ಜಿ ಎನ್ ಮೋಹನ್ 

‘ನೋಡೋ ಸುನಿತಾ ಅನಂತಸ್ವಾಮಿ ಬೆಂಗಳೂರಿನಲ್ಲಿದ್ದಾಳೆ . ಮಾತಾಡು. ನಿನ್ನ ತಲೆಗೆ ಏನಾದ್ರೂ ಹೊಳೆಯುತ್ತೆ’ ಅಂತ ಫೋನ್ ಮಾಡಿ ಹೇಳಿದ್ದು ಎಚ್ ಎನ್ ಆರತಿ, ದೂರದರ್ಶನದ ಹೆಸರಾಂತ ನಿರ್ಮಾಪಕಿ.
ಮೈಸೂರು ಅನಂತಸ್ವಾಮಿ ಅವರ ಕುಡಿಗಳನ್ನು ನಾನು ಮೈಸೂರು ಅನಂತಸ್ವಾಮಿಯಂತೆಯೇ ಸಂಭ್ರಮಿಸುತ್ತೇನೆ. ಹಾಗಿರುವಾಗ ಸುನಿತಾ ಜೊತೆ ಮಾತನಾಡದೆ ಏನು? ಆದರೆ ಆ ವೇಳೆಗೆ ಸುನಿತಾ ಅಮೆರಿಕಾಗೆ ಹಾರಿಯಾಗಿತ್ತು . ಆದರೂ ಭಾರತ- ಅಮೆರಿಕಾದ ಕತ್ತಲು ಬೆಳಕಿನ ಕಾಲವನ್ನು ಮಣಿಸಿ ನಾವಿಬ್ಬರೂ ಮಾತನಾಡಿದ್ದೇ ಆಡಿದ್ದು.
ಆಗ ನಾನು ಸಮಯ ಚಾನಲ್ ನ ಪ್ರಧಾನ ಸಂಪಾದಕನಾಗಿದ್ದೆ. ತಣ್ಣನೆ ಜಿಗಿದು ಬಂತು ಕನ್ನಡ ರಾಜ್ಯೋತ್ಸವಕ್ಕೆ ಒಂದು ಹಾಡು ಕಟ್ಟುವ ಯೋಚನೆ.
ಹಾಗೆ ಶುರುವಾದ ನನ್ನ, ಸುನಿತಾ ಬಾಂಧವ್ಯ ಮತ್ತೆ ಚಿಗುರಿದ್ದು ನಾನು ‘ಈಟಿವಿ’ ಸುದ್ದಿ ಚಾನಲ್ ನ ಮುಖ್ಯಸ್ಥನಾಗಿ ಬಂದ ಮೇಲೆ. ಆಗಸ್ಟ್ ೧೫ ಕಾಲಿಡುತ್ತಾ ಬರುತ್ತಿತ್ತು. ನಮ್ಮ ದೇಶದಿಂದ ದೂರ ಉಳಿದ ನಮ್ಮ ನೆಲದವರು ಹೇಗೆ ಭಾರತವನ್ನು ಮಿಸ್ ಮಾಡಿಕೊಳ್ಳುತ್ತಾರೆ ಎನ್ನುವುದನ್ನು ನಾನು ಸ್ವತಃ ಅಲ್ಲಿದ್ದು ಅವರ ಚಡಪಡಿಕೆಯ ಮೂಲಕ ಕಂಡಿದ್ದೆ.
ಹಾಗಾಗಿ ಸುನೀತಾ, Why not this? ಅಂತ ‘ಜನಗಣಮನ’ ಆಲ್ಬಮ್ ತಯಾರಿಸುವ ಯೋಚನೆ ಮುಂದಿಟ್ಟೆ
ಸುನಿತಾ ನಾನು ಕಂಡ ಅತ್ಯಂತ ಲವಲವಿಕೆಯ ಹುಡುಗಿ ಆಕೆಗೆ Why not ಗಳೇ ಇಷ್ಟ
ಇದ್ದ ಕಡಿಮೆ ಸಮಯದಲ್ಲಿ  ಅಮೆರಿಕಾದ ಬೇರೆ ಬೇರೆ ಕಡೆ ನೆಲೆ ನಿಂತವರನ್ನು ಕೂಡಿಸಲು ನಿರ್ಧರಿಸಿದೆವು. ಕ್ಯಾಮೆರಾ ಲೈಟ್ ಸ್ಟುಡಿಯೋ ಎಡಿಟಿಂಗ್ ಯಾವುದೇ ತಲೆ ಕೆಡಿಸಿಕೊಳ್ಳದೆ ಯೋಜನೆ ಸಿದ್ಧವಾಗಿಯೇ ಹೋಯ್ತು.
ತಾವೇ ಟ್ರೈಪಾಡ್ ನಿಲಿಸಿ, ಕ್ಯಾಮೆರಾ ಕೂರಿಸಿ ಅದರ ಮುಂದೆ ಇಡೀ ಭಾರತದ ಅಷ್ಟೂ ಕೋಟಿ ಜನರಿಗಾಗಿ ಹಾಡುತ್ತಿದ್ದೇವೇನೋ ಎನ್ನುವ ಪುಳಕದಿಂದ ಎಲ್ಲರೂ ಹಾಡಿ ಅದರ raw footage ಅನ್ನು ನನಗೆ ಕಳಿಸಿಕೊಟ್ಟರು. ಸುನಿತಾ ಹಾಡಿದ್ದೂ ಅಲ್ಲದೆ ಈ ಸಂಭ್ರಮ ಅವರಲ್ಲಿ ಆವರಿಸಿದ ಬಗೆಯನ್ನೂ ಮಾತನಾಡಿದರು.
ಮಿಚಿಗನ್ ನಿಂದ ಸುನಿತಾ ಅನಂತಸ್ವಾಮಿ, ಪೆನ್ಸಿಲ್ವೇನಿಯಾದಿಂದ ಅನಿತಾ ಅನಂತಸ್ವಾಮಿ, ಕ್ಯಾಲಿಫೋರ್ನಿಯಾದಿಂದ ಶೇಷಪ್ರಸಾದ್, ಬೋಸ್ಟನ್ ನಿಂದ ಸೌಮ್ಯಶ್ರೀ, ನ್ಯೂಜೆರ್ಸಿಯಿಂದ ಶ್ರೇಯಸ್ ಶ್ರೀಕಾರ್, ವಾಷಿಂಗ್ಟನ್ ನಿಂದ ಅಭಿಜಿತ್ ಹೀಗೆ ಎಲ್ಲ ದನಿಗಳೂ ಕೂಡುತ್ತಾ ಹೋದವು.
ರಾಷ್ಟ್ರ ಗೀತೆ ಅಂದರೆ ಅದೇ ಅಲ್ಲವೇ- ಹನಿ ಹನಿ ಕೂಡಿ ಹಳ್ಳ
ಅಥವಾ ಏಕ್ ಏಕ್ ಏಕ್ ಅನೇಕ್..
ಇಲ್ಲಿದೆ ಆ ಆಲ್ಬಮ್..