್ಕಿಗಳಲ್ಲಿಯೇ ಕಣ್ಣುಗಳ ನೆಟ್ಟಿದ್ದರು. ಇವರ ಮಧ್ಯೆ ಇದ್ದ ಒಬ್ಬ ತು೦ಬು ಕಣ್ಗಳ ಹುಡುಗಿ ಮಾತ್ರ ನಿಲ್ಲದೆ ಕಣ್ಣೀರ ಹಾಕುತ್ತಿದ್ದಳು. ಇದರ ಬಗ್ಗೆ ಯಾರಿಗೂ ಅರಿವೇ ಇರಲಿಲ್ಲ.
ಮಧ್ಯಾಹ್ನದ ಎರಡು ಗ೦ಟೆಯ ಹೊತ್ತಿಗೆ ನೂರರು ಇದ್ದ ಪಟಗಳಲಿ ಕೇವಲ ಆರು ಮಾತ್ರ ಉಳಿದಿದ್ದವು. ಅವುಗಳಲಿ ಬಿರಿದ ಹೃದಯದ ಗಾಳಿಪಟವೂ ಒ೦ದು. ಬೆಳಗಿನಿ೦ದ ಗೆಲುವಿನ ಆಸೆಯ ಏರಿಸುತಿದ್ದ ಎಲ್ಲರಲಿ ಏನೋ ಒ೦ದು ತರಹದ ನಿರೀಕ್ಷೆ ಇತ್ತು. ಆದರೆ ಹೃದಯದ ಗಾಳಿಪಟ ಹಿಡಿದ ಯುವಕನ ಮುಖದಲ್ಲಿ ಕೇವಲ ಹತಾಶೆ, ನಿರಾಶೆ, ನೋವು ಮಾತ್ರ ಎದ್ದು ಕಾಣುತ್ತಿದ್ದವು. ನಿನ್ನೆ ಏನನ್ನೋ ಕಳೆದುಕೊ೦ಡ ಭಾವನೆ ಇ೦ದಿಗೂ ಎಳೆದು ತ೦ದಿತ್ತು. ಗಾಳಿಪಟದ ಆಕೃತಿಯಲಿ ಅದು ಅಭಿವ್ಯಕ್ತವಾಗಿತ್ತು. ಬಾಯಿ ಮಾತನಾಡದೆ ಇದ್ದರೂ ಯಾರಿಗೋ ಏನನೋ ತಿಳಿಸಬೇಕಿದ್ದ ವಿಷಯ ತಿಳಿಸಿಯಾಗಿತ್ತು. ಅದು ತಿಳಿಯಬೇಕಿದ್ದವರಿಗೆ ಅರ್ಥವಾಗಿತ್ತು.
ಅಳುತ ನಿ೦ತಿದ್ದ ಹುಡುಗಿ ನಿಧಾನವಾಗಿ ಅಲ್ಲಿಯೇ ಪಕ್ಕದಲ್ಲಿ ಇದ್ದ ನದಿಯ ಕಡೆಗೆ ಹೆಜ್ಜೆ ಹಾಕಿದಳು. ನಿನ್ನೆ ನಡೆದ ಘಟನೆ ಕಣ್ಣ ಮು೦ದೆ ಬ೦ದ೦ತೆನಿಸಿತು. ಆರು ವರ್ಷ ಪ್ರೀತಿಯ ಎರೆದು ಸಾಕಿದ್ದ ಹೃದಯಕ್ಕೆ ಆಕೆಯ ತ೦ದೆತಾಯಿ ಜಾತಿಯ ನೆಪ ಹೇಳಿ ಇರಿದಿದ್ದರು. ಪ್ರಿಯತಮನಿಗೆ ಪ್ರೀತಿಯ ಬಗ್ಗೆ ಮನೆಯವರಿಗೆ ತಿಳಿಸಿ ಒಪ್ಪಿಗೆ ಪಡಿಯುವೆನೆ೦ದು ಹೇಳಿದ್ದಳೇ ವಿನಃ ಅದರ ನ೦ತರದ ಯಾವುದೇ ಬೆಳವಣಿಗೆಗಳನೂ ತಿಳಿಸಿರಲಿಲ್ಲ. ಅವನು ಮೊಬೈಲ್ ಗೆ ಕರೆ ಮಾಡಿದಾಗ ಮಾತನಾಡಿಯೂ ಇಲ್ಲ. ನಿಧಾನವಾಗಿ ಸಾಗಿದ್ದ ಅವಳಿಗೆ ಆ ಗಾಳಿಪಟಗಳು ಕಾಣಿಸುತ್ತಲೇ ಇದ್ದವು. ನಿನ್ನೆಯ ನೆನಪೋ ಆ ಇರಿದ ಹೃದಯದ ಗಾಳೀಪಟವೋ ಗೊತ್ತಿಲ್ಲ. ಏನೋ ಅವಳ ಕಣ್ಣುಗಳಲಿ ಧಾರಾಕಾರವಾಗಿ ಸುರಿಸುತಿದೆ ನದಿಯ ಸೇರಲು ತವಕಿಸುತಿದೆ.
ಇತ್ತ ಈ ಹುಡುಗನ ಸ್ಥಿತಿಯೂ ಹಾಗೆಯೇ, ಕಣ್ಗಳಲಿ ನೀರು ತು೦ಬಿದ್ದರೂ ಹೊರಹಾಕಲು ಏಕೋ ಮೀನಾಮೇಷ. ಅ೦ತರಾಳದ ಸ್ಥಿತಿ ಹಾರುತಿರುವ ಹಕ್ಕಿಯಲಿ ಬಿತ್ತರವಾಗುತಿದ್ದರೂ ತೋರಗೊಡದೆ ಅವಡುಗಚ್ಚಿಹನು. ಇನ್ನೇನು ಇವನೇ ಗೆದ್ದಿರುವುದೆ೦ದು ಘೋಷಿಸಬೇಕು ಅಷ್ಟರಲ್ಲಿ ಯಾರೋ ನದಿಗೆ ಬಿದ್ದರೆ೦ದು ಎಲ್ಲರೂ ಓಡಿದರು. ಇತ್ತ ಎದೆಯನ್ನು ಕೈಯಲ್ಲಿ ಹಿಡಿಯುತ್ತಾ ಹುಡುಗ ಕೆಳಕ್ಕುರುಳಿದನು. ಸೂತ್ರವು ಅರಿದು ಗಾಳಿಪಟ ಬಾನತ್ತ ಸಾಗಿತ್ತು. ಬಹುಶಃ ಬೆಳಕ ಚೆಲ್ಲುತಿರುವ ರವಿಗೆ ಏನನ್ನೋ ಹೇಳಲು ಇರಬಹುದು. ಇಷ್ಟೊ೦ದು ಜನರ ಮಧ್ಯೆ ಬೆಳಗಿನಿ೦ದ ಇದ್ದರೂ ಯಾರೂ ಇವರಿಬ್ಬರ ನೋವ ಅರಿಯಲು ಪ್ರಯತ್ನಿಸಲೇ ಇಲ್ಲ. ಕಾಗದದ ಗಾಳೀಪಟಕ್ಕೆ ಇರಿದ ಜಾತಿಯ ಚೂರಿ ತಲುಪಿದ್ದು ಮಾತ್ರ ಎರಡು ಆತ್ಮಗಳು ನೆಮ್ಮದಿಯಿ೦ದ ಸ೦ದಿಸುವ ಸ೦ತಸದ ಊರಿಗೆ. ಇಲ್ಲಿ ನಿಮ್ಮನು ಏನೂ ಕಾಡುವುದಿಲ್ಲ ಎ೦ಬ ಭರವಸೆಯ ಹರಡುತಾ……