ರವಿ ಅಜ್ಜೀಪುರ ಈಗ ಬ್ಲಾಗ್ ಮಂಡಲಕ್ಕೆ ಕಾಲಿಟ್ಟಿದ್ದಾರೆ. ಅಜ್ಜೀಪುರ ಅವರನ್ನ ಪರಿಚಯ ಮಾಡಿಸಬೇಕಾಗಿಲ್ಲ.  ಹೊಸ ವರ್ಷದ ಶುಭಾಷಯ ಪತ್ರದ ಮೂಲಕ ಅವಧಿಯ ಎಲ್ಲರಿಗೂ ಪರಿಚಿತರು. ‘ನದಿ ಪ್ರೀತಿ’ ಎಂಬ ಭಿನ್ನ ಹೆಸರಿನೊಂದಿಗೆ ಬ್ಲಾಗ್ ಮಂಡಲಕ್ಕೆ ಅಕ್ಷರ ಅಕ್ಕೀ ಕಾಳು ಹಾಕಿದ್ದಾರೆ. ಇವರ ಬ್ಲಾಗ್ ಇಷ್ಟವಾದರೆ ಮೈಲ್ ಮಾಡಿ: raviajjipura@gmail.com

ನಾನು ರವಿ ಅಜ್ಜೀಪುರ. ವೃತ್ತಿಯಲ್ಲಿ ಪತ್ರಕರ್ತ. ಎಲ್ಲಾ ಮನಸ್ಸುಗಳು ಮೆಚ್ಚಿಕೊಂಡಿರುವ ಓ ಮನಸೇ ಪತ್ರಿಕೆಯಲ್ಲಿ ಸದ್ಯಕ್ಕೆ ಕೆಲ್ಸ. ಓದುಗರೆಲ್ಲ ಚೆನ್ನಾಗಿ ಬರೀತೀಯ ಅಂತ ಬೆನ್ನು ತಟ್ತಾರೆ. ಬರವಣಿಗೆ ಅಂದ್ರೆ ನನಗೂ ಮನಸ್ಸು ಹದಿನೈದರ ಹುಡುಗಿ ಥರ ಜೋಶ್ನಲ್ಲಿರುತ್ತೆ. ಇಷ್ಟೇನಾ ನಿನ್ನ ಪ್ರತಿಭೆ ಅಂತ ಕೇಳಿದ್ರೆ, ಚೆಂದಕ್ಕೆ ಚಿತ್ರ ಬರೀತೀನಿ, ಫಸ್ಟ್ಕ್ಲಾಸ್ ಕವರ್ಪೇಜ್ ಡಿಸೈನ್ ಮಾಡ್ತೀನಿ, ಕಥೆ-ಕವಿತೆ ಬರೀತೀನಿ. ಮುಂದೆ ಎಂದಾದ್ರೂ ಒಂದು ಸಕ್ಕತ್ ಫಿಲ್ಮ್ ಮಾಡಬೇಕು ಅನ್ನೋ ಆಸೆ ಗಾಳಿಪಟದ ಥರ ಮನದ ಆಕಾಶದಲ್ಲಿ ಹಾರ್ತಿದೆ. ಇದಲ್ದೆ ಇನ್ನೂ ಏನೇನೋ ಆಸೆ ಇದೆ. ಸದ್ಯಕ್ಕೆ ಅವೆಲ್ಲ ಅನ್ಇಂಟರೆಸ್ಟಿಂಗ್.

ಇನ್ನು ಈ ನದಿ ನಿಲ್ಲುವುದಿಲ್ಲ…

ಹಾಯ್

ನದಿ ಬಗ್ಗೆ ನಿಮಗೆಲ್ಲ ಖಂಡಿತಾ ಗೊತ್ತಿದೆ. ಎಲ್ಲೋ ಇವತ್ತಿನ ಮಕ್ಕಳಿಗೆ ನದಿ ಅನ್ನೋದು ಹೇಗಿರುತ್ತೆ ಅಂದ್ರೆ ಮ್ಯಾಪ್ನಲ್ಲಿ ತೋರಿಸಿ “ದಿಸ್ ಈಸ್ ರಿವರ್” ಅಂತ ಹೇಳಬಿಡ್ತಾವೆ. ಅವಕ್ಕೆ ನದಿಯ ಜಾಯಮಾನ ಗೊತ್ತಿಲ್ಲ. ಸೆಳಹು ಗೊತ್ತಿಲ್ಲ. ಪರಿಧಿ ಗೊತ್ತಿಲ್ಲ. ಅದರ ಉದ್ದ ಅಗಲವೂ ಗೊತ್ತಿಲ್ಲ. ಎಲ್ಲಕ್ಕಿಂತ ಹೆಚ್ಚಾಗಿ ಅದರ ಪ್ರೀತಿ ಗೊತ್ತಿಲ್ಲ.
ನಿಜ ಹೇಳಬೇಕು ಅಂದ್ರೆ, ಅದರ ತೆಕ್ಕೆಗೆ ಏನು ಸಿಗುತ್ತೋ ಅದನ್ನೆಲ್ಲ ತೆಗೆದುಕೊಂಡು ಹೋಗೋದು ನದಿಯ ಜಾಯಮಾನ. ಅದಕ್ಕೆ ಯಾರು ಹೆಚ್ಚೂ ಅಲ್ಲ ಕಡಿಮೆಯೂ ಅಲ್ಲ. ದಾಹ ಅಂತ ಬಗ್ಗಿದವ ನೀರು ಸಿಕ್ಕ ಖುಷಿಯಲ್ಲಿ ಸ್ವಲ್ಪ ಯಾಮಾರಿದರೂ ನದಿ ಬಿಡೊಲ್ಲ ಅನ್ನೋದು ನಿಮಗೆ ಗೊತ್ತಿದೆ. ಬದುಕೂ ಹಾಗೆ. ನದಿಯ ಥರ. ಹರಿದದ್ದೇ ದಾರಿ. ನಾವು ಅದರ ಸೆಳೆತಕ್ಕೆ ಒಳಗೊಳ್ಳಬೇಕೇ ವಿನಃ ಅದು ನಮ್ಮ ತನಕ್ಕೆ ಒಗ್ಗುವುದಿಲ್ಲ. ಅಂತಹ ನದಿಯ ಪ್ರೀತಿಯನ್ನೇ ಬೊಗಸೆಯಲ್ಲಿ ಬಾಚಿ ತಂದು ಈ ಬ್ಲಾಗ್ನಲ್ಲಿ ಇಡಲು ಪ್ರಯತ್ನಿಸುತ್ತೇನೆ.
ಇನ್ನು ಮುಂದೆ ನದಿ ನಿಲ್ಲುವುದಿಲ್ಲ. ಅದರ ಪ್ರೀತಿಯೂ.
ಒಪ್ಪಿಸಿಕೊಳ್ಳಿ.