ಅಂಕಿತ ಪುಸ್ತಕ ಮೀಡಿಯಾ ಮಾಲಿಕೆಯನ್ನು ಆರಂಭಿಸಿದೆ. ವರ್ಷದಲ್ಲಿ ಮಾಧ್ಯಮ ರಂಗದ ಅನುಭವಗಳನ್ನು ಒರೆಗಿಕ್ಕುವ ಕನಿಷ್ಠ ಆರು ಕೃತಿಗಳನ್ನು ನೀಡಬೇಕು ಎನ್ನುವುದು ಅಂಕಿತದ ಹಂಬಲ.

ಈ ಮಾಲಿಕೆಯನ್ನು ನಾನು ಸಂಪಾದಿಸಿದ್ದೇನೆ. ಈ ಮಾಲಿಕೆಯ ಮೊದಲ ಕಂತಾಗಿ ಚಿದಂಬರ ಬೈಕಂಪಾಡಿ, ಎಂ ಬಿ ಶ್ರೀನಿವಾಸ ಗೌಡ, ಸುಘೋಷ್ ಎಸ ನಿಗಳೆ ಅವರ ಕೃತಿಗಳು ಬಿಡುಗಡೆಯಾಗುತ್ತಿದೆ.

ನಾಳೆ (ಜೂನ್ ೧೨)ರಂದು ಬೆಳಗ್ಗೆ ೧೦ ಕ್ಕೆ ಬೆಂಗಳೂರಿನ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ವರ್ಲ್ಡ್ ಕಲ್ಚರ್ ನ ವಾಡಿಯಾ ಸಭಾಂಗಣದಲ್ಲಿ ಕಾರ್ಯಕ್ರಮ. ಖಂಡಿತಾ ಬನ್ನಿ. ಮಾಲಿಕೆಗೆ ಬರೆದ ಚುಟುಕು ಮಾತು ಇಲ್ಲಿದೆ-

–

ಪತ್ರಿಕೋದ್ಯಮವನ್ನು ‘ನಾಲ್ಕನೆಯ ಆಸ್ತಿ’ ಎನ್ನುತ್ತೇವೆ. ಹಾಗೆ ನಾಲ್ಕನೆಯ ಆಸ್ತಿ ಎಂಬ ಕಲ್ಪನೆಯೇ ತಪ್ಪು ಎನ್ನುವುದನ್ನು ಅನುಭವ ಕಲಿಸಿಕೊಟ್ಟಿದೆ. ಹಾಗಾದರೆ ನಾವು ಕಾಣುವುದಕ್ಕಿಂತಲೂ ಇನ್ನೇನನ್ನೋ ಅನುಭವ ಕಲಿಸಿಕೊಡುತ್ತದೆಯೇ ಎಂದು ಪ್ರಶ್ನಿಸಿಕೊಂಡಾಗ ಹುಟ್ಟಿದ್ದು ಈ ‘ಮೀಡಿಯಾ ಮಾಲಿಕೆ’ ಆಲೋಚನೆ. ನಾಲ್ಕು ಕೋಣೆಯ ಚೌಕಟ್ಟಿನೊಳಗೆ ಕೂತು ತಾರೆಗಳನ್ನು ಮೀಟುವುದೂ, ಚಂದಿರನನ್ನು ದಾಟುವುದೂ ತೀರಾ ಸುಲಭ. ಆದರೆ ಅನುಭವದ ಕ್ಯಾನ್ವಾಸ್ ನಲ್ಲಿ ಹಾಗಲ್ಲ. ಅಲ್ಲಿ ಭಿನ್ನ ಪಾಠವಿರುತ್ತದೆ. ಅಂತಹ ಭಿನ್ನ ಪಾಠಗಳನ್ನು ಪಡೆದಿರುವವರು ನೇರವಾಗಿ ತಮ್ಮ ಅನುಭವಗಳನ್ನು ಬಣ್ಣಿಸಿಕೊಳ್ಳುವುದೇ ಈ ಮಾಲಿಕೆಯ ವಿಶೇಷ. ಕವಿ ಸುಬ್ಬಣ್ಣ ರಂಗನಾಥ ಎಕ್ಕುಂಡಿ ಅವರು ‘ಕೆಂಡದ ಮೇಲೆ ನಡೆದವನಿಗೆ ಮಾತ್ರವೇ ಕೆಂಡದ ಅನುಭವಗಳನ್ನು ಬಣ್ಣಿಸಲು ಸಾಧ್ಯ’ ಎನ್ನುತ್ತಿದ್ದರು. ಬಹುಷಃ ಇದೂ ಕೂಡಾ ಈ ಮಾಲಿಕೆ ಹುಟ್ಟಲು ಕುಮ್ಮಕ್ಕು ಕೊಟ್ಟಿರಬಹುದು.

ಇದು ಮಾಧ್ಯಮ ಯುಗ. ದಿನಕ್ಕೊಂದು ಹೊಸ ಮಾಧ್ಯಮ ತಂತ್ರಜ್ಞಾನ ತಲೆ ಎತ್ತುತ್ತಿರುವ ಈ ದಿನಗಳಲ್ಲಿ ನಾವು ಥೇಟ್ ಬೆಂಗಳೂರಿನ ಟ್ರಾಫಿಕ್ ಜ್ಯಾಮ್ ನಲ್ಲಿ ಸಿಕ್ಕಿ ಹಾಕಿಕೊಂಡಂತವರಾಗಿದ್ದೇವೆ. ಮುಂದೆ ಹೋಗಲೂ ಸಾಧ್ಯವಿಲ್ಲ, ಹಿಂದೆಯೂ…ಹಾಗಾಗಿಯೇ ಈ ಮಾಧ್ಯಮವನ್ನು ಅರಿತವರು, ಅನುಭವಿಸಿದವರು ತಮ್ಮ ಅನುಭವಗಳನ್ನು ಬರೆದರೆ ಒಳ್ಳೆಯದು ಅನಿಸಿತು. ಅನಿವಾರ್ಯವಾಗಿ ಪ್ರತಿಯೊಬ್ಬರೂ ಮಾಧ್ಯಮಕ್ಕೆ ತೆರೆದುಕೊಳ್ಳಲೇಬೇಕಾಗಿರುವ ಇಂದಿನ ದಿನಗಳಲ್ಲಿ ಮಾಧ್ಯಮ ಲೋಕವನ್ನು ಅರ್ಥೈಸುವುದು ಈ ಪ್ರಯತ್ನದ ಉದ್ಧೇಶ.

ಕನ್ನಡದಲ್ಲಿ ಈ ರೀತಿಯ ಪ್ರಯತ್ನಗಳಾಗಿಲ್ಲ. ಮಾಧ್ಯಮ ಲೋಕದ ಬಗ್ಗೆ ಬೆರಳೆಣಿಕೆಯಷ್ಟು ಮಾತ್ರ ಪುಸ್ತಕಗಳಿವೆ. ಹಾಗಾಗಿ ಈ ಮಾಲಿಕೆ ಮಾಧ್ಯಮ ಬಳಕೆದಾರರಿಗೂ, ಮಾಧ್ಯಮ ವಿದ್ಯಾರ್ಥಿಗಳಿಗೂ, ಮಾಧ್ಯಮ ರಂಗದಲ್ಲಿರುವವರಿಗೂ ಒಂದು ತೋರುದೀಪ. ಈ ಕೃತಿಗಳು ಮಾತನಾಡುತ್ತಿರುವುದು ಈ ಕೃತಿಗಳನ್ನು ಬರೆದವರು ಕಂಡ ಸತ್ಯಗಳನ್ನು ಮಾತ್ರ. ಇದೇ ಅಂತಿಮವಲ್ಲ. ಈ ಕೃತಿಗಳು ಚರ್ಚೆಯನ್ನು ಪ್ರೇರೇಪಿಸುತ್ತವೆ. ಮಾಧ್ಯಮ ಲೋಕವನ್ನು ಅರಿಯಲು ಸಹಾಯ ಮಾಡುತ್ತವೆ. ಈ ಅರಿವನ್ನು ವಿಸ್ತರಿಸಲು ನೀವು ಜೊತೆಗೂಡಿ ಎನ್ನುವುದು ನಮ್ಮ ಮನವಿ

ಜಿ ಎನ್ ಮೋಹನ್