ಚರಕ ಎಂಬ ವೈದ್ಯರ ವಿಚಾರಗಳಿಗೂ ವಚನ ಚಳುವಳಿಗೂ ಎತ್ತಣಿಂದೆತ್ತ ಸಂಬಂಧವಯ್ಯಾ?

ಭಾಗ ೫

(ಭಾಗ ೪ ಓದಲು ಇಲ್ಲಿ ಕ್ಲಿಕ್ಕಿಸಿ)

ಆ ಕಾಲದಲ್ಲಿ ವೇದಾಂತದ ಹೆಸರಿನಲ್ಲಿ ಪ್ರಚುರವಾಗಿದ್ದ ಹಾಗೂ ಸಮಾಜದ ಮೇಲೆ ಹಿಡಿತ ಸಾಧಿಸಿದ್ದ , ಜಾತಿವ್ಯವಸ್ಥೆಯನ್ನು ಸಮರ್ಥಿಸುತ್ತಿದ್ದ ಆಧ್ಯಾತ್ಮ ವಿಚಾರಗಳನ್ನು ಧಿಕ್ಕರಿಸುವ ವಿಚಾರಗಳು ವಚನಕಾರರಿಗೆ ಮೂಡಿದ್ದು ಹೇಗೆ ? ಈ ಸಮಾನತೆಯ ತತ್ವದ ಹಿಂದೆ ಭಾರತದ ವೈದ್ಯ ವಿಜ್ಞಾನದ ಅಧ್ವರ್ಯುಗಳಾದ ಚರಕರ ವೈದ್ಯಕೀಯ ಅನುಭವದ ಮೂಸೆಯಲ್ಲಿ ಪಡೆದ ಅರಿವಿನ ಬೆಳಗಿದೆ. ಎಲ್ಲ ದೇಹಗಳೂ ಒಂದೇ ಎಂಬ ಸತ್ಯ ವೈದ್ಯರಿಗೆ ತಿಳಿವಂತೆ ಬೇರೇ ಯಾರಿಗಾದರೂ ತಿಳಿಯಲು ಸಾಧ್ಯವೇ ? ಹೀಗಾಗಿ ಚರಕ ಸಂಹಿತೆಯಲ್ಲಿ ಅಂಗ ತತ್ವಗಳ ನಿರೂಪಣೆ ಅವರ ವೈದ್ಯಕೀಯ ಅನುಭವದ ಹಿಂದಿನ ತಾತ್ವಿಕತೆಯಾಗಿ ವಿವರಿಸಲ್ಪಟ್ಟಿದೆ. 25 ಅಥವಾ ಪಂಚವಿಂಶತಿ ತತ್ವಗಳೆಂದು ಅದನ್ನು ಕರೆಯಲಾಗಿದೆ. ವಚನಗಳಲ್ಲಿಯೂ ಪಂಚ ವಿಂಶತಿ ತತ್ವಗಳನ್ನು ಹಲವು ಬಾರಿ ಪ್ರಸ್ತಾಪ ಮಾಡಿದ್ದಾರೆ, ವಿವರಿಸಿದ್ದಾರೆ. ವಚನಗಳ ಪ್ರಧಾನ ತತ್ವ ಷಟ್ತ್ರಿಂಶತಿ ತತ್ವಗಳು ಅಥವಾ 36 ತತ್ವಗಳೇ. ಈ ತತ್ವಗಳ ಮೂಲವಾದ ಪಂಚವಿಂಶತಿ ತತ್ವಗಳಿಗೂ ಅದೇ ರೀತಿಯ ಮಾನ್ಯತೆ ನೀಡಲಾಗಿದೆ. ಈ ಅಂಗ ತತ್ವಗಳು ಚರಕ ಸಂಹಿತೆಗಿಂತಲೂ ಹಿಂದಿನ ಕ್ರಿಸ್ತ ಪೂರ್ವ ಕಾಲದ ಸಾಂಖ್ಯ ದರ್ಶನದಿಂದ ಪಡೆದುಕೊಂಡವು. ಜಗತ್ತನ ಸೃಷ್ಠಿ ಹಾಗೂ ವಿಕಾಸದ ತತ್ವವಾಗಿ ಅದರಲ್ಲಿ ಪ್ರಕೃತಿಯ ಪ್ರಾಧಾನ್ಯತೆಯನ್ನು ಪ್ರತಿಪಾದಿಸುವ ತತ್ವಶಾಸ್ತ್ರವಾಗಿ ಭಾರತೀಯ ಪರಂಪರೆಯಲ್ಲಿ ತನ್ನ ಗಟ್ಟಿ ಛಾಪು ಮೂಡಿಸಿದೆ.

ಈ ತತ್ವಶಾಸ್ತ್ರ ಕಾಶ್ಮೀರದಿಂದ ಕನ್ಯಾಕುಮಾರಿಯವರೆಗೆ ವ್ಯಾಪಕ ಪ್ರಭಾವವನ್ನು ಬೀರಿತು. ಕಾಶ್ಮೀರದ ಪ್ರತ್ಯಭಿಜ್ಞಾ ಸಿದ್ಧಾಂತ, ತಮಿಳುನಾಡಿನ ಶೈವಧರ್ಮಗಳು ಸಾಂಖ್ಯ ದರ್ಶನದ ಪ್ರಭಾವದಲ್ಲಿ ಬೆಳೆದವು. ಭಾರತದಾದ್ಯಂತ ಸ್ವತಂತ್ರವಾಗಿ ಹಾಗೂ ವಿವಿಧ ಧಾರ್ಮಿಕ ಪಂಥಗಳ ಮೇಲೆ ಪ್ರಭಾವ ಬೀರಿದ್ದ ತಾಂತ್ರಿಕ ಪಂಥ ಪ್ರಕೃತಿಯ ಪ್ರಾಧಾನ್ಯತೆಯನ್ನು ಎತ್ತಿ ಹಿಡಿಯುವ ಸಾಂಖ್ಯ ದರ್ಶನವನ್ನು ಅಪ್ಪಿಕೊಂಡಿತು. ಈ ತಾಂತ್ರಿಕ ಪಂಥಗಳ ಮೂಲಕ ಬೌದ್ಧ ವಜ್ರಯಾನ, ಚೌರಾಸೀ (84) ಸಿದ್ಧರ ಪರಂಪರೆ, ನವನಾಥರ ಪರಂಪರೆ ಇವುಗಳು ಸಾಂಖ್ಯದರ್ಶನದ ತತ್ವಗಳನ್ನು ಸ್ವೀಕರಿಸಿದವು. ಆ ಮೂಲಕ ಇಡೀ ದೇಶದ ಭಕ್ತಿ ಪಂಥಗಳ ಪರಂಪರೆಯ ಮೇಲೇ ವಿವಿಧ ಪ್ರಮಾಣದ ಪ್ರಭಾವ ಬೀರಿತು. ಉದಾಹರಣೆಗೆ ಮಹಾರಾಷ್ಟ್ರದ ಜ್ಞಾನದೇವ, ಮೊದಲಾದವರ ವಾರ್ಕರಿ ಭಕ್ತಿ ಪಂಥ, ನವನಾಥರು ಹಾಗೂ ಕಾಶ್ಮೀರದ ಪ್ರತ್ಯಭಿಜ್ಞಾ ಶೈವ ಸಿದ್ಧಾಂತದ ಮೂಲಕ ಸಾಂಖ್ಯ ಸಿದ್ಧಾಂತದ ಪ್ರಭಾವದಲ್ಲಿ ವಿವಿಧ ರೀತಿ ಹಾಗೂ ಪ್ರಮಾಣದಲ್ಲಿ ಜಾತಿ ವ್ಯವಸ್ಥೆಯನ್ನು ಲಿಂಗ ಬೇಧವನ್ನು ವಿರೋಧಿಸಿದವು. ಪಂಜಾಬಿನಲ್ಲಿ ಪ್ರತ್ಯೇಕ ಧರ್ಮವೇ ಆಗಿ ಮಾರ್ಪಟ್ಟ ಸಿಖ್ ಧರ್ಮವೂ ಈ ಭಕ್ತಿ ಪಂಥಗಳ ಪ್ರಭಾವಕ್ಕೆ ಒಳಗಾಗಿ ಜಾತಿ ಪದ್ಧತಿಯನ್ನು , ಕಂದಾಚಾರ ಗಳನ್ನು ವಿರೋಧಿಸಿತು.
ಯೋಗ ದರ್ಶನ ಮತ್ತು ಕಾಯಕ
 
ಕಾಯಕಕ್ಕೆ ದೃಢವಾದ ಕಾಯವೂ ಬೇಕು ಎಂಬುದು ಸ್ವಾಭಾವಿಕವಾಗಿಯೇ ವಚನಕಾರರನ್ನು ಷಡ್ದರ್ಶನಗಳಲ್ಲೊಂದಾದ ಯೋಗ ದರ್ಶನದ ಕಡೆಗೆ ಆಕಷರ್ಿಸಿತು . ಅಷ್ಟೇ ಅಲ್ಲದೆ ಆ ವೇಳೆಗಾಗಲೇ ಯೋಗ ದರ್ಶನ ಸಾಂಖ್ಯ ದರ್ಶನಗಳು ಒಂದರಲ್ಲೊಂದು ಬೆರೆತು ಸಾಂಖ್ಯ- ಯೋಗವೆಂದು ಹೆಸರಾಗಿತ್ತು.ಆದ್ದರಿಂದ ಸಾಂಖ್ಯದ ಜೊತೆಗೇ ಯೋಗವನ್ನೂ ವಚನಕಾರರು ಸ್ವೀಕರಿಸಿದರು. ಅವರ ವಚನಗಳಲ್ಲಿ ಯೋಗದ ಹಲವಾರು ಪರಿಕಲ್ಪನೆಗಳನ್ನು ತಮ್ಮವೇ ಆಗಿಸಿಕೊಂಡಿದ್ದಾರೆ. ಅದರಲ್ಲಿಯೂ ವಚನ ಧರ್ಮದ ತಾತ್ವಿಕ ಅರಿವನ್ನು ಪಡೆಯಲು ಅವರು ರೂಪಿಸಿಕೊಂಡ ಮಾರ್ಗ ಷಟ್ಸ್ಥಲ ಸಿದ್ಧಾಂತ ಯೋಗದ ಷಟ್ಚಕ್ರದ ಅಚ್ಚಿನಿಂದ ಮೂಡಿ ಬಂದದ್ದು. ಇದಕ್ಕೂ ಜಾತಿ ವ್ಯವಸ್ಥೆಯ ವಿರೋಧಕ್ಕೂ ಏನು ಸಂಬಂಧ ? ಅದು ಕೇವಲ ಆಧ್ಯಾತ್ಮ ಎಂಬ ವಾದವನ್ನು ಮಂಡಿಸಲಾಗಿದೆ. ಆದರೆ ಈ ಸ್ಥಲಗಳ ಪ್ರತಿಯೊಂದು ಹಂತದಲ್ಲಿಯೂ ಜಾತಿ ವಿರೋಧ ಅಡಕವಾಗಿದೆ. ಒಂದೊಂದು ಸ್ಥಲವನ್ನೂ ಈ ಆಯಾಮದ ಬಗ್ಗೆ ಪ್ರತ್ಯೇಕವಾಗಿ ಪರಿಶೀಲಿಸಬಹುದು. ಆದರೆ ಸ್ಥಳಾಭಾವದಿಂದಾಗಿ ಒಂದೆರಡು ಸ್ಥಲಗಳಿಗೆ ಸೀಮಿತಗೊಳ್ಳಬೇಕಾಗಿದೆ.
ಭಕ್ತ ಸ್ಥಲ : ಭವಿಯಾಗಿದ್ದವನು ಗುರುವಿನಿಂದ ದೀಕ್ಷೆಯನ್ನು ಪಡೆದು ಪುನರ್ಜಾತನಾಗುತ್ತಾನೆ ಎಲ್ಲ ಧಾರ್ಮಿಕ ಪಂಥಗಳ ದೀಕ್ಷೆಯಲ್ಲಿಯೂ ಇದು ಸಾಮಾನ್ಯ. ದೀಕ್ಷೆಯನ್ನು ಹೊಸ ಹುಟ್ಟು ಎಂದು ಪರಿಗಣಿಸುತ್ತಾರೆ. ಹಿಂದಿನೆಲ್ಲ ಸಂಬಂಧಗಳನ್ನು ಕಳೆದುಕೊಳ್ಳತ್ತಾರೆ. ಆದರೆ ಈ ಹೊಸ ಹುಟ್ಟು ಸನ್ಯಾಸ ದೀಕ್ಷೆ ಪಡೆದ ಕೆಲವರಿಗೆ ಮಾತ್ರ ಅನ್ವಯವಗುವಂತಹದು. ಆದರೆ ವಚನಕಾರರ ಧರ್ಮದಲ್ಲಿ ಜನ ಸಾಮಾನ್ಯರು ಲಕ್ಷೊಪ ಲಕ್ಷ ಸಂಖ್ಯೆಯಲ್ಲಿ ಸಂಸಾರದಲ್ಲಿದ್ದುಕೊಂಡೇ ದೀಕ್ಷೆ ತೆಗೆದುಕೊಳ್ಳುವುದು ಮತ್ತು ಅದನ್ನು ಹೊಸ ಹುಟ್ಟೆಂದು ಪರಿಗಣಿಸುವುದು ಅಪರೂಪದ ಸಂಗತಿ. ಬಹಳಷ್ಟು ಸನ್ಯಾಸ ದೀಕ್ಷೆಗಳಲ್ಲಿಯೂ ಅವರು ತಮ್ಮ ತಂದೆ ತಾಯಿ, ಬಂಧುಗಳೋಡನೆಯ ಸಂಬಂಧವನ್ನು ಕಳೆದುಕೊಳ್ಳುತ್ತಾರೆಯೇ ಹೊರತು ತಮ್ಮ ಜಾತಿಯನ್ನಲ್ಲ . ಹಾಗೆ ಜಾತಿಯನ್ನು ತ್ಯಜಿಸಿ ಸನ್ಯಾಸ ಅಥವಾ ಇತರ ದೀಕ್ಷೆ ಪಡೆಯುವವರು ಸಾಮಾನ್ಯವಾಗಿ ವೈದಿಕ ಪಂಥಗಳಲ್ಲ.
ವಚನಕಾರರ ಪ್ರಕಾರ ಭಕ್ತನಾಗುವುದೆಂದರೆ ಶಿವಾಚಾರವನ್ನು ತಪ್ಪದೆ ಆಚರಿಸಬೇಕು. ಈ ಮೊದಲೇ ವಿವರಿಸಿದಂತೆ ಅವರ ಹಿಂದಿನ ಜಾತಿಯನ್ನು ಪರಿಗಣಿಸದೇ ಎಲ್ಲ ಭಕ್ತರನ್ನೂ ತನ್ನ ಬಂಧುಗಳೆಂದೇ ಪರಿಗಣಿಸಬೇಕು.ಅವರೊಡನೇ ಮಾತ್ರ ವೈವಾಹಿಕ ಸಂಬಂಧವನ್ನು ಬೆಳೆಸಬೇಕು. ಗುರು ಹಾಗೂ ಜಂಗಮರನ್ನೂ ಅವರ ಜಾತಿಯನ್ನು ಪರಿಗಣಿಸದೇ ಅವರಿಗೆ ಎಲ್ಲ ಗೌರವ, ಸತ್ಕಾರ ಮಾಡಬೇಕು. ಗುರು, ಜಂಗಮರೂ ಕೂಡ ಭಕ್ತರಾಗಿ ದೀಕ್ಷೆ ನೀಡಿದ ಬಳಿಕ ಜಾತಿಯನ್ನು ಪರಿಗಣಿಸದೇ ಅವರ ಮನೆಯಲ್ಲಿ ಊಟೋಪಚಾರಗಳನ್ನು ಸ್ವೀಕರಿಸಬೇಕು. ಇದೆಲ್ಲವೂ ಇಲ್ಲಿಯವರೆಗೆ ವಿವರಿಸಿದ ವಚನಕಾರರ ಆಧ್ಯಾತ್ಮಿಕ ಸಿದ್ಧಾಂತದ ಆಚರಣೆಯೇ ಹೊರತು ಮತ್ತೇನಲ್ಲ.
ಭಕ್ತರ ವಿಷಯದಲ್ಲಿ ಮಾತ್ರವೇ ಅಲ್ಲದೇ ಭವಿಗಳ ವಿಷಯದಲ್ಲಿಯೂ ಜಾತಿ ವ್ಯವಸ್ಥೆಯ ವಿರೋಧವನ್ನು ಕಾಣಬಹುದು. ಭವಿಗಳು ಯಾವ ಜಾತಿಯೇ ಆಗಿರಬಹುದು ನೀವು ಅವರನ್ನೆಲ್ಲಾ ಒಂದೇ ಎಂದು ಭಾವಿಸಬೇಕು. ಯಾರ ಮನೆಯಲ್ಲಿಯೂ ಊಟ , ಮೊದಲಾದ ಯಾವ ಸಾಮಾಜಿಕ ಸಂಬಂಧವನ್ನೂ ಇಟ್ಟುಕೊಳ್ಳಬಾರದು ಎಂದು ನಿಷೇಧಿಸಲಾಗಿದೆ. ಶಿವಾಚಾರ ದೀಕ್ಷೆ ತೆಗೆದುಕೊಳ್ಳುವ ಮೊದಲು ನೀವು ಕೆಳ ಜಾತಿಯವರೇ ಆಗಿದ್ದಿರಬಹುದು ಆದರೆ ನೀವು ಬ್ರಾಹ್ಮಣರನ್ನು ಮೇಲ್ಜಾತಿ ಎಂದು ಪರಿಗಣಿಸಿ ಅವರು ಮಾಡಿದ ಅಡುಗೆಯನ್ನು ಊಟಮಾಡುವಂತಿಲ್ಲ. ಇದು ಕೂಡ ಸಮಾಜದಲ್ಲಿ ಆಚರಣೆಯಲ್ಲಿರುವ ಜಾತಿಯ ಆಚರಣೆಗಳನ್ನು ಧಿಕ್ಕರಿಸಿದಂತೆಯೇ. ಹೀಗೆ ಕೇವಲ ಭಕ್ತ ಮಾತ್ರವಲ್ಲ ಭವಿಯ ಪರಿಕಲ್ಪನೆಯೂ ಕೂಡ ಜಾತಿ ಪದ್ಧತಿಯ ವಿರುದ್ಧ ಸೆಟೆದು ನಿಲ್ಲುವ ವಿಚಾರವನ್ನು ತನ್ನೊಳಗೆ ಬಚ್ಚಿರಿಸಿಕೊಂಡಿದೆ.