ಕಿರುಗತೆಗಳು

ಶಾಂತ

ಆಕಸ್ಮಿಕವೋ?

ಅವಳಿಗೂ ಇವಳಿಗೂ ಮದ್ಯೆ ತುಂಬಾ ಪ್ರೀತಿ ಇದೆ. ಆದರೆ ಅವರಿಬ್ಬರೂ ಸದಾ ಜಗಳ ಆಡುತ್ತಾ  ಇರುತ್ತಾರೆ. ಇವಳು ಬೈದಾಗ ಅವಳು ಬಾಲ್ಕನಿಯ ತುದಿಗೆ ಹೋಗಿ ನಿಲ್ಲುತ್ತಾಳೆ , ಇಲ್ಲ, ಸೀಲಿಂಗ್ ಫ್ಯಾನ್ ನನ್ನು ದಿಟ್ಟಿಸುತ್ತಿರುತ್ತಾಳೆ . ಮೊನ್ನೆ ಅವಳು ಬಸ್ ಚಕ್ರಕ್ಕೆ ಸಿಕ್ಕಿ ಸತ್ತು ಹೋದಳು. ಅದು ಆಕಸ್ಮಿಕವಲ್ಲ ಅಂತ ನನ್ನ ಅನಿಸಿಕೆ.

*

ಕಾಯುವಿಕೆಗಿಂತ …

ಅವನು ರಮೇಶನಿಗೆ ಒಂದು ಸಾವಿರ ರೂಪಾಯಿ ಸಾಲ ಕೊಟ್ಟಿದ್ದ . ದಿನವೂ ನೋಡಿದರೂ ವಾಪಾಸ್ ಕೊಡುವ ಮಾತೇ ಬರುತ್ತಿರಲಿಲ್ಲ . ರಮೇಶ ಸಾವಿರ ರೂಪಾಯಿ ವಾಪಸ್ ಕೊಟ್ಟಿದ್ದರೆ ಅವನು ‘ಇಟ್ಟುಕೊಂಡಿರು , ಮತ್ತೆ  ಯಾವಾಗಲಾದರೂ ಇಸ್ಕೊತಿನಿ’ ಅಂತ ಹೇಳಬೇಕು ಅಂತ ಇದ್ದ. ಇದ್ದಾನೆ .

*

ಬಿಗಿಯುಸಿರು

ರೆಸ್ಟೋರೆಂಟಿಗೆ  ಹೋದಾಗ ಮುಂದೆ ಇದ್ದ ಗಂಡ -ಹೆಂಡತಿ ಇವಳು ಯಾಕೆ ಒಂಟಿಯಾಗಿ ಬಂದು ಊಟ ಮಾಡ್ತಾ ಇದ್ದಾಳೆ ಅಂತ ಕೇಳಲೂ ಇಲ್ಲ ಮಾತಾಡಿಕೊಳ್ಳಲೂ ಇಲ್ಲ . ಅವಳೇ ಬೇಗ ಬೇಗ ಊಟ ಮುಗಿಸಿ ಹೊರಗೆ ಬಂದು ಉಸಿರಾಡಿದಳು.

*

ಸಾತ್ವಿಕ ಅಹಂಗೊಂದು ಪೆಟ್ಟು

ಕೆಳಗಿನ ಮನೆಯವರಿಗೆ ಇವರನ್ನು ನೋಡಿ ಹೊಟ್ಟೆ ಉರಿ. ಹತ್ತು-ಹಲವು ಬಗೆಯ ಕಿರುಕುಳ ಕೊಟ್ಟಿದ್ದರು.  ಉರಿ ಕಡಿಮೆ ಮಾಡಲು ಇವರು ಅವರಿಗೆ ಊಟ-ಐಸ್ ಕ್ರೀಮ್ ಕೊಡಿಸಿದರು. ಅವರ ಮಗನಿಗೆ ಬಹುಮಾನ ಸಹ ಕೊಟ್ಟರು. ಮಾರನೆ ದಿನ ಇವರ ಕಾರ್ ಟೈಯರ್ ಪಂಚರ್ ಆಗಿತ್ತು .

*

ನಿಟ್ಟುಸಿರಿನಲ್ಲೆನಿದೆ?

ಅವಳು ಅಪರೂಪಕ್ಕೊಮ್ಮೆ ತನ್ನ ಪ್ರೀತಿಯನ್ನು ಅವನ ಮೈದಡವಿ, ನೇವರಿಸಿ ವ್ಯಕ್ತಪಡಿಸಿದರೆ ಅವನು ಉದ್ರೇಕಗೊಳ್ಳುತ್ತಾನೆ . ಅವನ ಏದುಸಿರು ಅವಳ ನಿಟ್ಟುಸಿರು ಒಮ್ಮೆಗೇ ಹೊರಹೊಮ್ಮತ್ತವೆ.

*

ಆಕ್ಸಿಡೆಂಟ್

ಮೂರು  ಜನ ಹುಡುಗರು ಒಂದೇ ಬೈಕನ್ನೇರಿ ಸ್ಪೀಡಾಗಿ ಬಂದು ಗೋಡೆಗೆ ಹೊಡೆದು ಸತ್ತದನ್ನು ನೋಡಿ ಆ ಇನ್ಸಪೆಕ್ಟರ್  ರಾತ್ರಿ ಮನೆಗೆ ಬಂದಾಗ ಅವರ ಅಪಾರ್ಟ್ ಮೆಂಟ್ ನ ಮೂರು ಹುಡುಗರು  ಒಂದೇ ಬೈಕ್ ಹತ್ತಿ ಕೂತಿದ್ರು.

*