– ವೈಶಾಲಿ ಹೆಗಡೆ

ಇಂದು ಡಾಯಪರ್ ನಿಂದ ಹಿಡಿದು ಮಾರಕಾಸ್ತ್ರದವರೆಗೆ  ಅಂತರ್ಜಾಲದಲ್ಲಿ ಏನು ಸಿಗುವುದಿಲ್ಲ! ಹೌದು ಅಮೇರಿಕಾದವರಿಗೆ ಕನ್ನಡ ಪುಸ್ತಕ ಸಿಗುವುದಿಲ್ಲ. ರಿಲ್ಕೆ, ಎಜರಾ ಎಲ್ಲ ಕವಿತೆಗಳ ಹಿಡಿದು ಎಡತಾಕುತ್ತಾರೆ, ಕಾಫ್ಕಾ,ನೆರೂಡ ಸಿಕ್ಕು ಹಾಯ್ ಹಲೋ ಎನ್ನುತ್ತಾರೆ. ಆದ್ರೆ ಅಂತರ್ಜಾಲದ ಬೀದಿಗಳಲ್ಲೆಲ್ಲೂ ನನಗೆ ಪಂಪನ ಕಂಪು ಸಿಗುವುದಿಲ್ಲ. ಚಿತ್ತಾಲರು ಚಿತ್ತೈಸುವುದಿಲ್ಲ. “ಗಂಗಾವತರಣ”ಗೊಳ್ಳುವುದಿಲ್ಲ. ಕನ್ನಡದ ನೆಲದಲ್ಲೇ ಬೆಳೆಯುವಾಗ, ಸುತ್ತಲೂ ಹೇರಳ ದೊರೆಯುತ್ತಿದ್ದ ಪುಸ್ತಕಗಳೇ ಯಾಕೆ, ಕೊನೆಗೆ ಅಂಗಡಿಯಿಂದ ತಂದ ಪೊಟ್ಟಣ ಕಟ್ಟಿದ್ದ ರದ್ದಿ ಪೇಪರೂ ಓದಿಸಿಕೊಳ್ಳದ ಹೊರತು ಕಸವಾಗುತ್ತಿರಲಿಲಿಲ್ಲ. ಆಗೆಲ್ಲ ಸಿಕ್ಕಸಿಕ್ಕದ್ದನ್ನು ಓದುವ ತಹತಹಿಕೆಯಿತ್ತು. ಈಗಲೂ ಇದ್ದರೂ ಅದರ ಗತಿ, ಗುರಿ ಬದಲಾಗಿದೆ. ಅದು ಓದುಗನ ಸಹಜ ಬೆಳವಣಿಗೆ. ಓದುತ್ತ ಓದುತ್ತ, ಮೌಲಿಕವಾದದ್ದನ್ನು ಆರಿಸಿಕೊಳ್ಳುತ್ತ ಸಾಗುವಾಗ, ಜಗತ್ತಿನ ಯಾವ ಭಾಗದಲ್ಲಿದ್ದರೂ ಯಾವ ಭಾಷಿಕರಾದರೂ ಒಮ್ಮೊಮ್ಮೆ ಖಾಲಿತನ ಕಾಡುವುದು ಕೂಡ ಸಹಜ. ಹಾಗೆ ನೋಡಿದರೆ ಕನ್ನಡ ಪುಸ್ತಕಗಳು ಇತೀಚೆಗೆ ಬಿಡುಗಡೆಯಾಗುವ ಸಂಖ್ಯೆ ಗಣನೀಯವಾಗಿ ಏರಿದೆ. ಆದರೆ ಇಲ್ಲಿರುವ ನಮಗೆ ಪದೇ ಪದೇ ಕಾಡುವ ಓದಿನ ಖಾಲಿತನ ಅನಿವಾರ್ಯ ಅಸಹಾಯಕತೆ.

ಇಲ್ಲಿ ಕೊರಗೆಂದರೆ ಸೀಮಿತ ಮಾರುಕಟ್ಟೆಯ ಅಧ್ವಾನದ ಗ್ರಾಹಕರು ನಾವು. ಕನ್ನಡ ಸಾಹಿತ್ಯದ ಓದುಗರ ವಲಯ ತೀರ ಪರಿಮಿತವಾದದ್ದು. ಹಾಗಾಗಿ ನಿಯಮಿತ ಸಂವಹನ ಕೂಡ ನಮಗೆ ಕಷ್ಟಸಾಧ್ಯವೇ ಆಗಿದೆ ಇಂದಿನ ಅಂತರ್ಜಾಲದ ಯುಗದಲ್ಲಿ ಕೂಡ.  ಅದರಲ್ಲೂ ಇಲ್ಲಿನ ಬಹಳಷ್ಟು ಕನ್ನಡಪ್ರೇಮಿಗಳು, ಒಂದು ಕಾಲಘಟ್ಟದ ಕನ್ನಡವನ್ನು ಹಿಡಿದಿಟ್ಟು ಹೊತ್ತು ತಂದು ಹಾಗೆಯೆ ಘನೀಕರಿಸಿಕೊಂಡು ಬಿಟ್ಟಿದ್ದಾರೆ. ಅವರ ಮನದಲ್ಲಿನ ಕನ್ನಡ ಸಾರಸ್ವತ ಲೋಕದ ದಿಗ್ಗಜರುಗಳಿಂದೀಚೆಗಿನ  ಕನ್ನಡದ ಹರಿವು ಇಲ್ಲಿನ ಅರಿವಿಗೆ ಸುಲಭಕ್ಕೆ ದಕ್ಕುವಂತದ್ದಲ್ಲ. ಅದಕ್ಕೆ ಮುಖ್ಯ ಕಾರಣ ಕನ್ನಡ ಪುಸ್ತಕಗಳು ಬೇಕು ಎಂದುಕೊಂಡರೂ ಇಲ್ಲಿ ಸುಲಭದಲ್ಲಿ ದೊರಕುವಂತದ್ದಲ್ಲ. ಅವರೆಲ್ಲ ಅವೇ ಪುಸ್ತಕಗಳಲ್ಲಿ ತಮ್ಮ ಅಸ್ತಿತ್ವವನ್ನು ಜೋಡಿಸಿಟ್ಟಿದ್ದಾರೆ. ತೀರ ಇತ್ತೀಚಿನವರೆಗೆ, ಹೊಸ ಪುಸ್ತಕಗಳನ್ನು ಕೊಳ್ಳಬೇಕೆಂದರೂರೂ ಅವರಿಗೆ ಉತ್ತಮ ಕೃತಿ ಯಾವುದು, ಕೃತಿಕಾರರು ಯಾರು, ತಮ್ಮದೇ ಮೆಚ್ಚಿನ ಕೃತಿಕಾರರ ಹೊಸ ಪುಸ್ತಕ ಕೂಡ ಬಂದಿದೆಯೇ ಇಲ್ಲವೇ ಎಂಬ ಸ್ಪಷ್ಟ ಅರಿವಿರುತ್ತಿರಲಿಲ್ಲ. ಆದರೆ ಸಾಮಾಜಿಕ ತಾಣಗಳ ಆಸ್ಫೋಟ, ಅಂತರ್ಜಾಲದಲ್ಲಿ ಕನ್ನಡದ ತಾಣಗಳ ನೆರವಿನಿಂದಾಗಿ, ಹೊಸ ಪುಸ್ತಕಗಳ ಬಿಡುಗಡೆ ಎಂದು ಕೇಳಿ ಬರುತ್ತದೆ, ಮುಖಪುಟ ಕಂಡು ಬರುತ್ತದೆ. ಕನ್ನಡ ಅಕ್ಷರ ಲೋಕ ಖಂಡಿತ ಅಂತಾರಾಷ್ಟ್ರೀಯವಾಗಿ ಹರಡಿಕೊಂಡಿದೆ. ಆದರೆ ಪುಸ್ತಕ ಕೈಗೆ ಎಟುಕುವುದು ಮಾತ್ರ ಭಾರತ ಪ್ರವಾಸದಲ್ಲೇ.

ಅಂತದ್ದರಲ್ಲಿ ಸಂಪೂರ್ಣ ವಿದ್ಯುನ್ಮಾನ ಪುಸ್ತಕಗಳಾಗಿ ಕನ್ನಡ ಪುಸ್ತಕಗಳು ದೊರೆಯುವುದಂತೂ ದೂರವೇ ಉಳಿಯಿತು. ಪ್ರಕಾಶಕರು ಆ ಬಗ್ಗೆ ಹೆಚ್ಚಿನ ಆಸ್ಥೆ ತೋರಿಸುತ್ತಿಲ್ಲ. ಬಂಡವಾಳ ಕೂಡ ಗಿಟ್ಟೋದಿಲ್ಲ ಬಿಡ್ರೀ ಇದೆಲ್ಲ ಕನ್ನಡಕ್ಕೆ ಆಗಿ ಬರೋದಿಲ್ಲ ಎಂದು ಉಡಾಫೆ ಮಾಡಿಬಿಡುತ್ತಾರೆ. ನೂರು ರೂಪಾಯಿಯ ಪುಸ್ತಕವನ್ನೇ ಕೊಂಡು ಓದದೆ ಪಿ. ಡಿ. ಎಫ್. ಕಾಪಿ ಮಾಡಿಸಿ ಬಳಗಕ್ಕೆಲ್ಲ ಹಂಚುವ ಜನ ಇರುವಾಗ ಪ್ರಕಾಶಕರ ಮಾತನ್ನು ಕೂಡ ನಾವು ಅಲ್ಲಗಳೆಯುವಂತಿಲ್ಲ. ಇವರ್ಯಾಕೆ ಒಂದು ಪುಸ್ತಕದಹಕ್ಕು, ಪ್ರಕಾಶಕರ ಹಕ್ಕು, ಬರಹಗಾರರ ಗೌರವಧನ, ಚಂದಾ  ಎಂದೆಲ್ಲ ತಲೆಕೆಡಿಸಿಕೊಂಡು ಚಂದಗಾಣಿಸಿಯಾರು?! ಇನ್ನು ಕೆಲವು ವಿಶ್ವವಿದ್ಯಾಲಯಗಳ ಗ್ರಂಥಾಲಯಗಳನ್ನು ಅಂತರ್ಜಾಲಕ್ಕೇರಿಸಲಾಗಿದೆ. “ಕಣಜ”ದಂತ ಕೆಲವೆಡೆ “ಕ್ಲಾಸಿಕ್” ಕೃತಿಗಳು ದೊರೆತರೂ ಬಹಳಷ್ಟು ವಿಶ್ವವಿದ್ಯಾಲಯಗಳ ಗ್ರಂಥಾಲಯಗಳಲ್ಲಿ ಸಂಶೋಧನಾತ್ಮಕ ಕೃತಿಗಳೇ ತುಂಬಿರುತ್ತವೆ. ಸಮಕಾಲೀನ ಸಾಹಿತ್ಯದ ಹೋಗಲಿ, ಒಂದು ಹತ್ತಿಪ್ಪತ್ತು ವರ್ಷದ ಹಿಂದಿನ  ಪುಸ್ತಕಗಳೂ ಕೂಡ ದೊರೆಯುವುದಿಲ್ಲ.  ಬ್ಲಾಗ್, ಅಂತರ್ಜಾಲ ಪತ್ರಿಕೆಗಳು ಕನ್ನಡದ ಹೊಸ ಓದಿನ ಬಯಕೆಯನ್ನು ಅಷ್ಟಿಷ್ಟು ತಣಿಸಿದರೂ ಒಂದಿಡೀ ಪುಸ್ತಕದ ಓದಿನ ಅನುಭವಕ್ಕೆ ಸಾಟಿಯಲ್ಲ. ನನ್ನ ಪುಸ್ತಕ ಭಂಡಾರ ಖಾಲಿಯಾದಾಗೊಮ್ಮೆ ಇಲ್ಲಿ ಸ್ನೇಹಿತರ ಮನೆ ಗ್ರಂಥಾಲಯಗಳಿಗೆ ಲಗ್ಗೆ ಇಡುತ್ತೇನೆ.

ನಮ್ಮ ಪುಸ್ತಕಗಳ ತರಹೇವಾರಿ ತಾತ್ಕಾಲಿಕ ವಿಲೇವಾರಿ ನಡೆಯುತ್ತದೆ. ಆದರೆ ಕೊರೆವ ಚಳಿಯಲ್ಲಿ ಬೆಚ್ಚಗಿನ ಓದಿಗೆ ಪುಸ್ತಕ ಬೇಕೆಂದಾಗ ನಿನ್ನೆ ಬಿಡುಗಡೆಯಾದ ಚಂದದ ಪುಸ್ತಕವೊಂದು ಇಲ್ಲಿ  ಕುಳಿತ  ನನ್ನ ಕೈ ಸೇರುವಂತಿದ್ದರೆ!, ನನ್ನ ಬಳಿಯೊಂದು ಅಲ್ಲದೀನನ ಬಳಿಯಿದ್ದಂತ ಮಾಯದ ದೀಪವಿದ್ದು ಅದನ್ನು ಉಜ್ಜಿದಾಗೊಮ್ಮೆ ಹೊಸದೊಂದು ಪುಸ್ತಕ ಬಂದು ಬೀಳುವಂತಿದ್ದರೆ ಎಂದೆಲ್ಲ ದೇವರಲ್ಲಿ ಬೇಡಿಕೊಂಡ ಪುಸ್ತಕ ಬರಗಾಲದ ದಿನಗಳೂ ಇವೆ.  ಪ್ರತಿ ಬಾರಿ ಭಾರತ ಪ್ರವಾಸಕ್ಕೆ ಹೋದಾಗ ಹೊಸ ಹೊತ್ತಗೆಗಳನ್ನು ಹೊತ್ತು ತರುವುದೊಂದು ಬಿಟ್ಟರೆ ಸದ್ಯಕ್ಕಂತೂ ಬೇರೆ ಉಪಾಯವಿಲ್ಲ. ಕನ್ನಡ ಭಾಷೆಯ ಬಗೆಗಿನ ಇನ್ಯಾವ ಸವಾಲುಗಳು ಬಗೆಹರಿಯದಿದ್ದರೂ ಚಿಂತಿಲ್ಲ, ನನ್ನ ಮನೆಯ ಗ್ರಂಥಾಲಯದ ಹಿಂದೊಂದು ಮಾಯಾದ್ವಾರವಿರಲಿ, ನನಗೆ ಬೇಕಾದ ಹೊಸ ಹೊಸ ಕನ್ನಡ ಪುಸ್ತಕಗಳು ನಿರಂತರ ಬಂದು ಬೀಳುತ್ತಿರಲಿ ದೇವರೇ.